BMT-nin Əhali Fondu Ermənistanın törətdiyi vandalizmə münasibət bildirməlidir!

Bakı:

22 °C

53 %

2 m/s

Əlaqə

AZ RU EN

Ana səhifə / Siyasət / BMT-nin Əhali Fondu Ermənistanın törətdiyi vandalizmə münasibət bildirməlidir!

BMT-nin Əhali Fondu Ermənistanın törətdiyi vandalizmə münasibət bildirməlidir!

27.01.2023 [10:12]

Beynəlxalq hüquq normalarına zidd bəyanat verməklə öz imicinə xələl gətirir

N.BAYRAMLI

BMT-nin Əhali Fondu Laçın yolu ətrafında yaranmış vəziyyətlə bağlı qərəzli və təşkilatın mandatına aid olmayan bəyanat verib. Artıq Azərbaycanın Xarici İşlər Nazirliyi bu məsələyə münasibət bildirib. Nazirliyin Mətbuat xidməti idarəsinin şərhində qeyd olunub ki, Ermənistanın Azərbaycana qarşı hərbi təcavüzü nəticəsində 30 il ərzində öz evlərindən didərgin düşmüş, illərlə çadır şəhərciklərində, atılmış qatar vaqonlarında, düşərgələrdə heç bir sağlamlıq şəraiti olmayan mühitdə yaşamış, təhsil, səhiyyə və bütün digər hüquqlardan məhrum olmuş yüz minlərlə azərbaycanlı ailənin acınacaqlı vəziyyətinə münasibət bildirməyən BMT-nin Əhali Fondunun azərbaycanlıların legitim etirazlarına dair bəyanat verməsi qəbuledilməzdir. Azərbaycanın təbii sərvətlərinin qanunsuz istismarının, bu sərvətlərin Azərbaycandan Ermənistana daşınması və yalnız humanitar məqsədlər üçün nəzərdə tutulmuş Laçın yolundan sui-istifadə hallarının qarşısının alınması tələbi ilə Azərbaycanın suveren ərazisi olan Laçın yolunda dinc etirazlar Azərbaycan xalqının legitim hüququdur. Erməni sakinlərin kompakt yaşadığı Azərbaycan ərazilərində qeyri-qanuni fəaliyyətlər Azərbaycanın milli təhlükəsizliyinə hədədir və belə qanunsuz fəaliyyətlərə son qoyulması zəruridir. Bu xüsusda, 2020-ci il 10 noyabr tarixli üçtərəfli Bəyanata uyğun olaraq, Azərbaycan Respublikası Laçın dəhlizi üzrə hər iki istiqamətdə vətəndaşların, nəqliyyat vasitələrinin və yüklərin hərəkətinə təhlükəsizlik zəmanəti verir. Təhlükəsizlik zəmanəti, həmçinin Laçın yolundan sui-istifadənin qarşısının alınmasını ehtiva edir.

Xarici İşlər Nazirliyinin son bir ay ərzində verdiyi bəyanatlarda qeyd edildiyi kimi, Laçın yolunda nəqliyyat vasitələrinin və sakinlərin hərəkətinə etirazçılar tərəfindən heç bir maneə tətbiq edilmir və guya etirazların bölgədə “humanitar fəlakət” yaratdığı barədə iddialar əsassızdır. Etirazlar başlayan gündən yoldan istifadə etməklə sayı 1000-dən çox nəqliyyat vasitəsi ilə sakinlərin istifadəsi üçün gündəlik tədarük malları, tibbi ləvazimatlar və zəruri tibbi xidmətlər təmin olunub. Azərbaycan hökuməti, həmçinin erməni sakinlərinin üzləşə biləcəyi bütün humanitar ehtiyacları operativ şəkildə həll etməyə hazır olduğunu dəfələrlə bəyan edib. Bütün bunlara baxmayaraq, özlərini erməni sakinlərin “liderləri” kimi təqdim edən şəxslər öz qanunsuz fəaliyyətlərini davam etdirmək məqsədilə yerli əhalidən sipər kimi istifadə etməkdə davam edir və onların hərəkət azadlığına mane olurlar. Qeyd edilənlərlə əlaqədar, XİN BMT-nin Əhali Fondunu qərəzsiz olmağa və təşkilatın nüfuzuna xələl gətirəcək hərəkətlərdən və açıqlamalardan çəkinməyə çağırıb.

Mövzu ilə bağlı qəzetimizə açıqlama verən Milli Məclisin deputatı Ramil Həsən bildirib ki, BMT-nin Əhali Fondunun bəyanatı təşkilatın ikili standartlardan çıxış etdiyini göstərir. Erməni lobbisinin təsiri ilə qəbul olunmuş bəyanatda Laçın-Xankəndi yolu ətrafında baş verən hadisələr təhrif olunur. O, əslində həmin bəyanatın qəbul edilməsinin təşkilatın prinsiplərinə zidd olduğunu deyib: “Çünki təşkilatın özünün qəbul etdiyi bir çox sənədlərdə, eləcə də fəaliyyət prinsiplərində beynəlxalq hüququn normaları əsas götürülür. Lakin bu günlərdə Laçın yolu ilə bağlı qəbul edilmiş bəyanatda isə beynəlxalq hüquq normaları ayaq altına atılır. Nəzərə almaq lazımdır ki, aksiyanın keçirildiyi yer Azərbaycanın suveren ərazisidir və dinc xarakter daşıyır. Sərbəst toplaşmaq azadlığı fundamental insan hüquqlarından biridir və bu, beynəlxalq institutların təşviq etdiyi əsas məsələlərdəndir. Laçın yolunda da ekoloqlarımız, ictimai fəallarımız dinc etiraz aksiyası keçirirlər. Amma nədənsə bəzi dairələr onların bu hüquqlarını görməzdən gəlirlər. Bu, o deməkdir ki, beynəlxalq təşkilatlar üçün artıq heç bir dəyər yoxdur. Yalnız, öz siyasi maraqlarını güdərək beynəlxalq hüququ pozurlar”.

Millət vəkili hesab edir ki, Ermənistanın və Qarabağ separatçılarının humanitar böhran və blokada iddiası tamamilə yalandır. Bunu təsdiq edən kifayət qədər videofaktlar var. Amma görünən odur ki, ermənipərəst dairələr hər vəchlə beynəlxalq ictimaiyyəti aldatmağa çalışırlar. BMT-nin Əhali Fondunun bəyanatı da bu yanlış məqsədə xidmət edir. Beynəlxalq hüquqa zidd olan bu bəyanatın heç bir hüquqi qüvvəsi yoxdur və kağız parçasından başqa bir şey deyil. Azərbaycanın mövqeyi doğrudur və beynəlxalq hüquqa əsaslanır. Eləcə də Azərbaycan güclü dövlətdir və heç kim onunla diktə dilində danışa bilməz.

Həmsöhbətimiz hesab edir ki, həmin təşkilat öz mandatına uyğun şəkildə fəaliyyət göstərməlidir: “Ermənistanın 30 illik işğalı dövründə ərazilərimizin böyük hissəsində bütün yaşayış məntəqələri yer üzündən silinib, həmin ərazilərdə yaşamış əhali isə məcburi köçkün vəziyyətinə düşüb. Bu əhalinin sayı 1 milyondan çoxdur. Vətən müharibəsində torpaqlarımız işğaldan azad edilsə də, həmin əhali öz yurdlarına qayıda bilmir. Çünki erməni işğalçıları həmin torpaqlarda daşı-daş üstə qoymayıb. Həm də, bu ərazilər kütləvi şəkildə minalanıb. Yaxşı olardı ki, BMT-nin Əhali Fondu Ermənistanın törətdiyi bu vandalizmə münasibət bildirsin. Amma bu barədə susur, əvəzində isə verdiyi bəyanatla özünün ikiüzlü mahiyyətini ortaya qoyur. Əslində, bu cür qərəzli bəyanatlar verməklə həmin təşkilat öz imicinə xələl gətirir”.

Paylaş:

Baxılıb: 607 dəfə