Qabiliyyət imtahanlarında 30 minə yaxın abituriyent qeydiyyatdan keçib

Bakı:

25 °C

64 %

8 m/s

Əlaqə

AZ RU EN

Ana səhifə / Sosial / Qabiliyyət imtahanlarında 30 minə yaxın abituriyent qeydiyyatdan keçib

Qabiliyyət imtahanlarında 30 minə yaxın abituriyent qeydiyyatdan keçib

03.07.2026 [10:58]

2026/2027-ci tədris ili üçün qabiliyyət imtahanlarında iştirak etmək məqsədilə ümumilikdə 30 minə yaxın abituriyent və subbakalavr qeydiyyatdan keçib.

AZƏRTAC xəbər verir ki, bunu Dövlət İmtahan Mərkəzinin xüsusi növ imtahanların təşkili və idarə edilməsi üzrə sektor müdiri Elton Süleymanov qabiliyyət imtahanlarını müşahidə etmək məqsədilə media nümayəndələri üçün təşkil olunan infotur zamanı bildirib. O qeyd edib ki, ümumi orta və tam orta təhsil bazasında, eləcə də ali təhsil müəssisələrinin V ixtisas qrupu üzrə qabiliyyət tələb edən ixtisaslara qəbul üçün qeydiyyat başa çatıb. Ümumilikdə 30 minə yaxın abituriyent və subbakalavr qeydiyyatdan keçib. Qabiliyyət imtahanlarına iyunun 22-də start verilib və hazırda musiqi sənəti, idman, teatr, kino və xoreoqrafiya, eləcə də təsviri sənət istiqamətləri üzrə imtahanlar davam edir. İndiyədək 10 mindən çox abituriyentin imtahanı təşkil olunub.

Sektor müdirinin sözlərinə görə, imtahanların təşkili üçün 100-dən çox Qabiliyyət İmtahanı Komissiyası fəaliyyət göstərir. Komissiyaların tərkibinə ali və orta ixtisas təhsili müəssisələrinin müəllimləri, ekspertlər, müxtəlif dövlət qurumlarının, o cümlədən Gənclər və İdman Nazirliyinin nümayəndələri, həmçinin Dövlət İmtahan Mərkəzinin əməkdaşları daxildir.

“İmtahanlar videoqeydiyyat vasitəsilə müşahidə olunur. Abituriyent nəticədən narazı qaldıqda apellyasiya müraciəti edə bilər və həmin müraciət videoqeydlər əsasında ekspertlər tərəfindən yenidən araşdırılır”, - deyə E.Süleymanov vurğulayıb. O əlavə edib ki, idman istiqaməti üzrə ən çox rast gəlinən problem bəzi abituriyentlərin sağlamlıq haqqında arayışı təqdim etməməsi, musiqi istiqaməti üzrə isə əvvəlcədən seçilən ifa proqramının dəyişdirilməsinə cəhd göstərilməsidir.

Sektor müdiri, həmçinin bildirib ki, iyulun 2-də keçirilən qabiliyyət imtahanında giriş zamanı aparılan identifikasiya prosesi zamanı bir nəfərin başqasının yerinə imtahana daxil olmağa cəhd göstərdiyi müəyyən edilib və bunun qarşısı alınıb. Onun sözlərinə görə, həmin abituriyentin builki bütün DİM imtahanlarının nəticələri ləğv olunacaq və o, ixtisas seçimi müsabiqəsində iştirak edə bilməyəcək. Başqasının yerinə imtahana daxil olmağa cəhd edən şəxslə bağlı isə müvafiq sənədlər hüquq-mühafizə orqanlarına təqdim olunub və araşdırma aparılır.

Elton Süleymanov vurğulayıb ki, belə hallara qabiliyyət imtahanlarında çox nadir hallarda rast gəlinir: “İmtahan iştirakçılarının şəxsiyyəti həm girişdə, həm də elektron identifikasiya sistemi vasitəsilə yoxlanılır ki, bu da bu cür qanun pozuntularının qarşısının alınmasına imkan verir”.

Paylaş:

Baxılıb: 379 dəfə