Türkiyə KİV-ləri Ermənistan silahlı qüvvələrinin mülki əhalini ağır artilleriyadan atəşə tutmasına geniş yer ayırıb

Bakı:

17 °C

94 %

0 m/s

AZ RU EN

Ana səhifə / Siyasət / Türkiyə KİV-ləri Ermənistan silahlı qüvvələrinin mülki əhalini ağır artilleriyadan atəşə tutmasına geniş yer ayırıb

Türkiyə KİV-ləri Ermənistan silahlı qüvvələrinin mülki əhalini ağır artilleriyadan atəşə tutmasına geniş yer ayırıb

04.05.2016 [10:12]

Türkiyənin Anadolu Agentliyi, “TRT Haber” və “TRT Avaz” telekanalları Ermənistan silahlı qüvvələrinin şiddətli artilleriya atəşləri nəticəsində təmas xəttinə yaxın ərazilərdə yaşayan azərbaycanlı mülki əhaliyə dəymiş ziyanla bağlı cəbhəboyu zonadan reportajlar yayımlayıb.
AZƏRTAC xəbər verir ki, Anadolu Agentliyində yer alan reportajların birində erməni hərbi birləşmələrinin ağır artilleriya atəşləri nəticəsində iki mülki şəxsin həlak olduğu, səkkiz nəfərin isə yaralandığı diqqətə çatdırılıb. Qeyd olunub ki, Ağdam və Tərtər rayonlarında 200-dən çox evə ciddi ziyan dəyib. Təkcə Ağdam rayonunun Mahrızlı kəndində son üç gündə 26 evə ziyan dəyib, dörd ev tamamilə dağılıb. Xüsusi vurğulanıb ki, ermənilərin qadağan olunmuş silahlardan da istifadə edərək mülki əhalini hədəfə almasına baxmayaraq, yerli əhali torpaqlarını tərk etmir.
Agentlikdə yayımlanan digər reportajda isə diqqətə çatdırılıb ki, Ermənistan silahlı qüvvələrinin aprelin 2-dən başlayaraq, ağır artilleriya atəşləri nəticəsində ümumilikdə 34 məntəqəyə 97 mərmi düşüb. Tərtərdə 3, Ağdamda 2 nəfər ölüb, 34 nəfər yaralanıb. Ümumilikdə 457 bina zərər çəkib, 29 ev tamamilə yararsız hala düşüb. Atəş nəticəsində 309 heyvan tələf olub. Erməni hərbi birləşmələrinin atəş açdığı obyektlər arasında məktəblər, səhiyyə müəssisələri, uşaq bağçaları da var.
Xəbərdə, həmçinin Azərbaycan Prezidentinin ictimai-siyasi məsələlər üzrə köməkçisi Əli Həsənovun beynəlxalq təşkilatların, xüsusilə ATƏT-in Minsk qrupunun Ermənistanın mülki şəxsləri hədəfə almasına lazımi etiraz bildirməməsi və mövcud vəziyyətin saxlanmasına çalışdıqları ilə bağlı fikirləri də diqqətə çatdırılıb.
Anadolu Agentliyinin daha bir xəbərində isə Türkiyə Prezidentinin müşaviri Yalçın Topçunun cəbhəboyu zonaya səfər edərək vəziyyətlə yerində tanış olduğu qeyd edilib. Xəbərdə Y.Topçunun “Dağlıq Qarabağ münaqişəsi yalnız Azərbaycanın deyil, bütün türk və İslam dünyasının problemidir” sözləri xüsusi vurğulanıb.
Agentliyin xəbərlərində AZƏRTAC-ın da informasiyalarından istifadə olunub.
Türkiyənin “TRT Haber” və “TRT Avaz” telekanallarında yayımlanan reportajlarda da atəşkəs rejiminə baxmayaraq, Ermənistan silahlı qüvvələrinin cəbhəboyu zonada azərbaycanlı mülki əhalinin yaşadığı kəndləri ağır artilleriyadan şiddətli atəşə tutduqları əksini tapıb. Xəbərlərdə Azərbaycan Prezidenti İlham Əliyevin və xanımı Mehriban Əliyevanın cəbhəboyu zonada yerləşən Tərtər, Bərdə, Ağdam rayonlarına səfər edərək erməni hərbi birləşmələrinin atəşləri nəticəsində yaralanan mülki şəxslərlə görüşdükləri, əhaliyə dəymiş ziyanla maraqlandıqları xüsusilə vurğulanıb. Bildirilib ki, Tərtərdə hərbi hissələrdən biri ilə tanış olan Ali Baş Komandan təmas xəttindəki mövcud vəziyyətlə maraqlanıb, son hərbi əməliyyatlarda fərqlənən hərbi qulluqçuları təltif edib.

Paylaş:

Baxılıb: 678 dəfə