Ermənistanın iddiaları əsassızdır

Bakı:

21 °C

60 %

5 m/s

Əlaqə

AZ RU EN

Ana səhifə / Siyasət / Ermənistanın iddiaları əsassızdır

Ermənistanın iddiaları əsassızdır

15.07.2023 [10:10]

Blinkenin zəngi və Avropa Məhkəməsinin cavabı bunu sübut etdi

Nardar BAYRAMLI

Ermənistanın Azərbaycana qarşı beynəlxalq instansiyalarda qaldırdığı əsassız iddialar fiaskoya uğrayır. Bu dəfə İnsan Hüquqları üzrə Avropa Məhkəməsi Rəsmi İrəvanı “məyus” edib. Belə ki, 2023-cü il 12 iyul tarixində İnsan Hüquqları üzrə Avropa Məhkəməsi müvəqqəti təmin tədbirlərinin tətbiqi ilə bağlı “Ermənistan Azərbaycana qarşı” məhkəmə işi üzrə Ermənistanın 2023-cü il 21 iyun tarixli tələbini tamamilə rədd edib. Bu barədə Azərbaycan Respublikasının İnsan Hüquqları üzrə Avropa Məhkəməsi yanında səlahiyyətli nümayəndəsi, Ali Məhkəmənin sədr müavini Çingiz Əsgərov bildirib. Beləliklə, Avropa Məhkəməsi Ermənistanın sərhəd nəzarət buraxılış məntəqəsinin aradan qaldırılması ilə bağlı tələbinin əsassız olduğuna dair qərar qəbul edib. Avropa Məhkəməsi nəzarət-buraxılış məntəqəsinin Laçın yolu boyunca hərəkətə mane olduğunu və Azərbaycanın 2022-ci ilin 21 dekabr tarixli Qərarını pozduğunu müəyyən etməyib.

Ermənilər Blinkenin fikirlərini təhrif edirlər

Xatırladaq ki, iyulun 12-də ABŞ Dövlət katibi Antoni Blinken də Azərbaycan Prezidenti İlham Əliyevlə telefon danışığı zamanı Laçın sərhəd-gömrük buraxılış məntəqəsi vasitəsilə keçidin önəmini vurğulayıb. Bütün bunlar Ermənistanın ölkəmizə qarşı əsassız iddialarının iflasa uğradığını göstərir. Mövzu ilə bağlı qəzetimizə açıqlama verən “Bakı Xəbər” qəzetinin baş redaktoru Aydın Quliyev bildirib ki, ABŞ Azərbaycanla Ermənistan arasında normallaşma prosesinin sülh sazişi ilə sonlandırmağa çalışır. A.Blinkenin ifadə etdiyi mövqe də bu qənaətə gəlməyə əsas verir. Onun fikrincə, əslində ABŞ Dövlət katibi artıq sülh sazişinin imzalanmasının zamanının yetişdiyini və bunun üçün lazımi olan şəraitin mövcud olduğunu ifadə etmək istəyib: “Təbii ki, bu da Ermənistanın xoşuna gəlmir. Çünki İrəvan sülh sazişinin tezliklə imzalanmasında maraqlı deyil. Erməni mediası Azərbaycan Prezidentinin Blinkenlə telefon söhbətində bir məqamın üstündən keçir. Onlar Prezident Əliyevə Dövlət katibi Blinkenin telefon zəngi barədə məlumatlardan bir nüansı öz xeyirlərinə yozmağa çalışırlar. Ermənilərin çox “stavka” etdiyi məqam budur ki, Blinken Laçın yolunda nəqliyyat vasitələrinin sərbəst hərəkətinin təmin olunmasının vacibliyini vurğulayıb. Bəs Blinkenin Laçın yolunda “KPP” ilə bağlı dediklərini niyə görməzlikdən gəlirlər? Məlumdur ki, Blinken Prezident İlham Əliyevlə söhbətində “Laçın yolunda sərhəd-gömrük buraxılış məntəqəsinin daşımalarda önəmli rol oynadığını” xüsusi vurğulayıb. Bilirsinizmi bu nə deməkdir? O deməkdir ki, ABŞ Laçın yolunda “KPP”ni qanuni olaraq tanıyır. Bu faktın Avropa Məhkəməsinin “KPP”nin ləğv edilməsi barədə Ermənistanın iddiasına 12 iyul tarixli qəti rədd cavabı ilə bir vaxta düşməsi ermənilərin belini sındırır”.

A.Quliyev qeyd edib ki, erməni tərəfi Blinkenin dediyi fikirləri özlərinə sərf olunan formada təqdim edir: “Bu da Laçın yolun açılması ilə bağlı çağırışdır. Əslində, Azərbaycan da yolun açılmasının əleyhinə deyil. Əgər ermənilər qaydalara əməl edəcəklərsə, nəqliyyat vasitələrinin gediş-gəlişi humanitar xarakter daşıyacaqsa bu, təmin edilə bilər. Amma Ermənistan Laçın yolundan yoxlanılmamış nəqliyyat vasitələrinin intensiv hərəkətinin təmin olunmasına çalışır. Bütün bunların fonunda A.Blinkenin fikirləri çox əhəmiyyətlidir”.

Avropa Məhkəməsinin qərarı beynəlxalq hüququn təntənəsidir

Ermənistanın Laçın dəhlizi ilə bağlı beynəlxalq məhkəmələrdə Azərbaycana qarşı iddialar qaldırmasına gəlincə, həmsöhbətimiz hesab edir ki, həm Avropa Məhkəməsinin, həm də Blinkenin mövqeyi o deməkdir ki, Ermənistanın bu məsələdə iddiaları tam iflasa uğrayıb. A.Quliyevin sözlərinə görə, beynəlxalq məhkəmələr Azərbaycanın maraqlarına zidd qərarlar verməyib: “Avropa Məhkəməsi ilk dəfə fevral ayında qərar çıxarmışdı. Hansı ki, Ermənistan Laçın yolunda ekofəalların etiraz aksiyasını Qarabağda yaşayan ermənilərin “soyqırımı” kimi təqdim etməyə çalışırdı. Ona görə də, məhkəmədən müvafiq tədbirlər görülməsini istəmişdi. Lakin məhkəmə isə qərar verdi ki, bu məsələnin soyqırımı ilə bağlı heç bir əlaqəsi yoxdur. İyunun 15-də Ermənistan tərəfinin Laçın postunu atəşə tutması nəticəsində bir hərbi qulluqçumuz yaralandı. Bu hadisə ilə bağlı istintaq tədbirləri həyata keçirildiyi üçün nəzarət-buraxılış məntəqəsindən gediş-gəliş məhdudlaşdırıldı. Buna görə Ermənistan yenidən dövlətimizi məhkəməyə verdi. Avropa Məhkəməsinin son qərarı da rəsmi İrəvanın iddialarının nəticə vermədiyini göstərdi. Çünki dövlət sərhədində nəzarət-buraxılış məntəqəsi yaratmaq və onun fəaliyyətini tənzimləmək Azərbaycanın suveren hüququdur. Məhkəmə qərarları Ermənistanın iddialarının əksinə olduğuna görə, beynəlxalq hüququn təntənəsi hesab oluna bilər. Eyni zamanda, Ermənistan bir daha Laçın sərhəd nəzarət-buraxılış məntəqəsi ləğv olunsun deyə tələb qoya bilməyəcək, qoysa da heç kim ona əhəmiyyət verməyəcək”.

Paylaş:

Baxılıb: 551 dəfə