Qafqaz Müsəlmanları İdarəsinin sədri Tacikistanda səfərdə olub

Bakı:

14 °C

67 %

3 m/s

Əlaqə

AZ RU EN

Ana səhifə / Sosial / Qafqaz Müsəlmanları İdarəsinin sədri Tacikistanda səfərdə olub

Qafqaz Müsəlmanları İdarəsinin sədri Tacikistanda səfərdə olub

24.07.2015 [09:35]

Qafqaz Müsəlmanları İdarəsinin (QMİ) sədri şeyxülislam Allahşükür Paşazadənin rəhbərlik etdiyi nümayəndə heyəti iyulun 21-22-də Tacikistanın paytaxtı Düşənbə şəhərində səfərdə olub.
QMİ-nin mətbuat xidmətindən AZƏRTAC-a bildiriblər ki, səfərin ilk günü A.Paşazadə Tacikistan Respublikası Hökuməti yanında Dini İşlər, Milli Adət-Ənənə və Mərasimlərin Tənzimlənməsi üzrə Komitənin sədri Süleyman Davlatovla görüşüb.
Azərbaycanın Tacikistandakı səfiri Abbasəli Həsənovun da iştirak etdiyi görüşdə Düşənbə konfransı ilə bağlı fikir mübadiləsi aparılıb, habelə bu ilin aprel ayında Bakıda keçirilmiş “İslam maarifçiliyi və müasir dövr” mövzusunda beynəlxalq konfransın qərarları və nəticələri müzakirə olunub.
Həmin gün QMİ sədri Azərbaycanın Tacikistandakı səfirliyini ziyarət edib. Azərbaycan nümayəndə heyətinin üzvləri Ulu öndər Heydər Əliyevin səfirliyin ərazisində yerləşən büstünün önünə gül dəstəsi qoyublar.
Tacikistan Prezidenti Emoməli Rəhmonun dəvəti ilə Düşənbədə dünyanın 34 ölkəsini təmsil edən tanınmış dövlət, din və elm xadimlərinin iştirakı ilə keçirilən “İslam dini ekstremizmə və terrorizmə qarşıdır” mövzusunda beynəlxalq konfransda iştirak edən QMİ sədri A.Paşazadə iyulun 22-də məruzə ilə çıxış edib. Şeyxülislam Azərbaycan xalqının və şəxsən dövlətimizin başçısı İlham Əliyevin səmimi salamlarını və xoş arzularını Prezident Emoməli Rəhmona və bütün tacik xalqına çatdırıb. O, qardaş xalqlarımız və ölkələrimiz, həmçinin dövlət rəhbərlərimiz arasında mövcud olan möhkəm dostluq əlaqələrinin əhəmiyyətinə diqqəti cəlb edib. Şeyxülislam A.Paşazadə Prezident Emoməli Rəhmonun bir ay əvvəl Bakıda keçirilən ilk Avropa Oyunlarının açılışında iştirak etməsinin onun Azərbaycan xalqına və Prezidentinə böyük ehtiramının nümayişi kimi qəbul edildiyini vurğulayıb.
Düşənbədə keçirilən beynəlxalq tədbirin ümumbəşəri əhəmiyyət kəsb edən məsələyə həsr olunduğunu qeyd edən QMİ sədri Tacikistan dövlətinin İslam irsinin beynəlxalq müstəvidə təbliği işinə öz töhfəsini verməsini dəyərli hal kimi səciyyələndirib.
Son vaxtlar dünyada baş verən ekstremist çıxışları, qanlı terror aktlarını, habelə təkfirçilik təzahürlərini qətiyyətlə pisləyən A.Paşazadə belə əməllərin qarşısının yalnız xalqların qətiyyətli iradəsi, dövlət rəhbərlərinin məsuliyyətli qərarları, din xadimləri və cəmiyyətin bütün təbəqələrinin birgə səyləri ilə alına biləcəyini vurğulayıb. O, bu yolda düzgün dini maarifləndirmə işinin və gənc nəslin dini dəyərlər, əxlaqi-mənəvi keyfiyyətlər ruhunda tərbiyəsinin böyük önəm kəsb etdiyini bildirib.
Beynəlxalq konfransın iştirakçılarının diqqətini Ermənistan-Azərbaycan, Dağlıq Qarabağ münaqişəsinə yönəldən A.Paşazadə bildirib ki, 25 ildən artıq müddət ərzində işğal və etnik təmizləmə siyasətinin acı nəticələrini yaşayan, Qarabağın işğalının, Xocalı soyqırımının, erməni ekstremistlərinin mütəmadi maddi və mənəvi terrorunun şahidi olan Azərbaycan xalqı terrorun və ekstremizmin nə olduğunu yaxşı bilir. QMİ sədri ekstremizmlə, terrorla, ideoloji təxribatlarla mübarizədə islami həmrəyliklə yanaşı, bütün səmavi din ardıcıllarının dialoq və əməkdaşlığını təsirli vasitə kimi dəyərləndirib. O, terror və ekstremizm hallarına son qoyulması yönündə dinlərarası dialoqun, məzhəblərarası anlaşmanın vacib olduğunu bildirərək multikulturalizmin və tolerantlığın Azərbaycanda mövcud nümunəvi modelindən bəhrələnməyin ümumbəşəri önəmini xüsusi vurğulayıb.
Çıxışının sonunda konfransda qəbul ediləcək qərarlarla bağlı konkret tövsiyə və təkliflər verən şeyxülislam bu yaxınlarda Tacikistanda baş vermiş təbii fəlakətlə bağlı qardaş tacik xalqına, onun rəhbərliyinə, yaxınlarını itirən ailələrə başsağlığı verib. QMİ sədri təbii fəlakətdən zərər çəkmiş ailələrə Azərbaycan müsəlmanları adından 10 min dollar məbləğində maddi yardım təqdim etdiyini bildirib.
A.Paşazadə KİV nümayəndələrinin, o cümlədən Tacikistan Dövlət Televiziyasının suallarını cavablandırıb.

Paylaş:

Baxılıb: 755 dəfə