Azərbaycan torpaqlarını tərk edən ermənilər təhlükəsiz şəkildə köçürlər

Bakı:

28 °C

50 %

10 m/s

Əlaqə

AZ RU EN

Ana səhifə / Siyasət / Azərbaycan torpaqlarını tərk edən ermənilər təhlükəsiz şəkildə köçürlər

Azərbaycan torpaqlarını tərk edən ermənilər təhlükəsiz şəkildə köçürlər

17.11.2020 [10:00]

Atəşə məruz qalmadan, rahatlıqla əşyalarını götürən ermənilərdən fərqli olaraq 1993-cü ildə azərbaycanlılar öz evlərindən zorakılıqla qovuldular
Ali Baş Komandan İlham Əliyevin yürütdüyü qətiyyətli və səmərəli siyasət, müzəffər ordumuzun əzmi istər hərb meydanında, istərsə də siyasi müstəvidə Azərbaycanın böyük qələbəsini təmin etdi. Məhz ordumuzun bu zəfər yürüşü işğalçı ölkənin təslimçi bəyanata imza atmasını şərtləndirdi. Xatırladaq ki, Azərbaycan və Rusiya Prezidentlərinin, Ermənistanın baş nazirinin imzaladığı birgə Bəyanata əsasən, Ermənistan silahlı qüvvələrinin birləşmələri Kəlbəcər, Laçın və Ağdam rayonlarının ərazilərini qeyd-şərtsiz tərk etməlidir. Kəlbəcər rayonu noyabrın 15-də Azərbaycanın nəzarətinə verilməlidir. Məlum olduğu kimi, erməni tərəfinin müraciətinə əsasən Azərbaycan dövləti növbəti dəfə humanizm nümayiş etdirərək bu müddəti noyabrın 25-dək uzadıb.
Vurğulamaq lazımdır ki, Azərbaycan dövləti beynəlxalq hüquqa əsaslanaraq öz ərazi bütövlüyünü təmin etməklə BMT Təhlükəsizlik Şurasının məlum qətnamələrinin icrasını həyata keçirib. Belə ki, Kəlbəcər rayonunun erməni işğalçıları tərəfindən azad olunması BMT Təhlükəsizlik Şurasının 822 saylı qətnaməsinin yerinə yetirilməsi deməkdir. Adıçəkilən qətnamədə bütün işğalçı qüvvələrin Kəlbəcər və Azərbaycanın digər işğal olunmuş rayonlarından dərhal çıxarılması tələb olunsa da, indiyədək bu öhdəliklər yerinə yetirilməmişdi. Məhz Azərbaycan Milli Ordusu 44 gün ərzində Azərbaycanın işğal altındakı torpaqlarının azad olunması ilə bağlı beynəlxalq sənədlərin icrasını təmin etdi.
İşğalçı qoşunlarla bərabər Azərbaycan torpaqlarında qeyri-qanuni məskunlaşdırılmış ermənilər də yaşadıqları əraziləri tərk edirlər
Vurğulanmalıdır ki, bu gün Kəlbəcəri tərk edənlər rayonun işğalçı qüvvələr tərəfindən zəbt olunmasından sonra orada qeyri-qanuni məskunlaşan ermənilərdir. BMT-nin və ATƏT-in müvafiq prinsiplərinə zidd olaraq 1999-cu ildən işğalçı Ermənistan Kəlbəcər ərazisində ermənilərin fəal məskunlaşdırılmasına başlayıb. Bununla bağlı Azərbaycan beynəlxalq təşkilatlara müraciətlər etsə də, işğalçı dövlət beynəlxalq hüququn prinsiplərini pozmaqda davam edib. Artıq ədalət öz yerini tapdı və işğalçı qoşunlarla bərabər Azərbaycan torpaqlarında qeyri-qanuni məskunlaşdırılmış ermənilər də yaşadıqları əraziləri tərk edirlər.
Erməni barbarlığı yenə də özünü göstərməkdədir - 27 il əvvəl Kəlbəcərdən qovulmuş azərbaycanlıların evlərində yaşayan ermənilər indi həmin evlərə od vuraraq gedirlər
Xüsusi qeyd edilməlidir ki, bu gün qeyri-qanuni yaşadıqları Azərbaycan torpaqlarını tərk edən ermənilər təhlükəsiz şəkildə köçürlər. Belə ki, onlar atəşə məruz qalmadan, rahatlıqla əşyalarını götürür, hətta evlərin dam örtüyü və unitazlarına qədər çıxarıb aparırlar. Hələ üstəlik yaşadıqları və yaşamadıqları evləri yandırır, meşələrə od vurur, vandallıq edirlər. Bir sözlə, erməni barbarlığı yenə də özünü göstərməkdədir - 27 il əvvəl Kəlbəcərdən qovulmuş azərbaycanlıların evlərində yaşayan ermənilər indi həmin evlərə od vuraraq gedirlər. Bir məqama xüsusi diqqət yetirmək lazımdır ki, bu gün Azərbaycan tərəfi Kəlbəcərdəki erməni hərbi birləşmələrinin ərazidən çıxması üçün humanitar qaydalara tam uyğun olaraq qabaqcadan razılaşdırılmış müddət ayırır. Lakin erməni tərəfi işğal zamanı bunların heç birini etməyib. Bu gün təhlükəsiz şəkildə və öz seçimi ilə ərazini tərk edən erməni əhalisindən fərqli olaraq, 1993-cü ildə rayonun azərbaycanlı əhalisi öz doğma yurdundan zorakılıqla qovuldu, dağ yolları ilə, ayaqyalın, piyada şəkildə erməni təcavüzkarlarından qaçıb xilas oldular. Onların bir çoxu qırğına məruz qaldı, atəşə tutuldu, meyitləri belə təhqir edildi. Nəticədə Kəlbəcərdə 500-dən artıq dinc sakin həlak oldu, yüzlərlə insan girov götürüldü və ya itkin düşdü. Azərbaycan əhalisi öz evlərindən heç nə götürə bilmədilər, sakinlərin bütün əmlakı erməni ordusu tərəfindən qarət olundu. Bu gün baş verənlər, ölkəmizin nümayiş etdirdiyi humanizm Azərbaycan və Ermənistan arasındakı fərqi anlamaq üçün də mühüm bir amildir.
Pərviz SADAYOĞLU

Paylaş:

Baxılıb: 565 dəfə