Bundestaq üzvü: Ermənistan işğal olunmuş Azərbaycan torpaqlarından qoşunlarını geri çəkməlidir

Bakı:

29 °C

43 %

5 m/s

Əlaqə

AZ RU EN

Ana səhifə / Siyasət / Bundestaq üzvü: Ermənistan işğal olunmuş Azərbaycan torpaqlarından qoşunlarını geri çəkməlidir

Bundestaq üzvü: Ermənistan işğal olunmuş Azərbaycan torpaqlarından qoşunlarını geri çəkməlidir

18.05.2016 [10:11]

Almaniya Bundestaqının CDU partiyasından olan deputatı, Almaniya-Cənubi Qafqaz parlament işçi qrupunun üzvü Karl Georq Vellmann “TV BERLİN” televiziya kanalının “Bundestaqdan” adlı verilişinə verdiyi müsahibədə Ermənistan-Azərbaycan, Dağlıq Qarabağ münaqişəsinin həlli prosesindən, Almaniya-Azərbaycan münasibətlərinin gələcək inkişafından, Avropanın enerji təhlükəsizliyinin təminatı məsələsində ölkəmizin artan rolundan bəhs edib.
Avropa Azərbaycan Cəmiyyəti regionda cərəyan edən proseslərə Almaniyadan baxışın Azərbaycan auditoriyası üçün maraqlı olmasını nəzərə alaraq tanınmış almaniyalı siyasətçinin müsahibəsindən Azərbaycan haqqında olan hissəni AZƏRTAC-a təqdim edir.
Əvvəlcə özü haqqında məlumat verən Karl Georq Vellman Azərbaycanın Avropanın enerji təhlükəsizliyindəki rolundan bəhs edərək deyib: “Bəzi postsovet ölkələrində, xüsusilə Azərbaycanda bizim enerji maraqlarımız var. Onlar zəngin neft və qaz ehtiyatlarına malik ölkələrdir. Almaniya karbohidrogenlərin ixracı üzrə dünya lideridir. Bizim böyük həcmli enerji resurslarına tələbatımız var. Bu, yalnız istilik naminə deyil, həmçinin sənayemizin dinamik inkişafı üçün də lazımdır. Məhz bu səbəbə postsovet respublikaları ilə əməkdaşlıq əlaqələrinin konstruktiv məcrada inkişaf etməsi bizim üçün böyük önəm daşıyır”.
Aparıcının Qafqazda yerləşən post-sovet ölkələrində dini vəziyyətlə əlaqədar sualına cavab olaraq almaniyalı siyasətçi bildirib ki, Azərbaycan bu məsələyə çox diqqətlə yanaşır. Azərbaycan əhalisinin böyük əksəriyyəti İslam dininə mənsubdur. Müasir Azərbaycan dünyəvi və qədim multikultural ənənələri olan ölkədir. Orada bütün dinlər azaddır. Hətta böyük sayda olan yəhudi icmasının üzvləri azad şəkildə öz dinlərinə etiqad edirlər. Ölkə daxilində karyera artımı üçün heç bir əngəl yoxdur. Onlar sərbəst şəkildə sahibkarlıqla da məşğul olurlar. Azərbaycanda hökm sürən sabit vəziyyətin davamlı olması bizim də marağımızdadır. Bu ölkədə sabitliyin hökm sürməsi Almaniyaya bu ölkə ilə yaxşı münasibətlər qurmaq üçün yeni imkanlar açır.
Ermənistan-Azərbaycan, Dağlıq Qarabağ münaqişəsinin tarixinə nəzər salan, həll prosesinin mümkün perspektivlərinə toxunan Bundestaq üzvü məlumat verib ki, Azərbaycanın Dağlıq Qarabağ bölgəsi Ermənistan hərbi birləşmələri tərəfindən işğal edilib. Beynəlxalq hüquqa əsasən, bu ərazi Azərbaycanın bir hissəsidir. Ötən əsrin 1990-cı illərinin əvvəllərində orada baş qaldırmış separatizm hərəkatı hərbi münaqişə ilə nəticələnib. Azərbaycanın 20 faiz ərazisi Ermənistan tərəfindən işğal edilib. Beynəlxalq ictimaiyyətin bütün səylərinə, ən əsası isə münaqişənin sülh yolu ilə həlli məqsədilə yaradılmış ATƏT-in Minsk qrupunun diplomatik fəaliyyətinə baxmayaraq, hələ də problemin həlli ilə bağlı heç bir nəticə əldə olunmayıb.
Karl Vellmann hesab edir ki, lokal hərbi toqquşmaların genişmiqyaslı müharibəyə çevrilməməsi üçün hər zaman orta məxrəcə gəlmək olar. Təbii ki, ilk növbədə Ermənistan qoşunları işğal olunmuş ərazilərdən geri çəkməlidir. Yalnız bu addım dalana dirənmiş sülh prosesində tərəqqinin baş verməsinə təkan verə bilər. O, sülhməramlı qüvvələrin bölgəyə göndərilməsi məsələsinin də nəzərdən keçirilməsini mümkün həll variantlarından biri olduğunu vurğulayıb.
Azərbaycanda olan qaçqın probleminə toxunan almaniyalı siyasətçi deyib: “Azərbaycan böyük qaçqın və məcburi köçkün ordusuna sığınacaq verməklə, regionda böyük humanitar böhranın baş verməməsi üçün əlindən gələni edib. Demək olar ki, təkbaşına onların bütün problemlərini öz üzərinə götürdü və heç bir ölkədən yardım istəmədi. Fikrimcə, məcburi köçkünlərin üzləşdiyi problemlər girdabından qurtarmağın yeganə çıxış yolu onların doğma yurdlarına qayıtması ola bilər. Bu mənada ATƏT-in Minsk qrupunun üzərinə böyük bir iş düşür. Artıq bütün dünya Minsk qrupundan konkret nəticələr gözləyir. Sadə dillə desək, indiyə qədər o, heç nəyə nail olmayıb və ona bəslənilən ümidlər özünü doğrultmayıb”.
Mark Vellman daha sonra vurğulayıb ki, ABŞ, Fransa və Rusiyanın həmsədr olduqları Minsk qrupunun icra mexanizmləri yoxdur. Onlar qəbul etdikləri qərarları həyata keçirməkdə çətinik çəkirlər. Elə təəssürat yaranır ki, Ermənistan Azərbaycan ilə konstruktiv danışıqlar aparmaqdan boyun qaçırır. Ümumiyyətlə, bu ölkənin siyasi rəhbərliyi buna hazır deyil.

Paylaş:

Baxılıb: 588 dəfə