Argentina Szabados: Beynəlxalq Miqrasiya Təşkilatı Azərbaycan hökuməti ilə əməkdaşlığa böyük önəm verir

Bakı:

19 °C

88 %

2 m/s

AZ RU EN

Ana səhifə / Siyasət / Argentina Szabados: Beynəlxalq Miqrasiya Təşkilatı Azərbaycan hökuməti ilə əməkdaşlığa böyük önəm verir

Argentina Szabados: Beynəlxalq Miqrasiya Təşkilatı Azərbaycan hökuməti ilə əməkdaşlığa böyük önəm verir

29.07.2016 [10:12]

Azərbaycan Respublikası Baş nazirinin müavini, Qaçqınların və Məcburi Köçkünlərin İşləri üzrə Dövlət Komitəsinin sədri, Beynəlxalq Humanitar Yardım üzrə Respublika Komissiyasının sədri Əli Həsənov iyulun 28-də Beynəlxalq Miqrasiya Təşkilatının (BMqT) Cənub-Şərqi Avropa, Şərqi Avropa və Mərkəzi Asiya üzrə regional direktoru xanım Argentina Szabados ilə görüşüb.
Görüşdə Baş nazirin müavini Əli Həsənov xalqımızın Ümummilli lideri Heydər Əliyevin və Prezident İlham Əliyevin müxtəlif vaxtlarda Beynəlxalq Miqrasiya Təşkilatının baş direktorları ilə görüşlərini xatırladıb və təşkilatla ölkəmiz arasında münasibətlərin mövcud vəziyyəti, inkişaf perspektivləri, miqrasiya sahəsində mövcud olan uğurlu əməkdaşlığın daha da gücləndirilməsi və genişləndirilməsi ətrafında fikir mübadiləsi aparılıb.
Əli Həsənov BMqT-nin Bakıdakı ofisinin fəaliyyətini yüksək qiymətləndirərək, müxtəlif sahələrlə bağlı həyata keçirilən humanitar və inkişaf layihələrinə görə təşəkkürünü bildirib, ölkəmizin bu təşkilatla əməkdaşlığın gücləndirilməsi kontekstində yeni layihələrə açıq olduğunu diqqətə çatdırıb.
Beynəlxalq Miqrasiya Təşkilatının ölkəmizdə fəaliyyətə başlamasından sonra həyata keçirdiyi layihələri prioritet layihələr kimi dəyərləndirən Baş nazirin müavini Əli Həsənov onu da diqqətə çatdırıb ki, Prezident İlham Əliyevin uğurlu fəaliyyəti nəticəsində Azərbaycanın iqtisadi inkişafı, ölkəmizdə həyata keçirilən irimiqyaslı beynəlxalq layihələr, yeni iş yerlərinin yaradılması, vətəndaşlarımızın, ölkədəki qaçqın və məcburi köçkünlərin həyat şəraitinin yaxşılaşdırılması və bu sahədə görülən işlərin oxşar problemlə üzləşən ölkələr üçün nümunə kimi dəyərləndirilməsi miqrantları da özünə cəlb edir.
Görüşdə vurğulanıb ki, Azərbaycan hökuməti Beynəlxalq Miqrasiya təşkilatı ilə miqrasiya və sərhəd idarəçiliyi üzrə potensialın gücləndirilməsi, insan alverinə qarşı mübarizə və kənd yerlərində kəhrizlərin bərpası vasitəsilə su təchizatının və həyat şəraitinin yaxşılaşdırılması sahəsində çox böyük əməkdaşlıq edib. Əli Həsənov Ermənistan-Azərbaycan, Dağlıq Qarabağ münaqişəsi, bu münaqişə nəticəsində yaranmış 1 milyon 200 mindən çox qaçqın və məcburi köçkün problemi, həmin problemin həlli yolları ilə bağlı görülən işlər barədə də qonağa hərtərəfli məlumat verib.
Ətraflı məlumata, BMqT-nin fəaliyyətinə verdiyi qiymətə görə minnətdarlığını bildirən xanım Argentina Szabados bu gün Azərbaycanın ərazisinin 20 faizinin işğal altında olmasına, bir milyondan çox vətəndaşının qaçqın və məcburi köçkün şəraitində yaşamasına baxmayaraq, ölkəmizin böyük uğurlara imza atdığını vurğulayıb, bütün bunlardan məmnunluğunu ifadə edib, Azərbaycan hökuməti ilə əməkdaşlığa böyük önəm verdiklərini bildirib.
Qonaq, həmçinin Azərbaycan Prezidentinin birbaşa qayğısı ilə qaçqın və məcburi köçkünlər üçün yaradılmış şəraiti yüksək qiymətləndirib. O, ümidvar olduğunu bildirib ki, ölkəmizə səfəri beynəlxalq qurumla Azərbaycan arasında əməkdaşlığın inkişafına yeni töhfələr verəcək.

Paylaş:

Baxılıb: 708 dəfə