Kəlbəcər və Laçını birləşdirən yeni yol

Bakı:

13 °C

54 %

13 m/s

Əlaqə

AZ RU EN

Ana səhifə / Sosial / Kəlbəcər və Laçını birləşdirən yeni yol

Kəlbəcər və Laçını birləşdirən yeni yol

06.06.2025 [09:57]

İkinci Qarabağ müharibəsində işğaldan azad edilmiş ərazilərə həyat yenidən qayıdır. Prezident İlham Əliyevin postmüharibə dövründə bəhs olunan ərazilərə tez-tez baş tutan səfərləri çərçivəsində dövlətimizin başçısının yeni infrastruktur obyektlərinin, sənaye müəssisələrinin, aqroparkların, yaşayış məntəqələrinin açılış və yaxud təməlqoyma tədbirlərinə qatılması da artıq ənənə halını alıb. Bu baxımdan dövlətimizin başçısının işğaldan azad olunmuş ərazilərə 28 May - Müstəqillik Günü ərəfəsində etdiyi son səfəri də istisna olmayıb. Səfər çərçivəsində Azərbaycan Prezidenti İlham Əliyev və Türkiyə Prezidenti Rəcəb Tayyib Ərdoğan mayın 28-də Kəlbəcər-Laçın avtomobil yolunda görülən tikinti işləri ilə tanış olublar.

Əsas prioritetlərdən biri: Müasir yol infrastrukturu quruculuğu

İşğaldan azad edilmiş ərazilərin bərpası proqramı çərçivəsində burada müasir yol-nəqliyyat infrastrukturunun qurulması əsas prioritetlərdən biri kimi müəyyənləşdirilib ki, bu da təsadüfi deyil. Müasir yol-nəqliyyat infrastrukturu olmadan bəhs olunan ərazilərə soydaşlarımızın geri qayıtmalarını təmin etmək, burada iqtisadi fəallığa nail olmaq, ölkənin digər bölgələri ilə əlaqələr qurmaq, iqtisadi reinteqrasiya məsələlərini həll etmək mümkün deyil. Azərbaycanın işğaldan azad edilmiş ərazilərə həyatı qaytarmaqla bağlı planları genişdir. O cümlədən bəhs olunan ərazilərin turizm potensialı kifayət qədər böyükdür. Bu potensialdan bəhrələnmək üçün, ilk növbədə, yaxşı yollar olmalıdır.

Digər bir amilə də diqqət yetirək. Məlum olduğu kimi, işğaldan azad edilmiş ərazilər dağlıq relyefə malikdir. Yol olmadığına görə Kəlbəcərin, Laçının bir sıra yaşayış məntəqələrinə qış aylarında getmək mümkün deyil. Bərpa proqramı çərçivəsində layihələndirilən yeni yollar işğaldan azad olunmuş ərazilərə qış aylarında da rahat gediş-gəlişi təmin etmək məqsədi daşıyır. Bir sözlə, işğaldan azad olunmuş ərazilərdə müxtəlif istiqamətlərdə çəkilən yollar həm iqtisadi, həm də hərbi və sosial baxımdan böyük önəm daşıyır.

Reallaşdırılan çoxsaylı yol layihələri

İşğaldan azad edilən ərazilərdə avtomobil yollarının inşası ilə bağlı həyata keçirilən layihələrin sayı da kifayət qədər çoxdur. Hazırda “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı”, həmçinin dövlət başçısı tərəfindən imzalanmış sərəncamlar əsasında, işğaldan azad olunmuş ərazilərdə yol infrastrukturun bərpası məqsədilə Azərbaycan Avtomobil Yolları Dövlət Agentliyi (AAYDA) tərəfindən ümumi uzunluğu 3 min 382,6 km təşkil edən 45 avtomobil yolunun layihələndirilməsi və tikintisi işləri davam etdirilir. Agentlik tərəfindən indiyədək sözügedən layihələrdən ümumi uzunluğu 315,9 km təşkil edən 7 avtomobil yolunun tam, 1 layihənin tikintisi qismən (39.7 km-lik Şükürbəyli-Cəbrayıl-Hadrut avtomobil yolunun 24.2 km-lik hissəsi) yekunlaşdırılıb. O cümlədən Tərtər-Suqovuşan-Talış avtomobil yolu (28,5 km), “Zəfər Yolu” (101 km), Laçın şəhərinə daxil olmadan yeni alternativ avtomobil yolu (22 km), Talış-Tapqaraqoyunlu-Qaşaltı sanatoriyası avtomobil yolu (22 km), Bərdə-Ağdam avtomobil yolu (44,5 km), Füzuli-Hadrut avtomobil yolu (12,3 km), Hacıqabul-Bəhramtəpə-Mincivan-Ermənistan ilə dövlət sərhədi avtomobil yolunun 173,6-235 km-lik hissəsi (61,4 km) inşası başa çatdılıb. Eyni zamanda, bir sıra yol layihələrinin tikintisi cari ilin sonunadək tamamlanacaq. Həmçinin Dövlət Proqramına uyğun olaraq, agentlik tərəfindən 8 şəhərin - Şuşa, Ağdam, Füzulu, Qubadlı, Zəngilan, Kəlbəcər, Cəbrayıl və Laçının daxili yollarının tikintisi işləri də icra olunur. Bundan əlavə, Azərbaycan Prezidentinin sərəncamına əsasən, 8 kəndə gedən avtomobil yollarının və 6 rayonlararası avtomobil yollarının tikintisi işləri aparılır:

İşğaldan azad edilmiş ərazilərdə icra olunan avtomobil yolları üzərində tikilən tunellərin ümumi uzunluğu 70,8 km (45 tunel), körpülərin ümumi uzunluğu- 9581,6 m (447 körpü), viadukların ümumi uzunluğu 3871 m (16 viaduk) təşkil edir. İndiyədək uzunluğu 59,6 km təşkil edən 28 tunelin, uzunluğu 8339,1 metr təşkil edən 392 körpünün və uzunluğu 1695 metr olan 9 viadukun tikintisi başa çatıb.

Uzunluğu 75,8 kilometr olan Kəlbəcər-Laçın avtomobil yolu

Bəhs olunan səfər çərçivəsində Prezident İlham Əliyevlə Prezident Rəcəb Tayyib Ərdoğanın tikintisi ilə tanış olduqları Kəlbəcər-Laçın avtomobil yolu dövlətimizin başçısının tapşırığına əsasən, Qarabağ və Şərqi Zəngəzur iqtisadi rayonları ərazisində icra edilən mühüm əhəmiyyətə malik yol infrastrukturu layihələrindən biridir . Onun uzunluğu 75,8 kilometrə bərabərdir.

Başlanğıcını Kəlbəcər rayonunun Qamışlı kəndindən götürməklə Laçın rayonunun ərazisindən keçən və bu iki rayonu birləşdirən yol 2, 3 və 4 hərəkət zolaqlı olacaq. Yolboyu tikintisi nəzərdə tutulmuş 17 avtomobil tunelindən 16-da tikinti işləri uğurla davam etdirilir, birinin isə layihələndirilməsi aparılır.

Uzunluğu 126 kilometr olan mövcud Kəlbəcər-Laçın avtomobil yolunun yeni layihəyə əsasən tikintisi Kəlbəcər şəhər mərkəzindən Laçın şəhər mərkəzinədək məsafəni 32,2 kilometr qısaldaraq 93,8 kilometr təşkil edəcək.

Laçın şəhər mərkəzindən Laçın Beynəlxalq Hava Limanınadək hazırda mövcud yol üzrə məsafə 65 kilometr təşkil edir. Yeni tikilən yol üzrə isə məsafə 35,8 kilometr olacaq. Yolun 40-cı kilometrliyindən ayrılan və Laçın Beynəlxalq Hava Limanına aparan körpünün tikintisi də layihə çərçivəsində yerinə yetirilir. Ümumilikdə, Kəlbəcər-Laçın avtomobil yolunda tikinti işlərinin 44 faizi icra olunub.

MÜBARİZ

Paylaş:

Baxılıb: 317 dəfə