Gürcüstanda müxalifətin etiraz dalğası genişlənir

Bakı:

1 °C

93 %

9 m/s

Əlaqə

AZ RU EN

Ana səhifə / Siyasət / Gürcüstanda müxalifətin etiraz dalğası genişlənir

Gürcüstanda müxalifətin etiraz dalğası genişlənir

16.04.2009 [16:31]

Mixail Saakaşvili isə prezident postunu tərk etmək niyyətində olmadığını və 2013-cü ilə qədər vəzifəsində qalacağını bəyan edir
Gürcüstan müxalifətinin bir neçə gündür davam edən etiraz aksiyaları səngimək bilmir. ötən gün Prezident Administrasiyası qarşısında çadırlar quran və aksiyaların prezident Mixail Saakaşvilinin istefasına qədər davam edəcəyini bəyan edən müxalifət liderləri dünən daha bir unikal aksiyaya imza atıblar. Onlar dövlət başçısının simvolik istefa ərizəsini hazırlayaraq onu prezidentə təqdim etməyə hazır olduqlarını bildiriblər. “Mixail Saakaşvilinin gürcü xalqına bəyanatı - mən prezident postunu tərk edirəm” şüarı prezident iqamətgahının dəmir hasarına asılıb. Şüarın yanında böyük avtoqələm də var. Mühafizəkarlar Partiyasının nümayəndəsi Bejan Qunava bəyan edib ki, Saakaşvili istənilən an həmin şüarı imzalaya bilər.
Qeyd edək ki, müxalifət artıq bundan sonrakı hərəkət trayektoriyasını da müəyyənləşdirib. Belə ki, yayılan məlumatlara görə, Gürcüstan müxalifəti bundan sonra kütləvi aksiyalarını Tiflisin üç nöqtəsində davam etdirəcək. Bu üç nöqtə parlamentin, prezidentin Avlabar iqamətgahının və İctimai Televiziya binasının qarşısıdır. Avlabar iqamətgahının ətrafında 30 çadır qurulub. Müxalifət liderlərindən biri, keçmiş prezident Zviad Qamsaxurdiyanın oğlu Konstantin Qamsaxurdiya bildirib ki, parlamentin bütün qapılarının ağzında piketlər təşkil olunacaq: “Bu parlament saxta parlamentdir. Onun fəaliyyəti qanunauyğun deyil”.
Müxalifət liderlərindən biri olan Kaxa Kukava isə bəyan edib ki, hər gün saat 15:00-da parlamentin qarşısında “informasiya mitinqi” olacaq. Amma əsas aksiya məhz prezident rezidensiyasının qarşısında olacaq: “Əgər Saakaşvili bizi buradan eşitmək istəmirsə, biz ona yaxınlaşarıq”.
Mixail Saakaşvili özü isə müxalifətin bu tələbinə müsbət cavab verməyəcəyini bəyan edərək bir daha qeyd edib ki, prezident postunu tərk etmək niyyətində deyil və səlahiyyət müddətinin başa çatacağı 2013-cü ilə qədər vəzifəsində qalacaq. Dövlət başçısı, növbəti dəfə Moskvanın bostanına daş ataraq, bu təxribatların arxasında Rusiyanın dayandığını və müxalifətin hərəkət istiqamətlərinin Kremldə müəyyənləşdirildiyini bəyan edib. O deyib ki, müxalifət ölkənin belə bir çətin şəraitində bu cür addımlara yer verməməli, əksinə hakimiyyətlə əlbir olub, əsas düşmənlərə qarşı birgə mübarizəyə qoşulmalıdır. Saakaşvili Qərbi də ittiham edərək, onları ölkədə baş verənlərə laqeyd qalmaqda suçlayıb.
Parlamentin sədri David Bakradze isə dialoq çağırışlarını yeniləyib. Onun sözlərinə görə, ölkədə vəziyyəti yaxşılaşdırmaq üçün yeganə yol dialoqdur. Avropa və avroatlantik strukturlara inteqrasiya məsələləri üzrə dövlət naziri Georgi Baramidze müxalifətə Tiflisin 40 kilometrliyində rus tanklarının dayandığını xatırladıb: “Müxalifətlə dialoqa başlamaq olar, lakin prezidentin istefası barədə dialoq olmayacaq”.
Bu arada müxalifət liderləri hökumətin dialoq çağırışlarına məhəl qoymayaraq aksiyaları sonacan davam etdirəcəklərini bir daha bəyan ediblər. Birləşmiş müxalifətin lideri Levan Qaçeçiladze aksiya iştirakçılarını prezident iqamətgahının qarşısına toplaşaraq fasiləsiz mitinqlərin davam edəcəyini bildirib: “Mitinqlərimiz Saakaşvili gedənə qədər davam edəcək”.
Qaçeçiladze Tiflisin hər küçəsinin etiraz aksiyası ərazisinə çevriləcəyinə söz verib: “Yaxın günlərdə vətəndaş itaətsizliyi ocaqları bütün Gürcüstan ərazisinə yayılacaq”.
AQŞİN

Paylaş:

Baxılıb: 1221 dəfə