Qarabağdakı Rusiya sülhməramlılarının komandanı niyə dəyişdirildi?

Bakı:

27 °C

66 %

11 m/s

Əlaqə

AZ RU EN

Ana səhifə / Siyasət / Qarabağdakı Rusiya sülhməramlılarının komandanı niyə dəyişdirildi?

Qarabağdakı Rusiya sülhməramlılarının komandanı niyə dəyişdirildi?

12.01.2022 [10:05]

Rusiyanın Azərbaycanın Qarabağ bölgəsində müvəqqəti yerləşdirilmiş sülhməramlı kontingentinə yeni komandan təyin olunub. Rusiya Müdafiə Nazirliyinin yaydığı məlumata görə, bu vəzifəni general-mayor Andrey Volkov icra edəcək.

Komandanın dəyişdirilməsi planlaşdırılmış rotasiya çərçivəsində həyata keçirilir, işlərin qəbulu və təhvil verilməsi proseduruna başlanılıb. General-mayor A.Volkov Qarabağdakı sülhməramlılara general-leytenant Rüstəm Muradovun rəhbərlik etdiyi vaxtlarda - 2020-ci ilin noyabrından 2021-ci ilin may ayına kimi kontingentin komandir müavini olub. Hazırda Volkov Rusiya Müdafiə Nazirliyinin Cənub Hərbi Dairəsinin qoşun hissəsinin rəisidir.

Xatırladaq ki, 2021-ci ilin sentyabrından bəri Rusiyanın Qarabağdakı sülhməramlı kontingentinin komandanı vəzifəsini general-leytenant Gennadi Anaşkin tuturdu. Bəs sülhməqamlı qüvvələrin komandanının dəyişməsinin mövcud vəziyyətə hansısa təsiri ola bilərmi? Məsələ ilə bağlı politoloq Yalçın Hacızadə qəzetimizə açıqlamasında bildirib ki, Vətən müharibəsində əldə etdiyimiz qələbədən sonra Azərbaycan, Ermənistan və Rusiya dövlət başçılarının imzaladığı ?çtərəfli Bəyanata əsasən Rusiya sülhməramlı qüvvələri müvəqqəti olaraq torpaqlarımızda yerləşdirildi. Həmin bəyanatın imzalanmasından 15 aya yaxın vaxt keçsə də, sülhməramlıların bir neçə komandanı dəyişilib. Verilən məlumata görə bunlar rotasiya qaydasında həyata keçirilsə də hesab edirəm ki, bur?da başqa faktorlar da var. Politoloqun sözlərinə görə, üçtərəfli Bəyanata əsasən Rusiya sülhməramlıları müvəqqəti yerləşdiyi ərazidə sülhü təmin etməli, ərazidə yerləşmiş erməni silahlı qüvvələrini çıxartmalı, Laçın koridorunda nəzarət buraxılış fəaliyyətini təmin etməlidirlər: “Amma təəssüflər olsun ki, biz bunların şahidi olmadıq. Keçən bu müddət ərzində dəfələrlə erməni silahlı qüvvələri tərəfindən atəşkəs pozulub, Azərbaycan ərazilərinə silahlı basqın edilib, hərbi qüvvələrimiz şəhid edilib, hüquqi torpaqlarımıza Azərbaycanın razılığı olmadan erməni və digər ölkələrin rəsmi şəxsləri buraxılıb. Hətta bir neçə gün bundan əvvəl Rusiya rəsmisi qanunsuz olaraq sülhməramlıların müvəqqəti yerləşdiyi ərazimizə səfər etdiyini gördük. Azərbaycan Prezidenti İlham Əliyev də rəsmi şəkildə bununla bağlı Rusiyaya etirazını bildirmişdir. Sülhməramlıların rəhbərinin son dəyişikliyini mən daha çox bununla əlaqələndirirəm”.

Həmsöhbətimiz hesab edir ki, təyin olunan yeni komandan Rusiya ilə əldə olunmuş razılığa uyğun fəaliyyət göstərməli, müvəqqəti yerləşdikləri ərazidən Azərbaycan Silahlı Qüvvələrinin atəşə tutulmasının, həmin ərazilərə qanunsuz səfərlərin qarşısını almalı, erməni silahlı qüvvələri ərazidən çıxarılmalıdır: “Bununla bağlı heç bir bəhanə qəbul edilə bilməz. Çünki sülhməramlılar öz ölkələrinin prezidenti səviyyəsində qəbul edilmiş razılaşmanın şərtlərini yerinə yetirməyə məcburdurlar və Azərbaycan dövləti onların razılaşmadan kənar fəaliyyətlərini qəbul etməyəcəklərini bilməlidirlər”.

Nardar BAYRAMLI

Paylaş:

Baxılıb: 917 dəfə