YAP-ın gənc üzvləri özlərini idman sahəsində də təsdiq edirlər

Bakı:

11 °C

82 %

4 m/s

Əlaqə

AZ RU EN

Ana səhifə / Siyasət / YAP-ın gənc üzvləri özlərini idman sahəsində də təsdiq edirlər

YAP-ın gənc üzvləri özlərini idman sahəsində də təsdiq edirlər

05.05.2011 [09:43]

YAP Gənclər Birliyinin və ARDNŞ-in “Neftçi” İdman Sağlamlıq Mərkəzinin birgə təşkilatçılığı ilə ümummilli liderimiz Heydər Əliyevin anadan olmasının 88-ci ildönümü münasibətilə keçirilən mini-futbol turniri başa çatıb
Dünən Yeni Azərbaycan Partiyası Gənclər Birliyinin və ARDNŞ-in “Neftçi” İdman Sağlamlıq Mərkəzinin birgə təşkilatçılığı ilə ümummilli liderimiz Heydər Əliyevin anadan olmasının 88-ci ildönümü münasibətilə keçirilən mini-futbol turniri başa çatıb.
Xatırladaq ki, turnirdə YAP-ın Bakı şəhəri üzrə 11 rayon və Abşeron rayon təşkilatlarının gənclər birliklərinin komandaları iştirak edib. Turnirdə iki qrup olmaqla hər qrupda 6 komanda yarışıb.
Dünən final oyununda YAP-ın Nizami rayon təşkilatı və Abşeron təşkilatının gənclər birliklərinin komandaları mübarizə aparıblar. Maraqlı mübarizə şəraitində keçən oyunda YAP Nizami rayon təşkilatı Gənclər Birliyinin komandası rəqibi üzərində 3-0 hesabı ilə qələbə qazanaraq turnirin qalibi olub.
Oyundan sonra turnirdə birinci, ikinci və üçüncü yeri qazanmış komandaların mükafatlandırılması mərasimi keçirilib. Mərasimdə qalibləri təbrik edən YAP Sədrinin müavini-İcra katibi, millət vəkili Əli Əhmədov bildirib ki, Azərbaycan xalqı hər il ümummilli liderimiz Heydər Əliyevin doğum gününü yüksək təntənə ilə qeyd edir. Onun sözlərinə görə, Ulu öndərimizin doğum gününə həsr olunmuş tədbirlər sırasında YAP Gənclər Birliyinin təşkil etdiyi mini-futbol turniri xüsusi yer tutur. “ümummilli liderimiz Heydər Əliyev həmişə idmana böyük önəm verirdi. İdmanı gənclərimizin sağlam həyat tərzi ruhunda böyüməsi üçün vacib şərtlərdən biri sayırdı. Azərbaycan gəncliyi Heydər Əliyev siyasətinə həmişə sadiq olduğunu isbat edib. Bu mini-futbol turnirində də YAP Gənclər Birliyinin üzvlərinin yüksək fəallıq nümayiş etdirməsi onu göstərir ki, bizim gənclərimiz Heydər Əliyev siyasətinə özlərinin böyük hörmət və ehtiramını nümayiş etdirir” - deyə, YAP Sədrinin müavini vurğulayıb.
Azərbaycanın sürətlə inkişaf etdiyİni, yeniləşdiyİni deyən Əli Əhmədovun sözlərinə görə, Prezident İlham Əliyevin həyata keçirdiyi siyasət öz bəhrələrini verməkdədir. “Təbii ki, ölkəmizin inkişafını bütövlükdə səciyyələndirən təkamülün müxtəlif istiqamətləri və formaları içərisində Azərbaycanda idmanın inkişafını da ayrıca qeyd etmək lazımdır. İndi Azərbaycanda müxtəlif səviyyəli beynəlxalq yarışlar keçirilir, ölkəmizin idmançıları dövlətimizin şərəfini dünya səviyyəli yarışlarda layiqincə qoruyurlar. YAP da ölkəmizin inkişafından, Prezident İlham Əliyevin həyata keçirdiyi siyasətin uğurlarından ruhlanaraq bu inkişafa öz dəstəyini vermək üçün fədakarlıq nümayiş etdirir. YAP-ın ölkəmizin ictimai-siyasi həyatında iştirakı ilə yanaşı, partiyamızın sıralarında olan hər bir vətəndaş, o cümlədən, gənclər də Prezident İlham Əliyevin həyata keçirdiyi inkişaf siyasətinin reallaşmasına öz töhfələrini verirlər. Eynilə də, YAP-ın gənc idmançıları Azərbaycanın inkişafının təbliğində fəal iştirak edirlər. Ulu öndər Heydər Əliyevin doğum günü ərəfəsində keçirilən bu mini-futbol yarışı buna əyani misaldır” - deyə, YAP Sədrinin müavini vurğulayıb.
Əli Əhmədov final yarışının çox maraqlı olduğunu da qeyd edib: “Turnirin final oyununu izlədik və bu oyun göstərdi ki, YAP-ın gənc üzvlərinin sırasında kifayət qədər peşəkar futbolçular yetişib. Bu da onu sübut edir ki, YAP-ın gəncləri ölkəmizin ictimai-siyasi həyatında olduğu kimi, idman sahəsində də yetişmiş insanlar olublar. Əminəm ki, bu idman yarışı ədalətli keçirildi. Sözün həqiqi mənasında layiqli komanda oyunda qalib adına sahib çıxdı. Partiyamızın Nizami və Abşeron rayon təşkilatları gənclər birliklərinin komandaları da artıq yetişmiş futbolçular kimi yarışda iştirak etdilər. Biz çox maraqlı idman yarışının şahidi olduq. ümumiyyətlə, bu turnirin Ulu öndər Heydər Əliyevin doğum gününə həsr olunması çox əhəmiyyətli hadisədir. Hesab edirəm ki, növbəti illərdə də YAP Gənclər Birliyi müxtəlif turnirlər, yarışlar keçirəcək”.
Əli Əhmədov turnirin keçirilməsində verdiyi dəstəyə görə ARDNŞ-in “Neftçi” İdman Sağlamlıq Mərkəzinin kollektivinə, eləcə də, zəhməti olan hər kəsə təşəkkür edib.
Daha sonra turnirdə ilk üçlüyü qazanmış YAP-ın Nizami rayon təşkilatı Gənclər Birliyi (1-ci yer), Abşeron rayon təşkilatı Gənclər Birliyi (2-ci yer) və Sabunçu rayon təşkilatı Gənclər Birliyinin (3-cü yer) komandaları kubok, diplom və qiymətli hədiyyələrlə mükafatlandırılıblar. Həmçinin, turnirin keçirilməsində əməyi olan şəxslər də mükafatlara layiq görülüblər.
Tədbirdə YAP İcra katibinin müavinləri Siyavuş Novruzov və Mübariz Qurbanlı, Suraxanı rayon İcra Hakimiyyətinin başçısı İlqar Abasov, YAP Gənclər Birliyinin sədri Seymur Orucov iştirak ediblər.
Nardar BAYRAMLI

Paylaş:

Baxılıb: 967 dəfə