ÜAK-ın ləğvi ilə bağlı qərar subyektiv xarakter daşıyır

Bakı:

25 °C

69 %

4 m/s

Əlaqə

AZ RU EN

Ana səhifə / Siyasət / ÜAK-ın ləğvi ilə bağlı qərar subyektiv xarakter daşıyır

ÜAK-ın ləğvi ilə bağlı qərar subyektiv xarakter daşıyır

20.05.2017 [08:12]

Rusiyadakı anti-Azərbaycan dairələr bu qərarın qəbul olunmasına nail olmaqla Rusiya və Azərbaycan arasında münasibətləri sınaq qarşısında qoymaq planlarını reallaşdırmağa çalışırlar
Xəbər verildiyi kimi, Rusiya Ali Məhkəməsi tərəfindən mayın 15-də Ümumrusiya Azərbaycanlıları Konqresinin (ÜAK) qeydiyyatının ləğvinə dair qərar qəbul olunub. Bu qərəzli və qeyri-obyektiv qərar Azərbaycan ictimaiyyəti tərəfindən haqlı olaraq ciddi narazılıqla qarşılanıb. İki ölkə arasındakı münasibətlərin yüksək səviyyədə olduğunu nəzərə alsaq, bu qərarın həmin münasibətlərin ruhuna zidd olması birmənalı şəkildə vurğulanır. Ümumiyyətlə, polietnik Rusiya cəmiyyətinin xarakterinə zidd olan bu qərar çoxmədəniyyətli bir ölkənin tolerantlıq mühitini hədəf altına alır. Belə bir qərarın qəbul olunması ölkələrarası münasibətlərə mənfi təsir etməklə yanaşı, millətlərarası münasibətlərə də xələl gətirir.
Vurğulamaq lazımdır ki, bu qərarın konkret olaraq subyektiv xarakter daşıması ortadadır. Rusiyada fəaliyyət göstərən bəzi anti-Azərbaycan dairələr, erməni lobbisi belə bir mənfi xarakterə malik qərara nail olmaqla Rusiya və Azərbaycan arasında münasibətləri sınaq qarşısında qoymaq planlarını reallaşdırmağa çalışırlar. Ölkə ictimaiyyəti həm də bu rəyi ifadə edir ki, belə bir addım həm Rusiyadakı erməni lobbisinə diqqətin gücləndirilməsi, həm də Ermənistana hərbi yardımın artırılması fonunda baş verirsə, deməli, Rusiyanın Dağlıq Qarabağ münaqişəsinin həllində tərəfsiz vasitəçi missiyasına, ATƏT-in Minsk qrupunun həmsədri mandatına da kölgə düşür.
Məsələ ilə bağlı fikirlərini bölüşən millət vəkili Azər Badamov bildirib ki, Rusiyada ermənilərə xidmət göstərən qüvvələr mövcuddur və həmin qüvvələr Azərbaycan-Rusiya münasibətlərinə xələl gətirmək istəyir: “Məlum məsələdir ki, erməni lobbisinin nəzarətində olan həmin dairələr Azərbaycan-Rusiya dostluq əlaqələrinin inkişafını həzm edə bilmirlər və daima buna qarşı yollar axtarırlar. ÜAK-ın ləğvi ilə bağlı qərar da məhz bu cəhdlərdən biridir”.
Millət vəkili bildirib ki, ölkəmizin Rusiyadakı diaspor təşkilatlarından biri olan ÜAK-ın ləğvi məsələsi məhz ermənilərə xidmət edən qüvvələr tərəfindən gündəmə gətirildi: “Ümumrusiya Azərbaycanlıları Konqresi Rusiyada ən böyük qeyri-hökumət təşkilatıdır. Son zamanlar Rusiyadakı azərbaycanlıların konqresdə birləşərək, Azərbaycanın mövqeyini müdafiə etməsi erməni lobbisini əməlli-başlı narahat etmişdi. Azərbaycanlıların Rusiyada bir ideya ətrafında birləşməsini istəməyən və bundan qorxan qüvvələr, konkret ermənilər və onlara xidmət edənlər bu məsələni gündəmə gətirdilər. Hər bir halda iki ölkə - Rusiya ilə Azərbaycan arasında möhkəm təməllər üzərində formalaşmış dostluq münasibətləri mövcuddur və düşünürəm ki, bu məsələ ilə bağlı yaxın zamanda yeni bir qərarın gündəmə gəlməsi mümkündür”.
Millət vəkili Tahir Mirkişili də Rusiya Ali Məhkəməsi tərəfindən ÜAK-ın qeydiyyatının ləğvinin narahatlıq doğurduğunu bildirib. T.Mirkişili qeyd edib ki, bu qərar Rusiya ilə Azərbaycan münasibətlərinin yaxşılaşmasından narahat olan qüvvələrin sifarişidir: “Bu qurumun məqsədi Rusiya ilə Azərbaycan əlaqələrinin yaxşılaşmasına dəstək verməkdən ibarət olub. Bu qurum təkcə Rusiyada yaşayan azərbaycanlıların birliyi deyil. Konqres həm Rusiya, həm də Azərbaycan ziyalılarını birləşdirən bir platformadır. Qurumun qeydiyyatının ciddi bir səbəb olmadan ləğv edilməsi təbii proses kimi qəbul edilə bilməz. Rusiya qanunlarına görə, ölkə ərazisində fəaliyyət göstərən hansısa bir qurumun sənədlərindəki çatışmazlıqlar Rusiyanın maraqlarına ziddirsə, bu halda həmin qurumun fəaliyyəti dayandırıla bilər. Əgər ölkə maraqlarına zidd deyilsə, təşkilatın sənədləri qanuna uyğun şəklə salınmalıdır. ÜAK-ın fəaliyyət göstərməsi üçün çatışmayan sənədlər də Rusiyanın maraqlarına heç bir xələl gətirmir”.
T.Mirkişili hesab edir ki, Rusiyada yaşayan azərbaycanpərəst qüvvələr və Rusiya-Azərbaycan münasibətlərinin yaxşılaşmasına xidmət edən şəxslər iki ölkənin çoxtərəfli əlaqələrini rəhbər tutaraq bəlli olmayan səbəbdən bu qurumun ləğv edilməsinin qarşısını alacaq.
Pərviz SADAYOĞLU

Paylaş:

Baxılıb: 566 dəfə