Azərbaycanın İspaniyadakı səfirliyində Ulu öndər Heydər Əliyevin anadan olmasının 93-cü ildönümü ilə bağlı anma mərasimi keçirilib

Bakı:

27 °C

53 %

4 m/s

AZ RU EN

Ana səhifə / Siyasət / Azərbaycanın İspaniyadakı səfirliyində Ulu öndər Heydər Əliyevin anadan olmasının 93-cü ildönümü ilə bağlı anma mərasimi keçirilib

Azərbaycanın İspaniyadakı səfirliyində Ulu öndər Heydər Əliyevin anadan olmasının 93-cü ildönümü ilə bağlı anma mərasimi keçirilib

11.05.2016 [10:05]

Mayın 10-da Azərbaycan Respublikasının İspaniya Krallığındakı səfirliyində Ulu öndər Heydər Əliyevin anadan olmasının 93-cü ildönümünə həsr edilən anma mərasimi keçirilib.
Mərasimdə Türkiyə, Qazaxıstan və Ukraynanın bu ölkədəki diplomatik nümayəndəliklərinin rəhbərləri, digər ölkələrin diplomatları, İspaniya ictimaiyyətinin, yerli kütləvi informasiya vasitələrinin təmsilçiləri və burada yaşayan azərbaycanlılar iştirak ediblər.
Anma mərasimində səfir Anar Məhərrəmov çıxış edərək Heydər Əliyevin həyat və fəaliyyətinin ayrı-ayrı məqamlarından bəhs edib, Azərbaycanın müstəqilliyinin qorunub saxlanılmasında və ölkədə sabitliyin bərqərar olmasında müdrik rəhbərin müstəsna xidmətlərini diqqətə çatdırıb.
Azərbaycanlı diplomat tarixi torpaqlarımızın Ermənistan tərəfindən işğal edildiyi, ölkədə xaos və hərc-mərcliyin hökm sürdüyü çətin bir vaxtda Heydər Əliyevin xalqın istəyi ilə yenidən hakimiyyətə qayıtmasını xatırladıb. A.Məhərrəmov məhz uzaqgörən siyasətçi və təcrübəli dövlət başçısı Heydər Əliyevin təşəbbüsü ilə 1994-cü ildə atəşkəs barədə razılıq əldə olunduğunu qeyd edib. O, həmçinin ölkəmizin zəngin enerji ehtiyatlarından istifadənin müstəqilliyin təminatında xüsusi rolunu qeyd edərək Heydər Əliyevin ciddi səyi nəticəsində 1994-cü ilin sentyabrında imzalanmış “Əsrin müqaviləsi”ni də xatırladıb.
Gənc Azərbaycan dövlətinin gücləndirilməsi istiqamətində Heydər Əliyevin gördüyü misilsiz işlərə toxunan səfir Ümummilli liderin səyi nəticəsində Azərbaycanın 2001-ci ildə Avropa Şurasına tamhüquqlu üzv seçilməsi, BMT, NATO, Avropa İttifaqı və digər mötəbər beynəlxalq təşkilatlar ilə sıx əməkdaşlıq etməsini də xüsusi qeyd edib.
Vurğulanıb ki, xatirəsi xalqımız tərəfindən daim əziz tutulan Heydər Əliyevin qoyub getdiyi zəngin siyasi irs və təcrübə əsasında Azərbaycan dövləti daha da güclənir, bu siyasi kurs bu gün Prezident İlham Əliyev tərəfindən uğurla davam etdirilir.
Daha sonra Türkiyə və Qazaxıstanın İspaniyadakı səfirləri çıxış edərək Heydər Əliyevi tarixi bir şəxsiyyət kimi dəyərləndirib, Azərbaycanın müstəqilliyinin qorunub saxlanılmasında və ölkələrimiz arasında əlaqələrin bugünkü yüksək səviyyədə olmasında müstəsna rolunu diqqətə çatdırıblar.
Tədbirdə Ümummilli lider Heydər Əliyev haqqında ispan dilində sənədli film nümayiş etdirilib. Mərasim iştirakçıları, həmçinin Ulu öndərin həyat və fəaliyyətini əks etdirən sərgiyə baxıblar, səfirlik tərəfindən ispan dilində çap etdirilmiş bukletlərlə tanış olublar.
Daha sonra qonaqlar tədbirlə bağlı hazırlanmış süfrəyə dəvət olunublar.

Paylaş:

Baxılıb: 671 dəfə