Konstitusiyaya təklif olunan dəyişikliklər ölkəmizin inkişafına xidmət edir

Bakı:

21 °C

78 %

4 m/s

Əlaqə

AZ RU EN

Ana səhifə / Siyasət / Konstitusiyaya təklif olunan dəyişikliklər ölkəmizin inkişafına xidmət edir

Konstitusiyaya təklif olunan dəyişikliklər ölkəmizin inkişafına xidmət edir

21.07.2016 [09:40]

Millət vəkilləri hesab edirlər ki, bu dəyişikliklər insan hüquqlarının müdafiəsinin daha da gücləndirilməsinə və dövlətimizin möhkəmlənməsinə töhfə verəcək
Məlum olduğu kimi, iyulun 18-də Azərbaycan Prezidenti İlham Əliyev “Azərbaycan Respublikasının Konstitusiyasında dəyişikliklər edilməsi haqqında” Azərbaycan Respublikasının Referendum Aktının layihəsinin Azərbaycan Respublikasının Konstitusiya Məhkəməsinə göndərilməsi barədə Sərəncam imzalayıb. Sərəncama əsasən, “Azərbaycan Respublikasının Konstitusiyasında dəyişikliklər edilməsi haqqında” Azərbaycan Respublikasının Referendum Aktının layihəsi rəy verilməsi üçün Konstitusiya Məhkəməsinə təqdim edilib.
Milli Məclisin Səhiyyə komitəsinin sədr müavini, Yeni Azərbaycan Partiyası (YAP) Siyasi Şurasının üzvü Musa Quliyev bildirib ki, Azərbaycan demokratik dövlətdir və dinamik inkişaf yolundadır. O deyib ki, demokratik cəmiyyətlərdə konstitusiya islahatlarının həyata keçirilməsi qanunauyğunluqdur. M.Quliyev bildirib ki, Azərbaycan Prezidentinin konstitusiya dəyişiklikləri ilə bağlı təqdim etdiyi Referendum Aktı layihəsində nəzərdə tutulan məsələlər insan hüquq və azadlıqlarının daha təkmil formada qorunmasına xidmət edəcək. Onun sözlərinə görə, bu dəyişikliklər dövlətçilik ənənələrini daha da möhkəmləndirəcək.
“Azərbaycan Prezidenti tərəfindən irəli sürülən təkliflərin referendum vasitəsi ilə qəbul olunacağına inanıram. Ümid edirəm ki, xalqımız bu dəfə də ölkə başçısı ilə həmrəyliyini nümayiş etdirəcək və iqtidar-xalq vəhdətini ortaya qoyacaq. Çünki xalqımız hər zaman ölkə başçısının həyata keçirdiyi islahatları dəstəkləyir. Konstitusiyaya təklif olunan dəyişikliklər Azərbaycan xalqının və dövlətinin gələcək inkişafı baxımından önəmlidir. Ona görə də konstitusiya islahatları zəruridir”, - deyə M.Quliyev vurğulayıb.
YAP Siyasi Şurasının üzvü qeyd edib ki, atılan bu addım beynəlxalq praktikaya uyğundur. Onun fikrincə, Referendum Aktı layihəsinə qarşı çıxanların da ciddi arqumentləri yoxdur. Millət vəkili xalqın konstitusiya islahatlarını dəstəkləyəcəyinə əminliyini ifadə edib.
YAP Siyasi Şurasının üzvü, Milli Məclisin deputatı Məlahət İbrahimqızı isə bildirib ki, konstitusiyaya təklif edilən dəyişikliklər milli dövlətçiliyimizin güclənməsinə xidmət edəcək. Onun sözlərinə görə, Azərbaycan demokratik dövlətdir və atılan addım da demokratiya yolunda növbəti mərhələdir: “Hesab edirəm ki, dövlət başçısının bu qərarı demokratik dəyərlərin daha da inkişaf etdirilməsinə xidmət edəcək. Ümumilikdə, cənab Prezidentin konstitusiya dəyişiklikləri ilə bağlı təşəbbüsü zamanın tələbidir. Dünyanın demokratiya ənənəsi olan istənilən ölkəsində vaxtaşırı olaraq konstitusiya islahatları və dəyişikliklər həyata keçirilir. Bu mənada ölkəmizdə də növbəti konstitusiya islahatları zəruridir. Azərbaycanın müstəqillik illəri ərzində ölkəmizdə prezidentlik institutu özünü təsdiq edib. Bu baxımdan, əlbəttə ki, bu gün Azərbaycanda prezidentlik müddətinin 5 ildən 7 ilə qədər artırılması, həmçinin vitse-prezidentlik institutunun yaradılmasına zərurət yaranıb. Eləcə də, seçkilərdə namizəd kimi iştirak etmək üçün yaş məhdudiyyətinin aradan qaldırılması və digər dəyişikliklər önəmlidir”.
Millət vəkili qeyd edib ki, konstitusiya dəyişikliklərində insan haqlarının təminatı amili də öncül yerdə dayanır. M.İbrahimqızı qeyd edib ki, ölkəmizdə həyata keçirilən çoxşaxəli humanizm siyasətinin real nəticəsi kimi, Azərbaycanda insan və vətəndaş hüquq və azadlıqlarının müdafiəsi yönündə yeni keyfiyyət dəyişiklikləri baş verir: “Eyni zamanda, bu sahədə əldə edilən nəticələr hüquqi dövlət quruculuğuna töhfə verən əhəmiyyətli faktor kimi çıxış edib. Ulu öndər Heydər Əliyev tərəfindən insan və vətəndaş hüquq və azadlıqlarının təmin və müdafiə olunması istiqamətində həyata keçirilən çoxşaxəli humanizm siyasəti Prezident İlham Əliyevin rəhbərliyi ilə müasir dövrün qanunauyğunluqlarına, reallıqlarına və tələblərinə müvafiq surətdə davam etdirilməkdədir. Dövlət başçısının birbaşa tövsiyə və göstərişləri əsasında görülən sistematik işlər insan və vətəndaş hüquq və azadlıqlarının müdafiəsi sahəsində xüsusi əhəmiyyət kəsb edir. Çox sevindirici haldır ki, Azərbaycan Konstitusiyasında insan haqlarının qorunması məsələsi daha da gücləndirilir”.
Nardar BAYRAMLI

Paylaş:

Baxılıb: 966 dəfə