Cavanşir Paşazadə: Ölkəmizdə həyata keçirilən iqtisadi islahatların əsas hədəflərindən biri də kənd təsərrüfatı və aqrar sənayenin inkişafıdır

Bakı:

24 °C

57 %

4 m/s

AZ RU EN

Ana səhifə / Siyasət / Cavanşir Paşazadə: Ölkəmizdə həyata keçirilən iqtisadi islahatların əsas hədəflərindən biri də kənd təsərrüfatı və aqrar sənayenin inkişafıdır

Cavanşir Paşazadə: Ölkəmizdə həyata keçirilən iqtisadi islahatların əsas hədəflərindən biri də kənd təsərrüfatı və aqrar sənayenin inkişafıdır

30.11.2019 [10:18]

“Ölkəmizdə həyata keçirilən iqtisadi islahatların əsas hədəflərindən biri kənd təsərrüfatı və aqrar sənayenin inkişafı ilə bağlıdır. Çünki kənd təsərrüfatı ölkənin sosial-iqtisadi problemlərinin həllində, xüsusən də regionlarda yaşayan insanların məşğulluğunda mühüm rol oynayır. Son illərdə dövlətimizin başçısı İlham Əliyevin aqrar sahəyə diqqət və qayğısı kənd təsərrüfatı ilə məşğul olan əhali tərəfindən böyük rəğbət və minnətdarlıqla qarşılanır”. Bu fikirləri Milli Məclisin deputatı Cavanşir Paşazadə deyib.
C.Paşazadə bildirib ki, ölkə Prezidentinin Lənkəran şəhəri və Masallı rayonuna səfərləri, çayçılıq, sitrusçuluq və çəltikçiliyin inkişafına aid verdiyi tövsiyələri fermerlərin işini xeyli asanlaşdırdı, eləcə də dövlət başçısının Lənkəranda Çəltik zavodunun, Masallıda yeni Sənaye Məhəlləsinin açılışında iştirakı insanlarda böyük ruh yüksəkliyi yaradıb. “Cənab Prezidentin Fərmanına uyğun olaraq həm Lənkəranda, həm də Masallıda kənd təsərrüfatı idarələrinin əsasında Dövlət Aqrar İnkişaf Mərkəzləri yaradılıb. Bu mərkəzlərin əsas işi aqrar sahədə “vahid pəncərə” prinsipinin tətbiqi, şəffaflığın artırılması, fermerlərlə əlaqələrin qurulmasıdır. Çox təqdirəlayiq haldır ki, Azərbaycanda kənd təsərrüfatı məhsullarının satışından əldə edilmiş hasilatın həcmi 10 il müddətinə vergidən azad olunur. “Büdcə sistemi haqqında” Azərbaycan Respublikasının Qanununda dəyişikliyə əsasən, növbəti ilin icmal büdcəsinin xərcləri müəyyən edilərkən inflyasiya səviyyəsinin nəzərə alınması da müsbət haldır. Və güman edirəm ki, qanundakı bu dəyişiklik kənd təsərrüfatına da şamil olunacaq”, - deyə millət vəkili qeyd edib.
“Onu da deyim ki, Lənkəranda və Qızılağacda balıqçılıq təsərrüfatları yaradıb onları inkişaf etdirmək üçün böyük imkanlar var. Azərbaycanda il ərzində adambaşına düşən balıq məhsullarından istifadə çəkisi 3-4 kq təşkil edir. Dədə-babadan Masallının dənizkənarı kəndlərinin - Qızılağac, Təzəkənd, Xıdmanlı, eləcə də Lənkəran dənizətrafında yaşayan camaatının çörəyi balıqçılıqdan - ovçuluqdan çıxıb. Sovet dövründə Nərimanabad qəsəbəsinin bir məhəlləsində balıq kombinatının işçiləri üçün yaşayış evləri tikildiyindən qəsəbə Balıqçılar adlandırılıb. Dediyim kimi, burada Balıq kombinatı, Lənkəranda isə balıq konserv zavodu vardı. Dənizə yaxın bu yerin ərazisi və köhnə müəssisənin binaları indi də qalmaqdadır. Orada minlərlə iş yeri var idi. Bu gün nəzərə alsaq ki, adi balıq növlərinin qiyməti bazarda satılan ətdən xeyli ucuzdur, onda bu sahəyə diqqət artırmaq lazımdır. Ona görə də Masallıda və Lənkəranda balıqçılıq təsərrüfatlarının yaradılması çox yaxşı olardı. Bu həm də regionda yüzlərlə yeni iş yerinin açılması deməkdir”, - deyə C.Paşazadə vurğulayıb.

Paylaş:

Baxılıb: 508 dəfə