Nizami Kino Mərkəzində "Hal" filminin təqdimatı keçirilib

Bakı:

17 °C

63 %

12 m/s

Əlaqə

AZ RU EN

Ana səhifə / Mədəniyyət / Nizami Kino Mərkəzində "Hal" filminin təqdimatı keçirilib

Nizami Kino Mərkəzində "Hal" filminin təqdimatı keçirilib

30.03.2025 [12:41]

Martın 26-da Nizami Kino Mərkəzində "Hal" bədii filminin təqdimatı keçirilib.

Yeniazerbaycan.com xəbər verir ki, flmin ssenari müəllifi və rejissoru tanınmış yazıçı-şair, bəstəkar Sədaqət Kərimovadır.

Film tamaşaçıların marağına səbəb olub.

Ekran işində çəkilən peşəkar aktyor heyəti baş verən hadisələri olduqca təbii və səmimi şəkildə tamaşaçılara çatdıra bilib.

Hadisələr 70-ci illərdə cərəyan etsə də Qusar rayonu da daxil olmaqla bir çox əyalətlərdə bu gün də davam edən ailə-məişət problemləri filmdə tam çılpaqlığı ilə göstərilib.

Filmin süjet xəttini ailə-məişət problemləri, qadın zorakılığı və bu zorakılığın doğurduğu acı nəticələr təşkil edir.

S.Kərimova bu filmi 90-cı illərdə yazdığı "Hal" romanı əsasında çəkib. Ötən əsrin 90- cı illərində dərc olunan bu əsər müəllifə böyük şöhrət gətirib.

Filmin baş qəhrəmanlarından biri olan Səlmiya obrazını hamımızın "Soyuq günəş" filmindən Yargunat kimi tanıdığı aktrisa İranə Kərimova canlandırır. İ.Kərimova filmlə bağlı təəssüratlarını bölüşərkən bildirib ki, "Hal filminin çəkilişləri bir aydan daha az vaxt aparıb: "Film yay aylarında çəkildi, təbiətin gözəlliyi, insanların qonaqopərvərliyi bizə böyük motivasiya verirdi. Kənd camaatı çəkiliş prosesində bizə çox köməklik göstərirdi. Hətta, çəkiliş günlərində bizi öz evlərinə qonaq dəvət edirdilər. Təbii ki, çətinlik çəkdiyimiz məqamlar da oldu. Son səhnənin çəkilişləri 3 gün davam elədi. Hava şəraiti ilə bağlı işimizi görə bilmirdik,
Qəfil başlayan sel nəticəsində işlərimiz yarımçıq qaldı, yol bağlandı. Hətta komandamızdan bir neçə nəfər meşədə gecələməli oldu. Bütün çətinliklərə baxmayaraq sonda maraqlı bir ekran əsəri ortaya qoyduq. Ümid edirəm ki, filmimiz insanlar tərəfindən maraqla qarşılanar və sevilər".

Rəhman obrazını canlandıran Mir Sahib Qabiloğlu isə açıqlamasında bildirib ki, filmdə yeganə müsbət obrazlar uşaqlar olub: "Selmiya da müsbət obraz kimi canlandırmaq olar. Lakin Selmiya onu qaçırılmasına baxmayaraq Rəhmana qarşı müsbət münasibətdədir. Eyni zamanda, xoş üz göstərməklə Rəhmanın onun evinə gəlib-gəlməsinə şərait yaradır. Rəhmanın həyat yoldaşı Maisə obrazı isə öz çətin xarakteri ilə həyat yoldaşını özündən uzaqlaşdırır. Rəhman bir tərəfdən xəyallarla yaşayır, digər tərəfdən vicdan əzabı çəkir və filmin sonunda həqiqətən də dərvişə dönür. Belə filmlərin çəkilməsi mənim üçün olduqca müsbət haldır. Arzu edirəm ki, kinomuz daha da inkşaf etsin. Bunun üçün ilk olaraq yerli tamaşaçı sevgisi qazanmalıyıq".

Qeyd edək ki, "Hal" bədii filmi son illər Azərbaycanda dram janrında çəkilmiş ən gözəl filmlərdən biridir.

Havar Şəfiyeva

Paylaş:

Baxılıb: 630 dəfə