Avropa Gənclər Paytaxtının rəmzi açarı Gəncəyə gətirilib

Bakı:

16 °C

36 %

13 m/s

Əlaqə

AZ RU EN

Ana səhifə / Sosial / Avropa Gənclər Paytaxtının rəmzi açarı Gəncəyə gətirilib

Avropa Gənclər Paytaxtının rəmzi açarı Gəncəyə gətirilib

18.12.2015 [09:59]

Dekabrın 17-də Avropa Gənclər Paytaxtının rəmzi açarı Gəncəyə gətirilib.
AZƏRTAC xəbər verir ki, Rumıniyanın Kluj Napoca şəhərindən Avropa Gənclər Paytaxtının rəmzi açarını qəbul edən Gəncənin nümayəndə heyəti şəhərin beynəlxalq hava limanında böyük təntənə ilə qarşılanıblar.
“Gəncə Avropa Gənclər Paytaxtı-2016” İctimai Birliyinin sədri Elmir Vəliyev Avropa Gənclər Paytaxtının rəmzi açarının gətirilməsi münasibətilə gəncəliləri təbrik edərək bildirib ki, bu uğur Azərbaycan Prezidenti İlham Əliyevin gənclərə göstərdiyi diqqət və qayğının nəticəsidir.
Sonra Gəncə Dövlət Dram Teatrının aktyorları hava limanında dahi Azərbaycan şairləri Nizami Gəncəvinin, Məhsəti Gəncəvinin, Mirzə Şəfi Vazehin və xalq qəhrəmanı Cavad xanın obrazlarını canlandırıblar. Musiqi və rəqs kollektivlərinin çıxışları olub.
Avropa Gənclər Paytaxtının rəmzi açarı əllərində üçrəngli Azərbaycan bayraqları tutmuş gənclərin müşayiəti ilə şəhərə gətirilib. Şəhəri dolaşan avtobus karvanı nəhayət mərkəzi meydana çatıb və minlərlə gəncin iştirakı ilə açarın qarşılanma mərasimi olub.
Sonra mərasim iştirakçıları müstəqil Azərbaycan dövlətinin memarı və qurucusu Heydər Əliyevin abidəsini ziyarət edərək, abidə önünə tər qərənfillər düzüblər.
Həmin gün şəhərin mərkəzi meydanında əsl bayram əhval-ruhiyyəsi yaşanıb.
Beləcə Gəncə daha bir əlamətdar hadisənin şahidi olub. Avropa Gənclər Paytaxtının rəmzi açarı Gəncəyə gətirilib.
Xatırladaq ki, Gəncə 2013-cü ildə “Avropa Gənclər Forumu”nun Yunanıstanın Saloniki şəhərində keçirilən iclasında səs çoxluğu ilə 2016-cı il Avropa Gənclər Paytaxtı seçilib.
Avropa Gənclər Paytaxtı “Avropa Gənclər Forumu”nun həyata keçirdiyi beynəlxalq layihədir. Bu Forum Avropa ölkələrinin milli gənclər şuralarının və beynəlxalq qeyri-hökumət gənclər təşkilatlarının beynəlxalq platformasıdır. “Avropa Gənclər Forumu” Avropa Gənclər Paytaxtı layihəsini ilk dəfə 2009-cu ildə həyata keçirib. Avropanın ilk seçilən gənclər paytaxtı Niderlandın Rotterdam, daha sonra İtaliyanın Turin, Belçikanın Antverpen, Portuqaliyanın Braqa, Sloveniyanın Maribor, Yunanıstanın Saloniki və Rumıniyanın Kluj Napoca şəhərləri olub. Artıq Azərbaycanın Nizami yurdu da Avropa Gənclər Paytaxtları şəbəkəsinə qoşuldu. Bununla da şəhər gəncləri bir il ərzində gənclər sahəsində həyata keçirilən proqram və layihələr haqqında məlumatı Avropa ölkələrinə nümayiş etdirmək imkanı qazanıblar.

Paylaş:

Baxılıb: 719 dəfə