“Xüsusi nümayəndələr” xüsusi statusa malik deyillər

Bakı:

22 °C

88 %

4 m/s

Əlaqə

AZ RU EN

Ana səhifə / Siyasət / “Xüsusi nümayəndələr” xüsusi statusa malik deyillər

“Xüsusi nümayəndələr” xüsusi statusa malik deyillər

23.04.2022 [10:24]

Azərbaycan istədiyi an Türkiyəni də prosesə qoşa bilər

Pərviz İSMAYILOV

Uzun illər Ermənistan - Azərbaycan münaqişəsinin tənzimlənməsi prosesində “vasitəçi” qismində çıxış edən Minsk Qrupunun dağılmasının ardından yeni bir “format” meydana çıxmaqdadır. Daha doğrusu, həmsədr ölkələr öz nümayəndələrinə “xüsusi nümayəndə” statusu verməklə yenidən prosesdə iştirak etmək arzularını nümayiş etdirirlər. Məsələn, ləğv olunmuş qrupun rusiyalı həmsədri İqor Xovayev artıq Rusiyanın xarici işlər nazirinin Azərbaycanla Ermənistan arasında münasibətlərin normallaşmasına yardım üzrə xüsusi nümayəndəsi, onun fransalı həmkarı Bris Rokfeyl isə Fransa XİN-in Şərq tərəfdaşlığı üzrə xüsusi nümayəndəsi kimi təqdim olunur. Amerikalı həmsədr Endryu Şoferin regiona səfəri isə ABŞ-ın Qafqazda danışıqlar üzrə baş müşaviri qismində reallaşdı. Bu isə onu deməyə əsas verir ki, Ukrayna böhranı səbəbilə bir masa arxasında oturmaqdan imtina edən keçmiş həmsədrlər xüsusi nümayəndə statusu ilə prosesdə yenidən “iştirak etmək niyyətindədir”. Bəs bunun hüquqi əsası varmı? Nəzərə alsaq ki, bu dövlətlər illərlə işğalçı Ermənistanın maraqlarını daha çox qoruyublar, Azərbaycan qardaş Türkiyənin də prosesdə eyni statusla iştirakını təmin edə bilərmi?

Bununla bağlı qəzetimizə fikirlərini bölüşən politoloq Yeganə Hacıyeva bildirib ki, Minsk qrupu 30 ilə yaxın faktiki olaraq münaqişəni dondurmaq, status-kvonu saxlamaq üçün çalışıb. Torpaqlarımızın II Qarabağ müharibəsi ilə azad olunması ATƏT-in missiyasını faktiki olaraq sona yetirdi: “Ukrayna müharibəsindən sonra ABŞ-ın Minsk qrupu formatında olsa belə Rusiya ilə birgə fəaliyyətdən imtina etməsinin şahidi olduq. Hazırki xüsusi nümayəndələrə gəldikdə isə, bu fərqli məsələdir. Bu şəxslər sırf öz ölkəsinin xarici siyasəti çərçivəsində fəaliyyət göstərəcəklər. Artıq birgə format yoxdur. Digər tərəfdən, kiminsə xüsusi nümayəndə elan edilməsi ona Azərbaycana və ya Ermənistana təsir etmək kimi hər hansı bir səlahiyyət vermir. Xüsusi nümayəndəlik institutu təktərəfli qaydada qəbul edilir. Bu üç xüsusi nümayəndə heç bir halda Minsk qrupu formatı çərçivəsindəki üçlü format demək deyil. Onların səlahiyyəti fikirlərinin ifadəsi çərçivəsindədir. Fikrimcə, xüsusi nümayəndələrə ehtiyac da yoxdur. Onsuz da həmin ölkələrin xarici işlər nazirləri və ya nümayəndələri bu işi yerinə yetirirlər. Bunun üçün xüsusi bir nümayəndənin təyinatı mənasız görünür”.

Türkiyənin də xüsusi nümayəndə təyin etmək imkanlarına gəldikdə isə, Y.Hacıyeva bildirib ki, Azərbaycanın istəyi olarsa, bu mümkündür. “Bu bizim, eynilə də Türkiyənin haqqıdır. Amma bunun da hansısa bir beynəlxalq sənədlə tənzimlənməsi lazımdır. Daha doğrusu, Azərbaycan həmin ölkələr tərəfindən təyin olunan xüsusi nümayəndəni təsdiqləməli, ona mandat verməlidir. Azərbaycan bu gün üçün bu mandatı heç kimə verməyib. Bu üç ölkənin xüsusi nümayəndə təyin etməsi heç nəyi dəyişdirmir”, - deyə Y.Hacıyeva əlavə edib.

Paylaş:

Baxılıb: 1514 dəfə

Xəbər lenti

Hamısına bax