“İrəli” İctimai Birliyinin “Gənc Əkinçi” Akademiyası uğurla başa çatıb

Bakı:

27 °C

47 %

3 m/s

Əlaqə

AZ RU EN

Ana səhifə / Sosial / “İrəli” İctimai Birliyinin “Gənc Əkinçi” Akademiyası uğurla başa çatıb

“İrəli” İctimai Birliyinin “Gənc Əkinçi” Akademiyası uğurla başa çatıb

17.03.2015 [10:02]

“İrəli” İctimai Birliyinin Azərbaycan Respublikasının Prezidenti yanında Gənclər Fondu ilə birgə həyata keçirdiyi “Gənc Əkinçi” Akademiyası uğurla başa çatıb. Cari il “Gənclər paytaxtı” seçilən İsmayıllıda reallaşan layihə çərçivəsində 30-dək gənc jurnalist müxtəlif mövzularda keçirilən təlim və seminarlarda iştirak edib, rayonun görməli yerləri ilə tanış olublar.
AZƏRTAC xəbər verir ki, layihə iştirakçıları əvvəlcə İsmayıllı Rayon İcra Hakimiyyətində olublar. İcra hakimiyyətinin başçısı Mirdaməd Sadıqov gənclərlə görüşün əhəmiyyətindən danışıb, belə tədbirlərin davamlı olmasının vacibliyini vurğulayıb.
Bakı Dövlət Universitetinin kafedra müdiri, professor Cahangir Məmmədli 1875-ci ildə “Əkinçi” qəzetinin nəşrə başlaması ilə Azərbaycanda milli mətbuatın təməlinin qoyulmasından, müasir dövrdə jurnalistikanın problemlərindən, əldə olunan uğurlardan danışıb.
“İrəli” İctimai Birliyinin sədri Mirhəsən Seyidov layihənin İsmayıllıda keçirilməsindən məmnunluğunu bildirərək Azərbaycanda kütləvi informasiya vasitələrinin inkişafına göstərilən dövlət qayğısından danışıb. Bildirib ki, bu gün ölkədə beş mindən çox KİV qeydiyyatdan keçib. Azərbaycan artıq qlobal informasiya sisteminə qoşulub və bu da gənc jurnalistlərin biliklərinin artırılmasını, onlar arasında əməkdaşlıq əlaqələrinin möhkəmləndirilməsini zəruri edir.
Sonra rayon mədəniyyət evində “Gənc Əkinçi” Akademiyasının açılışı olub. Bildirilib ki, layihənin əsas məqsədi Azərbaycanda peşəkar jurnalistikanı formalaşdırmaq, KİV-lər arasında əməkdaşlığı inkişaf etdirmək, yeni əlaqələrin qurulmasına şərait yaratmaqdır. Layihənin əsas hədəflərindən biri də təlimdə iştirak edən gənc jurnalistlər komandasını formalaşdırmaq, onların Azərbaycan həqiqətləri barədə xarici ölkə mətbuatına çıxışını təmin etməkdir.
Akademiya çərçivəsində iştirakçılara “KİV və Dağlıq Qarabağ”, “Hərbi jurnalistika”, “Sosial media və köşə haqqında”, “Xarici mətbuata çıxış” mövzularında təlim və seminarlar keçirilib. “Gənc əkinçi”lər jurnalistikanın tarixi, mediada peşəkarlıq və müasir mətbuatın problemləri kimi aktual məsələlərin ictimai müzakirəsində də yaxından iştirak ediblər.
Sonra gənc jurnalistlər Girdimançayın sahilində, dəniz səviyyəsindən 1200 metr yüksəklikdə yerləşən Lahıc qəsəbəsində olublar. Akademiya iştirakçılarına Azərbaycanın ən qədim sənətkarlıq mərkəzlərindən olan Lahıc barədə ətraflı məlumat verilib. Diqqətə çatdırılıb ki, burada yaşayıb-yaratmış misgərlərin, zərgərlərin, sərracların, dülgərlərin, xalçaçıların, nəqqaşların, çəkmə və çarıq tikənlərin və s. ustaların yaratdıqları maddi-mədəniyyət nümunələri hazırda da dünyanın ən məşhur muzey və kolleksiyalarının ekspozisiyalarını bəzəməkdədir.
“Gənc əkinçi”lər İsmayıllıdakı mədəniyyət evində Azərbaycan Dövlət Akademik Opera və Balet Teatrının yaradıcı kollektivinin ifasında Ü.Hacıbəylinin “Leyli və Məcnun” operasına baxıblar.
Layihənin sonuncu günü - martın 15-də jurnalistlər özünəməxsus adət-ənənələri ilə seçilən İvanovka kəndində olublar.
Məlumat verilib ki, bu kənd İsmayıllı rayonunda istər yerli, istərsə də xarici turistlər üçün çox maraqlı və cəlbedici məkandır. Hazırda kənddə vaxtilə Azərbaycana köçürülən malakanlar nəslinin davamçıları yaşayır. Bu kəndin əməksevər sakinləri qədim adət və ənənələrini indi də qoruyub saxlayırlar.
Həmin gün İsmayıllı rayon mədəniyyət evində Akademiyanın bağlanış mərasimi keçirilib. “İrəli” İctimai Birliyinin sədri Mirhəsən Seyidov çıxış edərək layihənin uğurla yekunlaşdığını diqqətə çatdırıb. Bildirilib ki, təlimlərdən sonra yaradılacaq qrupla mütəmadi işlər aparılacaq, dil kursları təşkil ediləcək. Qrupun, həmçinin gələcəkdə müxtəlif ölkələrin media orqanlarında təcrübə proqramlarına qatılması və həmin KİV-lərlə əməkdaşlığa cəlb edilməsi nəzərdə tutulur.
Sonra akademiyanın iştirakçılarına şəhadətnamələr verilib.
İsmayıllı rayon İcra Hakimiyyətinin başçısı Mirdaməd Sadıqov “Gənc əkinçi”lərə fəaliyyətlərində uğurlar arzulayaraq xatirə hədiyyələri təqdim edib.

Paylaş:

Baxılıb: 919 dəfə