Makronistlər yeni koalisiya axtarışında

Bakı:

11 °C

58 %

6 m/s

Əlaqə

AZ RU EN

Ana səhifə / Siyasət / Makronistlər yeni koalisiya axtarışında

Makronistlər yeni koalisiya axtarışında

15.08.2024 [10:32]

Bu günlərdə Fransanın istefa vermiş baş naziri, “İntibah” (“Renaissance”) partiyası deputatlarının rəhbəri Qabriel Attal Milli Birlik (RN) və “Əyilməz Fransa (LF) partiyaları istisna olmaqla, Milli Assambleyada təmsil olunan siyasi partiya liderlərinə ünvanladığı məktubda “fəaliyyət planı” təklif edib. “İntibah” partiyasının baş katibi Stefan Sejurne tərəfindən də göndərilmiş məktubda Q.Attal bildirir ki, məqsədi adi fikir ayrılığını aradan qaldırmaqla dialoq vasitəsilə Milli Assambleyada yeni bir yol tapmaqdır.

Attalın yalvarışları

Bir vaxtlar makronistlər Milli Assambleyada təmsil olunan digər partiyaların təmsilçilərinə yuxarıdan aşağı baxırdılar, onlara münasibətdə saymazlıq jestləri edirdilər. İndi isə onlar ədalarını yığışdıraraq rəqiblərinə həmrəylik təklifi ilə çıxış ediblər. Attal əslində, Makron hakimiyyətinin siyasi ömrünü uzatmaqdan ötrü parlament fraksiyalarının təmsilçilərinə xitabən yalvarır.

Q.Attal məktubda dövlət hesablarının bərpası, iqtisadi suverenliyin gücləndirilməsi, dəyərlərin müdafiəsi, dünyəvilik və dövlət təsisatlarının yenilənməsi, eləcə də alıcılıq qabiliyyəti, mənzil, ətraf mühit, təhlükəsizlik və iş yerləri vasitəsilə fransızların həyat şəraitinin yaxşılaşdırılması kimi üzərində işlədiyi əsas layihələrdən söz açır.

“Bütün qrupumla birlikdə bu prioritetləri müzakirə etmək üçün sizin ixtiyarınızdayam”, - deyə Qabriel Attal siyasi partiyaların liderlərini fikir ayrılıqlarını aradan qaldırmağa çağırıb. Məktub Respublikaçı (sağlar), Demokrat Solçu və Respublikaçılara, Ekoloq və Sosial qrupa, Liot qrupuna və Sosialistlər və əlaqəli qrupların rəhbərlərinə göndərilib.

Qeyd edək ki, Makron partiyası parlament seçkilərinin ikinci turundan sonra Milli Assambleyada koalisiya axtarışında bu günə qədər uğur qazana bilməyib. E.Makronun Olimpiya Oyunları zamanı barışığa çağırmaq məqsədi də koalisiya yaratmaq üçün vaxt qazanmaq məqsədi daşıyırdı. Buna baxmayaraq, makronçular hələ də Milli Assambleyada koalisiya yarada bilməyiblər.

Makronun komandası çətin durumda

Fransa cəmiyyətində Makronun parlamentdəki bloku kimi tanınan “İntibah” partiyası deputatlarının rəhbəri Qabriel Attal Milli Assambleyada təmsil olunan siyasi partiya liderlərinə heç də xoş niyyətdən çıxış edərək məktub ünvanlamayıb. Bu, hakim komanda üçün məcburi qaydada atılan bir addımdır.

Makronistləri çətin duruma salan isə son vaxtlarda baş tutan iki seçkinin onlar üçün rüsvayçı nəticələri oldu. Söhbət “İntibah” partiyasının əvvəlcə Avropa Parlamentinə, bunun ardınca isə Milli Assambleyaya seçkilərdə uduzmasından gedir. Xatırladaq ki, Fransada iyunun 9-da Avropa Parlamentinə keçirilən seçkilərdə sağçı “Milli birlik” partiyası 31,36 faiz səs toplayaraq Makron koalisiyasını iki dəfədən çox üstələyib. Partiyasının Avropa seçkilərində iflasından sonra Makron parlamentin aşağı palatasını buraxaraq növbədənkənar seçkilər elan etdi. Bu qərar əslində, Makronun revanş cəhdi idi. Ancaq Makronun ikinci seçki cəhdi də uğursuz oldu. Belə ki, Milli Assambleyaya seçkilərin həm birinci, həm də ikinci turunda “İntibah” partiyası məğlubiyyət acısı yaşadı.

Hazırda analitiklər Makron üçün çətin hakimiyyət dövrünün başladığını, makronizm üçün sonun gəldiyini anons edirlər. Ümumiyyətlə, parlamentin yeni formalaşan tərkibi ilə onun ölkəni normal qaydada idarə edə biləcəyi mümkünsüz görünür. Qeyd edək ki, Fransa Milli Assambleyası 577 deputatdan təşkil olunur. Parlamentdə çoxluğu əldə etmək istəyən partiyaya 289 mandat lazımdır. Son seçkilərdən sonra isə “İntibah” partiyası parlamentdə cəmi 168 yerə malikdir.

MÜBARİZ

Paylaş:

Baxılıb: 927 dəfə