Azərbaycan hökumətinin UNİCEF ilə işgüzar əməkdaşlığı bundan sonra da uğurla davam etdiriləcək

Bakı:

18 °C

94 %

3 m/s

Əlaqə

AZ RU EN

Ana səhifə / Siyasət / Azərbaycan hökumətinin UNİCEF ilə işgüzar əməkdaşlığı bundan sonra da uğurla davam etdiriləcək

Azərbaycan hökumətinin UNİCEF ilə işgüzar əməkdaşlığı bundan sonra da uğurla davam etdiriləcək

11.06.2014 [09:15]

Azərbaycan Respublikası Baş nazirinin müavini, Qaçqınların və Məcburi Köçkünlərin İşləri üzrə Dövlət Komitəsinin sədri, Beynəlxalq Humanitar Yardım üzrə Respublika Komissiyasının sədri Əli Həsənov BMT-nin Uşaq Fondunun (UNİCEF) nümayəndəliyinin ölkəmizdə fəaliyyət müddəti başa çatmaqda olan rəhbəri Mark Herevardla görüşüb.
Komitənin mətbuat xidmətindən AzərTAc-a bildirilib ki, görüşdə Baş nazirin müavini Əli Həsənov UNİCEF-in Azərbaycanda fəaliyyətə başladığı vaxtdan, xüsusilə son beş ildə bu beynəlxalq qurumun ölkəmizdəki nümayəndəliyinin rəhbəri kimi Mark Herevardın təmsil etdiyi təşkilat ilə Azərbaycanın birgə uğurlu fəaliyyəti, yaradılan işgüzar əməkdaşlıq istiqamətində səylərini yüksək qiymətləndirib. Qeyd edib ki, UNİCEF xüsusilə Ermənistan-Azərbaycan, Dağlıq Qarabağ münaqişəsi nəticəsində doğma yurdlarından didərgin salınmış qaçqın və məcburi köçkün uşaqların hüquqlarının müdafiəsi, onların sağlamlıqlarının qorunması, təhsil problemlərinin həlli istiqamətində müvafiq proqramlar həyata keçirib.
Bildirilib ki, nümayəndəliyin ilk proqramları humanitar ehtiyacları və milli prioritetləri əhatə etsə də sonralar bu, müxtəlif illəri əhatə edən ölkə proqramları ilə əvəz olunub, Azərbaycan Respublikasının uşaqlarla bağlı dövlət siyasətinin, xüsusilə qaçqın və məcburi köçkün uşaqların sosial-müdafiə hüquqlarının təminatı sisteminin güclənməsinə töhfələrini verib.
Dövlətimizin daxili siyasətində uşaq problemlərinin mühüm yer tutduğu bildirilən görüşdə vurğulanıb ki, Azərbaycan bir sıra beynəlxalq təşkilatların, o cümlədən UNİCEF-in yaxın tərəfdaşıdır. Bu əməkdaşlıq ölkədə uşaqların inkişafı ilə bağlı mühüm layihələrin həyata keçirilməsinə və təcrübə mübadilələrinin aparılmasına təkan verir. UNİCEF ilə işgüzar əməkdaşlıq uşaqların inkişafına dəyərli töhfələr verməklə yanaşı, onların maraqlarının təmin olunmasına yönəlib.
Rəhbərlik etdiyi qurumun fəaliyyətinin müsbət qiymətləndirilməsinə, UNİCEF tərəfindən həyata keçirilən layihələrə verilən dəstəyə görə Azərbaycan hökumətinə minnətdarlığını bildirən Mark Herevard Azərbaycanın uşaq hüquqlarının müdafiəsi sahəsində bir çox uğurlara imza atdığını deyib. O, ötən müddətdə Azərbaycan ilə əməkdaşlığı, uşaq hüquqlarının müdafiəsində birgə və səmərəli səylər göstərilməsini yaxşı nümunə kimi dəyərləndirib və bu əməkdaşlığın bundan sonra da davam etdiriləcəyinə əminliyini bildirib.
Baş nazirin müavini Əli Həsənov Mark Herevarda Azərbaycanda səmərəli fəaliyyətinə görə təşəkkürünü bildirib və Afrika ölkəsinin regional nümayəndəliyinə direktor müavini təyin olunması münasibətilə onu təbrik edib, gələcək fəaliyyətində uğurlar diləyib.
Görüşdə UNİCEF-in Azərbaycandakı nümayəndəliyinin rəhbərinin müavini Rəşid Mustafa da iştirak edib.

Paylaş:

Baxılıb: 730 dəfə