"Ovşarı" aşıq havası ermənilərin ifasında

Bakı:

18°C

59%

7m/s

Əlaqə

AZ RU EN

Ana səhifə / Mədəniyyət / "Ovşarı" aşıq havası ermənilərin ifasında

"Ovşarı" aşıq havası ermənilərin ifasında

19.05.2009 [09:32]

Ermənistanın “Eurovision-2009” müsabiqəsində təqdim etdiyi mahnı Azərbaycan aşıq sənətinin incilərindən “Ovşarı”nın oranjimanı olub
ötən həftənin sonu finalını həyəcanla gözlədiyimiz “Eurovision” mahnı müsabiqəsində 3-cü yeri tutmağımızla əlamətdar oldu.
Aysel və Araş cütlüyünün uğuru Azərbaycan mədəniyyətinin qitə yarışmasında hansı gücə malik olduğunu bir daha ortaya qoydu. Cütlük Azərbaycana qayıdıb və mətbuat bu bayramı yüksək səviyyədə qeyd edir. İştirakçılarla bağlı müəyyən tənqidi fikirlər olsa da, mədəniyyət xadimlərimizin bir aydan artıqdır ki, davam edən söz savaşına təmsilçilərimiz öz uğurları ilə son verdilər.
Təmsilçilərimizin çıxışını hər xırda detalına qədər müzakirə edən mətbuat yarışmada baş verən hadisələri də işıqlandırdı. Belə ki, Ermənistanın videotəqdimatında yer alan Qarabağ abidələri ilə bağlı məsələ geniş müzakirə obyekti oldu.
Erməni təmsilçilərlə işləyən, Azərbaycan vətəndaşı Aslan Əhmədovu danışdıran mətbuatımız nədənsə, ermənilərin musiqi oğurluqları haqqında ətraflı danışmadı.. Mətləbə keçməzdən onu deyim ki, “Ermənilərlə əməkdaşlığımı aqressiv qarşılamaq lazım deyil” deyən və təəssüf ki, həmyerlim adlandırmağa məcbur olduğum Aslan Əhmədov vətənimizin şərəfinə tərifli sözlər desə də, belə kosmopolit təfəkkürlü insanlara bir məqamı xatırlatmaq zorundayam. “Fresh Art” şirkəti olaraq “Eurovision-2009” müsabiqəsində iştirak edən erməni təmsilçilərinin yalnız geyimləri və saç düzümü üzərində işləmişik” deyən azərbaycanlıya misal olaraq erməni təəssübkeşliyini göstərmək yerinə düşərdi. Azərbaycan tərəfinin işə qarışmasından sonra təşkilatçıların təkidi ilə ermənilərə aid videobaşlıqdan Qarabağ abidələrinin çıxarılmasına baxmayaraq onlar istəklərinə çatdılar. ötən il yarışmada Ermənistanı təmsil edən Surişo balları elan edərkən əlindəki dəftərçəni bir neçə dəfə nümayişkəranə şəkildə yuxarı qaldırdı və orada əks olunan Qarabağ abidələrini bu şəkildə diqqətə çatdırdı. Erməni təmsilçilərinin yalnız geyimləri və saç düzümü üzərində işlədiyini söyləməklə özünə haqq qazandıran, “vətənimi atmaram” deyib minnət qoyan (vətənə lazımmış kimi) azərbaycanlı və ən xırda məqamdan belə istifadə edib millətinə və ölkəsinə yarınan erməni arasındakı vətənpərvərliyi müqayisə etməyi oxucunun öz ixtiyarına buraxırıq. Amma onu da etiraf etmək zorundayıq ki, ermənilərin sanballı, türk millətlərindən, xüsusən də, bizdən oğurlanmış elementlərlə möhtəşəm görüntüsünü yaratmaq üçün çalışan soydaşımızın zəhməti hədər getməmişdi.
Aşıq havası “Ovşarı”
Ermənilərin bu il də qatılacaqları qitə yarışmasında Azərbaycan musiqisindən yararlanacaqları gözlənilən idi və ehtimallar yüz faizlə özünü doğrultdu. Təkcə dizayn yox, təqdim olunan mahnı da Azərbaycan mədəniyyəti ilə az-çox tanış olan hər kəsi heyrətdə buraxdı.
Ermənilərin yarışmaya təqdim etdiyi musiqi ilə bağlı mütəxəssislərə müraciət etdik.
Azərbaycan Milli Konservatoriyasının baş müəllimi Mübariz Əliyev bizimlə söhbətində bildirdi ki, ilk dəfə Ermənistanın təqdim etdiyi musiqini dinləyəndə heyrətlənib. Mahnı başdan-başa aşıq havası olan “Ovşarı”nın üzərində qurulubmuş.
“Ovşarı” saz havası bizim “Sarı gəlin” qədər qədim bir musiqidir və hazırda da törəmələri ölkəmizin, bütün türk torpaqlarına yayılan Avşar tayfalarının adından götürülüb. Ritmindən də görünür ki, bu saz havası da digər döyüş havaları kimi çox ritmik və oynaqdır. Qədim xalq rəqsi olan “Qaytağı” və daha bir neçə rəqsin də əsası “Ovşarı” havasından qaynaqlanıb. Bizim dünyaşöhrətli musiqiçimiz Fikrət Əmirovun dünyaca məşhur “Ovşarı” simfonik muğamı da bu musiqidən qaynaqlanır.
XX əsrin əvvəllərinə qədər bütün musiqi mədəniyyətimizin xalq yaradıcılığında təşəkkül tapdığını deyən Mübariz Əliyev artıq bu mədəniyyətin bütün xırdalıqlarına qədər not üsulu ilə təbliğ olunmasını zamanın tələbi kimi dəyərləndirdi: “Musiqimizin oğurlanaraq dünya ictimaiyyətinə erməni mədəniyyət nümunəsi kimi təqdim olunması faktı qarşısında çıxış yolumuz yalnız bundadır. Ona görə də, əsərlərimizin nota köçürülməsi vacibdir. 1938-ci ildə Səid Rüstəmov bu işin əsasını qoyub. Amma çox təəssüf ki, sonradan bu iş davam etdirilməyib. Bu gün Azərbaycanda aşıq musiqisinə muğam qədər diqqət yetirilməlidir. Aşıqlar Birliyi və musiqişünaslarla bərabər aşıqlar özləri də bu işə dəstək verməlidir. Amma bir məsələ var ki, aşıqlarımız notu qəbul etmirlər. Unudurlar ki, üzeyir Hacıbəyov muğamı simfonik musiqiyə gətirdiyi kimi, biz aşıq havalarını da bu arenaya çıxartmalıyıq. Bir də xəbər tutacağıq ki, İrəvanda saz məktəbi açdılar, ondan sonra başlayacağıq ki, bizdən apardılar, oğurladılar və bu kimi sözlər. Ona görə də, öz musiqimizə sahib çıxmalı, saz havalarını nota köçürməliyik ki, biz Baxın, Şopenin, Bethovenin musiqisini çala bildiyimiz kimi, dünyanın istənilən musiqiçisi də bizim saz havalarını ifa edə bilsin. Not sazın, musiqinin kimlik kartıdı. Biz etməsək, bunu ermənilər edəcək. Sonrası da o olacaq ki, biz öz havalarımızı ifa edəndə, bizə oğru damğası vuracaqlar”.
Buna baxmayaraq, Mübariz Əliyev çox uğurlu bir addımın da atıldığını vurğuladı: “Biz artıq aşıq musiqisinin ibtidai bazasını yaratmışıq, onun not metodikasını işləyib hazırlamışıq. Biz çox gecikmişik, amma artıq buna da şükür ki, Mədəniyyət, Turizm və Təhsil nazirliklərinin müştərək qərarından sonra ibtidai musiqi məktəblərinin ilk sinifindən sazı tədris edən dərsliklər hazırlanıb. Yəni artıq saz musiqi aləti kimi notla öyrənilməyə başlanıb”.
KƏBUTƏR

Paylaş:

Baxılıb: 1458 dəfə