Dövlət Əmək Müfəttişliyi Xidməti işəgötürənlər üçün 50-yə yaxın maarifləndirmə tədbiri keçirib

Bakı:

25 °C

78 %

9 m/s

Əlaqə

AZ RU EN

Ana səhifə / Sosial / Dövlət Əmək Müfəttişliyi Xidməti işəgötürənlər üçün 50-yə yaxın maarifləndirmə tədbiri keçirib

Dövlət Əmək Müfəttişliyi Xidməti işəgötürənlər üçün 50-yə yaxın maarifləndirmə tədbiri keçirib

19.06.2025 [17:32]

Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti tərəfindən bu ilin yanvar - may ayları ərzində Bakı və bölgələrdə işəgötürənlər üçün 50-yə yaxın maarifləndirmə tədbiri təşkil olunub.

Nazirliyin İctimaiyyətlə əlaqələr şöbəsindən AZƏRTAC-a verilən məlumata görə, həmin tədbirlərin 15-i işğaldan azad edilmiş ərazilərdə həyata keçirilib. Eyni zamanda, “İnsan Hüquqları Aylığı” çərçivəsində ümumi təhsil müəssisələrində uşaqların əmək hüquqlarına dair 6 maarifləndirmə tədbiri təşkil olunub. Bundan əlavə, nazirliyin digər alt qurumları və rayon icra hakimiyyətləri ilə birgə Oğuz və Ağdaş rayonlarında iki irihəcmli regional, ASAN İnnovativ İnkişaf Mərkəzi ilə isə iki birgə tədbir keçirilib.

Ümumilikdə 4 min 100 nəfərin iştirak etdiyi maarifləndirmə tədbirlərində əmək qanunvericiliyindəki son dəyişikliklər, əmək münasibətlərinin rəqəmsallaşdırılması, əməyin mühafizəsi qaydaları, yeni qəbul olunmuş standartlar, eləcə də Əməyin Mühafizəsi Mərkəzinin fəaliyyəti haqqında geniş məlumatlar təqdim olunub.

Eyni zamanda, Dünya Bankı Qrupunun “Business Ready” reytinq hesabatından da bəhs edilib. Həmin hesabata uyğun olaraq yol xəritəsi üzrə qanunvericiliyin təkmilləşdirlməsi sahəsində görülən işlər barədə məlumat verilib.

Bildirilib ki, Dünya Bankı Qrupunun “Business Ready” reytinqi çərçivəsində ölkələrdə biznes mühitinin hüquqi və inzibati çərçivəsi qiymətləndirilir və bu kontekstdə əmək qanunvericiliyi, işçilərin hüquqları və işəgötürmə prosedurlarının sadəliyi əsas meyarlar sırasındadır. Ölkəmizin həmin reytinqdə mövqeyinin yaxşılaşdırılması məqsədilə əmək münasibətlərinin tənzimlənməsi, bərabərlik prinsiplərinin gücləndirilməsi, əməyin mühafizəsi və məcburi əməyin qarşısının alınması sahəsində mühüm qanunvericilik və institusional islahatlar həyata keçirilir.

“Business Ready” çərçivəsində uşaq əməyinin və məcburi əməyin qadağan olunması, əmək müqavilələrinin şəffaf və sərbəst şəkildə bağlanılması, sosial sığorta və təhlükəsiz əmək şəraiti kimi məsələlər xüsusi qiymətləndirmə komponentləridir və Azərbaycan bu istiqamətlərdə beynəlxalq standartlara uyğunlaşmanı təmin edir.

Tədbirlərin yekununda iştirakçıların müvafiq sualları cavablandırılıb.

Qeyd edək ki, ilin sonuna qədər müvafiq tədbirlərin davam etdirilməsi nəzərdə tutulur.

Paylaş:

Baxılıb: 421 dəfə