Bakıda Beynəlxalq Şagird Konfransı keçirilir

Bakı:

27 °C

50 %

11 m/s

Əlaqə

AZ RU EN

Ana səhifə / Sosial / Bakıda Beynəlxalq Şagird Konfransı keçirilir

Bakıda Beynəlxalq Şagird Konfransı keçirilir

11.12.2015 [10:08]

Azərbaycan Respublikasının Prezidenti yanında Bilik Fondu Ümummilli lider Heydər Əliyevin xatirəsinə həsr olunmuş “Kitabi-Dədə Qorqud və Haynrix Fridrix fon Dits - 200” mövzusunda Beynəlxalq Şagird Konfransı keçirir. Konfransın AMEA-nın Mərkəzi Elmi Kitabxanasında təşkil edilmiş açılış mərasimindən öncə iştirakçılar Fəxri xiyabanda Ümummilli lider Heydər Əliyevin məzarını ziyarət ediblər.
Konfransda məktəblilərin rəsm sərgisi nümayiş etdirilib. Tədbiri açıq elan edən Bilik Fondunun icraçı direktoru Oktay Səmədov Prezident İlham Əliyev tərəfindən bu ilin fevralın 20-də “Kitabi-Dədə Qorqud” dastanının alman dilində ilk tərcüməsi və nəşrinin 200 illiyinin qeyd olunması haqqında Sərəncam imzalandığını diqqətə çatdırıb. Bilik Fondunun bu istiqamətdə il ərzində ölkə daxilində və xaricində silsilə tədbirlər həyata keçirdiyini bildirən O.Səmədov Beynəlxalq Şagird Konfransının da bu silsilədən olduğunu söyləyib.
Qeyd edək ki, Beynəlxalq Şagird Konfransında Azərbaycanın bütün bölgələrini əhatə edən 16 şəhər və rayonun məktəbliləri iştirak ediblər. Bundan başqa, Türkiyə, Rusiya, Ukrayna, Gürcüstan və İsraildən olan şagirdlər də öz ölkələrini təmsil ediblər.
Azərbaycan Respublikasının millətlərarası, multikulturalizm və dini məsələlər üzrə dövlət müşavirliyi xidmətinin əməkdaşı Sərraf Hüseynov Dövlət müşaviri, akademik Kamal Abdullayevin konfrans iştirakçılarına salamlarını çatdırıb. K.Abdullayevin “siz gənclər və yeniyetmələr Ümummilli lider Heydər Əliyevin bizə əmanətisiniz” sözlərini xatırladan S.Hüseynov Bilik Fondunun ilboyu gənclərin və yeniyetmələrin hərtərəfli inkişafına yönəlmiş layihələr həyata keçirdiyini vurğulayıb. O, Beynəlxalq Konfransa Azərbaycanın bütün bölgələrindən, həmçinin xarici ölkələrdən də şagirdlərin həvəslə qatılmalarını “Kitabi-Dədə Qorqud” dastanına olan sevgi ilə əlaqələndirib.
Təhsil Nazirliyinin sektor müdiri Gültəkin Hüseynova konfrans iştirakçılarına uğurlar arzulayaraq nazir Mikayıl Cabbarovun təbrik məktubunu oxuyub. Təhsil naziri məktubda məktəbliləri “Kitabi-Dədə Qorqud və Haynrix Fridrix fon Dits - 200” Beynəlxalq Şagird Konfransına qatılmaq hüququ qazandıqlarına görə təbrik edib, şagirdləri daha dərin biliklərə yiyələnməyə, həmçinin xaricdə yaşayan yaşıdları ilə sıx əlaqələr qurmağa çağırıb.
Çıxış edən Qəbələ rayon 1 nömrəli Nic kənd məktəbinin direktoru Sergey Dallari, Dağıstan Respublikası, Dərbənd şəhəri 6 nömrəli internat məktəbinin direktoru Vadim Quliyev belə konfransların şagirdlərin həyatında mühüm rol oynadığını, elmi mübadilələrə və gələcək elmi araşdırmalara zəmin yaratdığını deyiblər.
Plenar iclasda yaşıdlarını salamlayan Türkiyənin Elvankent Bilgi Anadolu liseyinin şagirdi Hüsnü Barak Sarıkaya, Gürcüstanın Kutaisi şəhər məktəbinin şagirdi Elizabet Porçxidze, Rusiyanın Moskva Şəhər Gimnaziyasının şagirdi Mariya Voroşilova, Naxçıvan məktəbliləri Suat və Suay Qasımlılar, Nardaran məktəblisi Həsən Ağayev beynəlxalq səviyyəli konfransda iştirakdan məmnun olduqlarını bildiriblər. “Kitabi-Dədə Qorqud” dastanının dünya folklorşünaslığına verdiyi töhfədən danışan natiqlər eposun şifahi ədəbiyyatda dastan yaradıcılığını zənginləşdirdiyini də dilə gətiriblər.
Dövlət Uşaq Filarmoniyasının və məktəblilərinin hazırladıqları bədii hissədən sonra konfrans iştirakçıları AMEA-nın 70 illiyinə həsr olunmuş sərgi ilə tanış olublar. Konfrans iki bölmədə işini davam etdirib.
Qeyd edək ki, tədbir iştirakçılarının Bakı şəhərində gəzintisi də nəzərdə tutulub.
Pərviz SADAYOĞLU

Paylaş:

Baxılıb: 936 dəfə