Braziliyada Azərbaycanın adını daşıyan bələdiyyə məktəbi açılıb

Bakı:

17 °C

94 %

0 m/s

Əlaqə

AZ RU EN

Ana səhifə / Siyasət / Braziliyada Azərbaycanın adını daşıyan bələdiyyə məktəbi açılıb

Braziliyada Azərbaycanın adını daşıyan bələdiyyə məktəbi açılıb

18.03.2016 [09:43]

Braziliyanın Rio-de-Janeyro şəhərində Azərbaycanın adını daşıyan yeni bələdiyyə məktəbinin açılış mərasimi olub. Bu barədə AZƏRTAC-a Azərbaycanın Braziliyadakı səfirliyindən məlumat verilib.
Mərasimdə Rio-de-Janeyro şəhərinin meri Eduardo Paes, Azərbaycanın Braziliyadakı səfiri Elnur Sultanov, Rio-de-Janeyro Şəhər Şurasının üzvü, Azərbaycanın adının məktəbə verilməsi qanununun müəllifi Joao Rikardo Ribas və Braziliya-Azərbaycan parlamentlərarası dostluq qrupunun vitse-prezidenti, deputat Rodriqo Maya çıxış ediblər.
Braziliyada ilk dəfə Azərbaycanın adını daşıyan məktəbin açılmasını əlamətdar hadisə adlandıran E.Paes bunun ölkəmizə dərin hörmətin təzahürü olduğunu söyləyib. Mer bu məktəbin fəaliyyətinin iki ölkənin əlaqələrinin inkişafına töhfə verəcəyini vurğulayaraq, onun Azərbaycan ilə Rio-de-Janeyro arasında təhsil sahəsində davamlı əməkdaşlığın qurulmasında mühüm rol oynayacağını bildirib və burada təhsil alan şagirdlərin Azərbaycana bağlı olacaqlarını qeyd edib.
Səfir E.Sultanov Rio-de-Janeyroda Azərbaycanın adını daşıyan məktəbin açılmasından qürur hissi keçirdiyini söyləyib və bu hadisənin Azərbaycan ilə Braziliya arasında uğurlu əlaqələrin bariz nümunəsi olduğunu diqqətə çatdırıb. Səfir Azərbaycanda təhsil sahəsində həyata keçirilən dövlət siyasəti və əldə edilmiş nailiyyətlər barədə məlumat verərək son 10 ildə ölkədə 3000-ə yaxın orta məktəbin inşa edildiyini və əsaslı təmir olunduğunu bildirib. O, təhsil sahəsində iki ölkə arasında əməkdaşlıq üçün geniş imkanların olduğunu vurğulayıb və səfirliyin məktəblə yaxından əməkdaşlıqda marağını ifadə edib. Bununla yanaşı, səfir E.Sultanov 2015-ci ildən etibarən Bakı və Rio-de-Janeyro şəhərlərinin qardaşlaşdığını xatırladaraq həmin məktəbin bu şəhərlər arasında əlaqələrin inkişafına töhfə verəcəyini qeyd edib.
Azərbaycanın adını daşıyan məktəbin qanun layihəsinin müəllifi J.Ribas bu əlamətdar hadisənin əhəmiyyətini qeyd edərək, onun Azərbaycan ilə Braziliya, eyni zamanda, qardaşlaşmış şəhərlər olan Bakı və Rio-de-Janeyro arasında əlaqələrinin inkişafına töhfə verəcəyini diqqətə çatdırıb. O, 2013-cü ildə Azərbaycanda keçirilmiş III Bakı Beynəlxalq Humanitar Forumu çərçivəsində ölkəmizə səfərini xatırlayaraq, Azərbaycanın müasir inkişafı və zəngin mədəniyyətindən danışıb.
Daha sonra çıxış edən deputat R.Maya Rio-de-Janeyro şəhərində Azərbaycanın adını daşıyan məktəbin fəaliyyətə başlamasının əhəmiyyətindən danışıb, bunun Azərbaycanın Braziliyada daha geniş şəkildə tanıdılmasına xidmət edəcəyini vurğulayıb.
Tədbir zamanı səfir E.Sultanov məktəbə Azərbaycan xalçası və ölkəmiz haqqında portuqal və ingilis dillərində materiallar, habelə şagirdlərə Azərbaycan təsvirli köynəklər hədiyyə edib.
Mərasimin sonunda Novruz süfrəsi açılıb, qonaqlara şəkərbura, paxlava kimi Azərbaycan şirniyyatları təqdim olunub və ölkəmizin Novruz adətləri barədə məlumat verilib.

Paylaş:

Baxılıb: 775 dəfə