“Zəhmət-Ruzi” MMC halallıq və yüksək keyfiyyət prinsipi əsasında uğurla fəaliyyət göstərir

Bakı:

15 °C

77 %

3 m/s

Əlaqə

AZ RU EN

Ana səhifə / Sosial / “Zəhmət-Ruzi” MMC halallıq və yüksək keyfiyyət prinsipi əsasında uğurla fəaliyyət göstərir

“Zəhmət-Ruzi” MMC halallıq və yüksək keyfiyyət prinsipi əsasında uğurla fəaliyyət göstərir

29.11.2017 [10:27]

Müəssisədə 60 çeşiddə ət və 40 çeşiddə süd məhsulları istehsal edilir və “SAB” - “Made in Azerbaijan” brendi altında bazara çıxarılır
Azərbaycanda həyata keçirilən davamlı islahatlar sayəsində bütün sahələrin paralel tərəqqisi təmin edilib. Eyni zamanda, neft gəlirlərinin səmərəli idarə edilməsi, iqtisadiyyatın şaxələndirilməsi və qeyri-neft sahələrinin tərəqqisi, özəl sektorun inkişaf etdirilməsi və sahibkarlığa dövlət dəstəyi kimi fundamental tədbirlər dayanıqlı iqtisadi inkişafın təmin olunması baxımından müstəsna əhəmiyyət kəsb edir. Digər tərəfdən, istehsalın genişləndirilməsi, daxili tələbatın tam ödənilməsi və ixrac potensialının artırılması Azərbaycanın strateji hədəflərindəndir. Rəqabətədavamlı istehsal və emal müəssisələrinin yaradılması, yerli istehsalın stimullaşdırılması, sahibkarlara güzəştli maliyyə yardımı mexanizmlərinin gücləndirilməsi, habelə sənaye potensialının möhkəmləndirilməsi istiqamətində görülən işlər iqtisadi siyasət çərçivəsində həyata keçirilən tədbirlərin səmərəliliyini təmin edib. Buna paralel olaraq yeni iqtisadi şəraitdə Azərbaycanda iqtisadi aktivliyin artırılması, o cümlədən qeyri-neft sektorunda istehsalın genişləndirilməsi istiqamətində davamlı tədbirlər həyata keçirilir. Prezident İlham Əliyevin müvafiq Fərman və sərəncamları əsasında həyata keçirilən geniş məzmunlu islahatlar, ölkədə biznes mühitinin optimallaşdırılması, sahibkarlığın və özəl sektorun inkişafına əlverişli şəraitin yaradılması da bu kontekstdə xüsusi vurğulanmalıdır. Ən əsası, dövlətin iqtisadi siyasətinin başlıca istiqamətlərindən biri məhz özəl sektorun hərtərəfli dəstəklənməsi, onun daha da genişlənməsi üçün əlverişli mühitin yaradılması, bu sahədə müxtəlif yardım və təşviq mexanizmlərinin tətbiq edilməsidir. “Zəhmət-Ruzi” MMC-nin fəaliyyəti də məhz belə bir əlverişli mühitin bəhrəsidir.
Vurğulamaq yerinə düşər ki, noyabrın 17-də Azərbaycan Prezidenti İlham Əliyev Abşeron rayonunda “Zəhmət-Ruzi” MMC-nin fəaliyyəti ilə tanış olub. “Zəhmət-Ruzi” MMC-nin dəyəri 42 milyon manat olan logistika mərkəzi, ət kəsimi, ət və süd emalı fabrikindən ibarət aqrar-sənaye kompleksi fəaliyyət göstərir. Müəssisədə istehsal edilən və “SAB” -”Made in Azerbaijan” brendi altında bazara çıxarılan 60 çeşiddə ət və 40 çeşiddə süd məhsullarının nümunələrinə rast gəlmək olur. “Zəhmət-Ruzi” MMC-nin ət və süd məhsulları AZS - keyfiyyət idarəetmə standartlarının sertifikatına və keyfiyyətə nəzarət sisteminin ISO 9001:2000 sertifikatına layiq görülən “SAB” brendi altında bazara çıxarılır. İstehsalın əksər hissəsi avtomatlaşdırılıb, ən müasir texnologiyalardan istifadə olunur.
Müəssisədə ət məhsullarının istehsalı prosesi müasir avadanlıqlar və texnologiyalar vasitəsilə həyata keçirilir. 7 min tonluq logistika mərkəzi ən müasir avadanlıqla təchiz edilib. Burada illik kəsim gücü 1,8 min ton olan fabrik də fəaliyyət göstərəcək. Bundan başqa, saatda 2500 quş kəsimi gücünə malik olan fabrik üçün də avadanlıq gətirilib və ilin sonunadək quraşdırılması nəzərdə tutulub. İllik istehsal gücü 10 min tona çatan ət emalı sahəsində 60 çeşiddə məhsul istehsal edilir. Ət məhsullarının saxlanma şəraiti ən müasir standartlara uyğundur.
İllik istehsal gücü 7 min ton olan süd emalı sahəsində isə 40 çeşiddə süd məhsulları, o cümlədən pasterizə edilmiş süd, pendir, xama, kəsmik, qatıq, dovğa, ayran və digər məhsullar hazırlanır. Tezliklə bu aqrar-sənaye kompleksində dondurma da istehsal olunacaq. Kompleksin xammala olan tələbatı Abşeron və digər rayonlarda fəaliyyət göstərən fermerlərin təsərrüfatlarında tədarük edilmiş məhsul hesabına təmin ediləcək. “Zəhmət-Ruzi” MMC-nin həyata keçirdiyi layihələr hesabına 150 yeni iş yeri yaradılıb. Burada istehsal edilən məhsulların Rusiyaya, Qazaxıstana və Asiya ölkələrinə ixracı ilə bağlı müvafiq tədbirlər görülür.
Dünən bir qrup media təmsilçisi Abşeron rayonu ərazisində fəaliyyət göstərən müəssisənin bütün istehsalat sahələri ilə tanış olub. İstehsalat prosesi və müəssisənin iş prinsipi ilə bağlı məlumat verən “Zəhmət-Ruzi” MMC-nin təsisçisinin nümayəndəsi Əliheydər Fərəcullayev qeyd etdi ki, şirkət üç əsas istiqamətdə fəaliyyət göstərir: “Onlardan birincisi soyuducu anbar təsərrüfatıdır. Müəssisədə təxminən 7-8 min tonluq soyuducu anbarlar var. Azərbaycana daxil olan donmuş ərzaq-qida məhsullarının bir qismi bu anbarlarda saxlanılır. İkinci böyük sahə ət emalı sahəsidir. Gündəlik istehsal gücü 30 tona qədər olan istehsal sahəmiz var. Hazırda gündəlik istehsal təxminən 7-8 ton civarındadır. Yaxın vaxtlarda Rusiyaya və körfəz ölkələrinə ixrac ilə bağlı müqavilələrin imzalanması nəzərdə tutulub. Üçüncü sahə isə süd emalını əhatə edir. Burada da gündəlik istehsal gücü 30 ton həcmindədir, amma hazırda təxminən gündəlik 7-8 ton süd emal edilir”.
Ə.Fərəcullayev əlavə etdi ki, “Zəhmət-Ruzi” MMC-nin “SAB” nişanlı kolbasa və süd məhsullarının istehsalı Azərbaycan istehlakçılarının Qida Təhlükəsizliyi Nişanı (AİQTN) proqramının tələblərinə uyğun olduğuna görə müəssisə PLATİN səviyyəli Qida Təhlükəsizliyi Nişanına layiq görülüb: “Bu, məhz məhsulların təbii, keyfiyyətli və insan sağlamlığına uyğun olduğunu, müvafiq normalara cavab verdiyini göstərir. Süd emalı sahəsində yalnız təbii süddən istifadə edirik. Ayrıca soya maddələri və digər qatqılardan istifadə olunmur. Qidalar təbii ət və toyuq məhsullarından hazırlanır”.
“Zəhmət-Ruzi” MMC-nin təsisçisinin nümayəndəsi şirkətin “SAB” nişanlı məhsullarının “Moscow Halal Expo-2014”, “Moscow Halal Expo-2015” və “Moscow Halal Expo-2016”nın qalibi olduğunu, 2015-ci ildə Qazaxıstanda bu uğuru təkrarladığını və tədbirin əsas mükafatı olan “Grand Prix”ə layiq görüldüyünü də diqqətə çatdırdı.
Beləliklə, ekoloji cəhətdən təmiz, yüksəkkeyfiyyətli “SAB” ət və süd məhsulları beynəlxalq standartlara cavab verir. Faydalı maddələr və minerallarla zəngin olan bu məhsullar sağlam qidalanma üçün düzgün seçim olmaqla yanaşı, həm də halallıq prinsipi əsasında hazırlanması ilə fərqlənir.
Nurlan QƏLƏNDƏRLİ

Paylaş:

Baxılıb: 764 dəfə