İsmayıl Rüştü Cirit: Naxçıvan qədim tarixə, müasir infrastruktura malik möhtəşəm diyardır

Bakı:

16 °C

100 %

1 m/s

Əlaqə

AZ RU EN

Ana səhifə / Siyasət / İsmayıl Rüştü Cirit: Naxçıvan qədim tarixə, müasir infrastruktura malik möhtəşəm diyardır

İsmayıl Rüştü Cirit: Naxçıvan qədim tarixə, müasir infrastruktura malik möhtəşəm diyardır

22.04.2016 [10:07]

Naxçıvan Muxtar Respublikası qədim tarixə, müasir infrastruktura və ecazkar təbiət gözəlliyinə sahib olan möhtəşəm bir diyardır. Muxtar respublikanın özünəməxsus iqlimi, təmiz havası və suyu, qədim mədəniyyət abidələri, yaşıllığa bürünən Naxçıvan şəhərinin müasir görkəmi insanı heyran edir.
Türkiyə Respublikası Ali Məhkəməsinin sədri İsmayıl Rüştü Cirit aprelin 20-də Naxçıvan Muxtar Respublikasına səfərindən sonra AZƏRTAC-ın müxbirinə müsahibəsində belə deyib.
O qeyd edib ki, Naxçıvanın şöhrətini dünyaya yayan təbii ehtiyatları arasında Duzdağın müalicəvi duz şaxtaları xüsusi yer tutur. Regionda analoqu olmayan bu müəssisə yuxarı tənəffüs yolları xəstəliklərindən əziyyət çəkənlərin müalicə mərkəzidir.
Naxçıvan şəhərində yerləşən Heydər Əliyev Muzeyini də ziyarət etdiyini deyən İsmayıl Rüştü Cirit bildirib ki, dahi şəxsiyyətin fotoşəkillərinə, Ulu öndərə məxsus şəxsi əşyalara və bir sıra digər qiymətli eksponatlara maraqla baxıb. Ümummilli liderin ictimai-siyasi fəaliyyətindən bəhs edən kitabları nəzərdən keçirib, Azərbaycanın xilaskarının 1991-1993-cü illərdə Naxçıvan Muxtar Respublikası Ali Məclisinin Sədri işlədiyi dövrə aid rəsmi sənəd və materiallar, məktublar onun diqqətini xüsusilə cəlb edib.
Qonaq qeyd edib ki, o, Naxçıvandakı “Xan Sarayı” Dövlət Tarix-Memarlıq, Möminə Xatın və Açıq Səma Altında Muzey Kompleksində, “Naxçıvanqala” Tarix-Memarlıq Muzey Kompleksində olub, Nuh peyğəmbərin məzarüstü türbəsini, “Əshabi-Kəhf Ziyarətgahı” Dini-Mədəni Abidə Kompleksini ziyarət edib.
Türkiyə Respublikası Ali Məhkəməsinin sədri deyib: “Naxçıvan diyarı möhtəşəm mədəniyyət, dini memarlıq və ecazkar məqbərə qüllələri ilə zəngindir. Bu diyarda həm də Əshabi-Kəhf ziyarətgahı yerləşir. Müqəddəs “Qurani-Kərim”də Əshabi-Kəhflə bağlı ayələrin mövcud olduğu məlumdur. Buradakı din alimləri Qurani-Kərimdə adı çəkilən həmin məkanın, həqiqətən də Əshabi-Kəhf olması ehtimalının yüksək olduğunu vurğuladılar. Onu bildirmək istəyirəm ki, Əshabi-Kəhf ziyarətgahında çox möhtəşəm təbiət mənzərəsi, insanın ruhuna rahatlıq bəxş edən mənəvi atmosfer mövcuddur. Naxçıvana səfər etdiyimə görə çox məmnunam. Çünki mənim atalarım da vaxtilə Naxçıvandan Anadoluya köç ediblər. Bu mənada Naxçıvan mənim ata yurdumdur. Ata yurdumun bu qədər gözəl və möhtəşəm olduğunu görüb çox sevindim”.
Muxtar respublikanın iqtisadi cəhətdən xeyli inkişaf etdiyini vurğulayan Türkiyə Respublikası Ali Məhkəməsinin sədri deyib: “Naxçıvan Biznes Mərkəzində olarkən muxtar respublikada istehsal olunan çoxsaylı sənaye və kənd təsərrüfatı məhsullarının sərgiləndiyini gördük. Bizə məlumat verildi ki, burada hazırda 86 müəssisənin 300-dən çox növdə və 1000-ə yaxın çeşiddə məhsulu nümayiş olunur. Bu, çox müsbət haldır. Naxçıvanın özünü ərzaq və istehsalat məhsulları ilə təmin etməsi böyük əhəmiyyət kəsb edir. Çünki muxtar respublika bu gün də blokada şəraitində yaşayır”.

Paylaş:

Baxılıb: 729 dəfə