Əməkdaşlıq formulu: dövlət-fermer-emal müəssisəsi

Bakı:

28 °C

55 %

11 m/s

Əlaqə

AZ RU EN

Ana səhifə / Sosial / Əməkdaşlıq formulu: dövlət-fermer-emal müəssisəsi

Əməkdaşlıq formulu: dövlət-fermer-emal müəssisəsi

10.06.2016 [10:01]

Cəlilabad rayonu özünəməxsus əkinçilik ənənələrinə malikdir
Prezident İlham Əliyevin tövsiyə və tapşırıqlarına müvafiq olaraq, rayonlarda kənd təsərrüfatı işlərinin gedişinin, fermerlərin, torpaq mülkiyyətçilərinin təklif və istəklərinin, həmçinin aqrar sektorun inkişaf perspektivlərinin öyrənilməsi və operativ tədbirlərin görülməsi məqsədilə yaradılan işçi qrupun üzvləri iyunun 9-da Cəlilabad rayonunda olublar.
AZƏRTAC xəbər verir ki, işçi qrupun rəhbəri, Prezidentin iqtisadi islahatlar üzrə köməkçisi xidmətinin aqrar və sənaye məsələləri şöbəsinin müdiri Azər Əmiraslanov və qrup üzvləri Göytəpə şəhərində müasir tipli istixana, üzüm sahələri, “Cəlilabad broyler” ASC, “Avanqard” MMC-nin un dəyirmanı, Alar kəndində 1200 hektarlıq taxıl sahəsi və Qarazəncir kəndində şərab zavodu ilə tanış olub, işlərin gedişi ilə maraqlanıblar.
Sonra Cəlilabad şəhərindəki Heydər Əliyev Mərkəzində fermerlərin, aqrar sahədə çalışan sahibkarların, mütəxəssislərin, müvafiq idarə və təşkilat rəhbərlərinin, təsərrüfat sahiblərinin, bələdiyyə sədrlərinin iştirakı ilə müşavirə keçirilib.
Cəlilabadda aqrar sektorda mövcud vəziyyətlə bağlı məlumat verən icra hakimiyyətinin başçısı Əziz Əzizov bildirib ki, rayonda zəngin əkinçilik ənənələri var: “Bu ənənələr bu gün də uğurla davam etdirilir. Cəlilabadda 108 min 145 hektar kənd təsərrüfatı təyinatlı torpaqlardan 97 min 300 hektarı əkinəyararlıdır. Bu il rayonda 58 min 811 hektarda buğda, 4800 hektarda arpa, 1000 hektarda vələmir, 4100 hektarda kartof, 7 min hektar sahədə isə yazlıq və bostan-tərəvəz bitkiləri əkilib. Həmçinin uzun fasilədən sonra bu il 423 hektar sahədə pambıq əkini də həyata keçirilib. Rayonda 1507 hektar üzüm bağları var. Bu il isə əlavə 7 hektar yeni üzüm bağları salınıb. İxracata gəldikdə, rayonda istehsal olunan kartof yerli bazarlarla yanaşı, Rusiyaya da ixrac edilir”.
İşçi qrupun rəhbəri Azər Əmiraslanov Cəlilabad rayonunun aqrar sahədə perspektivlərindən danışaraq bildirib ki, ölkənin ərzaq təhlükəsizliyinin təmin olunması, ilk növbədə, regionlardan, rayonlardan başlanır. Cəlilabadda bitkiçiliyin ən mühüm sahələrinin inkişaf etdirildiyini vurğulayan Prezident Administrasiyasının rəsmisi kənd təsərrüfatının uzunmüddətli inkişafının yalnız daxil bazarda satılan məhsullarla deyil, rəqabət qabiliyyətli məhsulların xarici ölkələrə ixrac olunması ilə mümkün olduğunu diqqətə çatdırıb.
Azər Əmiraslanov kənd təsərrüfatı sahəsində dövlətin, fermerlərin və emal müəssisələrinin birgə əməkdaşlığının zəruri olduğunu söyləyib.
Müşavirədə çıxış edənlər rayonda aqrar bölmənin inkişafı ilə bağlı elit toxumların gətirilməsi və iri toxumçuluq kompleksinin yaradılması, taxılın alış qiymətinin stimullaşdırılması, tədarük məntəqələrinin yaradılması, əkin sahələrinin suvarılması məqsədilə rayon üçün ayrılmış limitə ciddi riayət olunması, üzüm tingi təsərrüfatının yaradılması ilə bağlı təkliflərini bildiriblər.
İşçi qrupun üzvləri təklifləri təhlil edərək, onların hər birinə müsbət yanaşılacağını diqqətə çatdırıblar.

Paylaş:

Baxılıb: 835 dəfə