Suzanne Mohamed Gamil: Azərbaycan ilə Misir arasında ikitərəfli əlaqələr uğurla inkişaf edir

Bakı:

21 °C

78 %

3 m/s

Əlaqə

AZ RU EN

Ana səhifə / Siyasət / Suzanne Mohamed Gamil: Azərbaycan ilə Misir arasında ikitərəfli əlaqələr uğurla inkişaf edir

Suzanne Mohamed Gamil: Azərbaycan ilə Misir arasında ikitərəfli əlaqələr uğurla inkişaf edir

16.06.2016 [09:12]

“Azərbaycan ilə Misir arasında ikitərəfli əlaqələr uğurla inkişaf edir”. Bunu dünən keçirdiyi mətbuat konfransında Misir Ərəb Respublikasının Azərbaycandakı fövqəladə və səlahiyyətli səfiri xanım Suzanne Mohamed Gamil deyib. O bildirib ki, ölkələr arasındakı əməkdaşlığın daha da güclənməsi hər iki tərəf üçün böyük əhəmiyyət kəsb edir. Misir və Azərbaycan arasında ticarət əlaqələrinin genişləndirilməsi üçün mövcud potensialdan bəhs edən səfir Misir iş adamlarının Azərbaycanda dərman və tibbi ləvazimatlar zavodu açacağını söyləyib: “Azərbaycan və Misir arasındakı ticarət əlaqələrinin ən yüksək səviyyəsi 2010-cu ildə qeydə alınıb. Biz Azərbaycandan neft və qaz idxal edirik, Misir isə Azərbaycana dərman preparatları, meyvə, tərəvəz ixrac edir. Biz bu əlaqələrin daha da inkişafına çalışırıq. Buna misal olaraq deyə bilərik ki, misirli iş adamları Azərbaycanda əczaçılıq zavodunun tikilməsinə maraq göstərirlər. Əsas məqsəd Hepatit C virusunu müalicə edən preparatları Azərbaycanda istehsal etməkdir. Azərbaycan Səhiyyə Nazirliyinin bir qrup heyəti dərman preparatlarının keyfiyyətini yoxlamaq üçün ötən ay Misirə səfər edib. Bu səfər Misirin ən böyük dərman istehsalçılarından biri olan “ADMA”nın dəvəti əsasında baş tutub. Səfər çərçivəsində bir neçə tibbi ləvazimatın Azərbaycana gətirilməsinə dair razılıq əldə olunub. 14-16 iyun tarixlərində Misirdən Bakıya nümayəndə heyəti gələcək və dərman zavodunun tikilməsi istiqamətində danışıqlar aparacaq”.
Turizm sektorunun istənilən ölkənin inkişafında ən mühüm meyarlardan biri olduğunu deyən diplomat Misirin Azərbaycandakı səfirliyinin bu təşəbbüslərə dəstək verəcəyini bildirib: “Əsas məqsəd iki ölkə arasındakı turizm əlaqələrini inkişaf etdirməkdir. Ümid edirik ki, bu əməkdaşlıq gələcəkdə də inkişaf edəcək. Hədəfimiz təkcə azərbaycanlı turistlərin Misirə getməsi deyil, həm də Misirdən Azərbaycana çoxlu sayda turistlərin gəlməsidir. Missiyamız qarşılıqlı olaraq ölkələrimizdə Misir və Azərbaycan haqqında olan bilikləri artırmaqdır. Misir xalqı Qəbələni, Gəncəni, Naxçıvanı, Şahdağ Qış-Yay Turizm Mərkəzini tanımalıdır”.
Ermənistan-Azərbaycan, Dağlıq Qarabağ münaqişəsi ilə bağlı Misirin mövqeyinin konkret olduğunu deyən səfir bu məsələdə Azərbaycana dəstəyini ifadə edib: “Misir BMT Təhlükəsizlik Şurasının Dağlıq Qarabağ münaqişəsi üzrə 4 qətnaməsini və bu məsələdə Azərbaycanı dəstəkləyir. Biz münaqişənin sülh yolu ilə həll olunacağına ümid edirik”.
Müşfiqə BAYRAMLI

Paylaş:

Baxılıb: 696 dəfə