Padarçöl Aqroparkına mediatur təşkil edilib

Bakı:

29 °C

58 %

5 m/s

Əlaqə

AZ RU EN

Ana səhifə / Sosial / Padarçöl Aqroparkına mediatur təşkil edilib

Padarçöl Aqroparkına mediatur təşkil edilib

01.05.2019 [16:34]

"Azərsun Holdinq" Şirkətlər Qrupu ölkənin aparıcı KİV nümayəndələri üçün Padarçöl Aqroparkına mediatur təşkil edib. KİV təmsilçilərini qarşılayan aqroparkın rəhbəri Nəbi Paşayev bildirib ki, 4200 hektar əraziyə malik kompleks ən müasir avadanlıq və texnologiya ilə təmin edilmiş heyvandarlıq və müxtəlif kənd təsərrüfatı məhsullarının yetişdirildiyi əkin sahələrindən ibarətdir.
Aqroparkda əsasən taxıl və yem bitkilərinin yetişdirildiyini deyən müəssisə rəhbəri ümumilikdə il ərzində iki dəfə əkin işlərinin həyata keçirildiyini bildirib: "Bundan əlavə, 3 çeşiddə qarğıdalının əkini ilə bərabər, sınaq məqsədilə tərəvəz bitkilərinin əkininə də başlanılıb. Burada yeni növ əkin sahələrinin salınması üçün araşdırmalar aparılaraq gələcəkdə məhsul çeşidinin genişləndirilməsi nəzərdə tutulub".
Jurnalistlərə, eyni zamanda, "Azərsun Holdinq"in fəlsəfəsi barədə də məlumat verən Nəbi Paşayev şirkətin Müşahidə Şurasının sədri Abdolbari Goozalın bütün sahələrdə məhsulların keyfiyyətinə xüsusi həssaslıqla yanaşdığını söyləyib. Bildirib ki, "Tarladan süfrəyə"dək keyfiyyətə nəzarətin ən yüksək səviyyədə təmin edildiyi "Azərsun" müəssisələrində bütün məhsullar satışdan öncə dəfələrlə laborator yoxlamalardan keçir. Bunun məntiqi nəticəsidir ki, bu şirkət tərəfindən istehsal olunan məhsullar ölkə daxilində rəğbətlə qarşılanmaqla bərabər, dünyanın müxtəlif ölkələrində istehlakçılar tərəfindən yüksək qiymətləndirilir. Bundan əlavə, əkin işlərinin həyata keçirildiyi torpaqların keyfiyyətinin qorunması üçün Müşahidə Şurasının sədrinin təlimatlarına əsasən zəruri addımlar atılır.
Qeyd olunub ki, "Azərsun" dövlət rəhbərliyinin yürütdüyü siyasətə uyğun olaraq bölgələrdə insanların məşğulluğunun artırılması və sosial rifah halının yüksəldilməsi istiqamətində həyata keçirilən işlərə dəstək olur. Hazırda müəssisədə 200-dən artıq insan işlə təmin olunub ki, mövsüm zamanı bu rəqəm 600-dən artıq olur. Daha sonra jurnalistlərə idarəetmə sistemi və fermaları dünyaca məşhur "Afimilk" şirkəti tərəfindən qurulan heyvandarlıq kompleksi barədə məlumat verən Nəbi Paşayev hazırda 2000-dən artıq iribuynuzlu mal-qara saxlanıldığını bildirib: "Artıq layihənin ilk fazası yekunlaşıb və günlük olaraq 34 ton süd istehsal edilir ki, yağlılıq nisbəti 3,6 faiz təşkil edir. Ən müasir avadanlıqların tətbiqi ilə eyni anda 72 heyvanın sağılması mümkün olur, fermaların avtomatlaşdırılmış havalandırma sistemi ilə təchiz olunması heyvanların bütün mövsümlərdə rahatlığını təmin edərək məhsuldarlığın yüksək saxlanılmasına mühüm töhfə verir. İribuynuzluların sağlamlığı və məhsuldarlığı üçün ən önəmli məsələ olan yemlənmə prosesi də Azərbaycanda ilk dəfə avtomatlaşdırılmış şəkildə xüsusi proqram təminatı ilə həyata keçirilir. Holşteyn-friz cinsinə aid heyvanların bütün məlumatları bazaya yerləşdirilib ki, proqram təminatı da bu bazadakı məlumatlar əsasında heyvanların sağlamlıq durumunu hesablaya bilir. Əgər hər hansısa heyvanın qidalanması, məhsuldarlığı və digər göstəricilərində bir dəyişiklik baş verərsə, bu barədə dərhal mütəxəssislərə məlumat ötürülür. Zootexnik və baytarlar həmin heyvanları ümumi sürüdən ayıraraq nəzarət altına götürürlər. Xüsusi qayğı bölümünə yerləşdirilən heyvanlar baytarların nəzarəti ilə müalicə alırlar".
Bildirilib ki, ümumilikdə bu heyvandarlıq kompleksində əldə olunan süd məhsulları Kürdəmir Süd Emalı Kompleksinə göndərilir və orada da "Azərsüd", "Super milky" və digər "Azərsun" markaları altında məhsullar istehsal edilir. Bundan başqa, heyvandarlıq kompleksinin fəaliyyəti zamanı yaranan üzvi tullantılardan üzvi gübrə də istehsal olunur ki, bu da əkin sahələrində torpaqların zənginləşdirilməsində istifadə edilir.
Jurnalistlərin suallarını cavablandıran Nəbi Paşayev Aqropark layihəsinin ikinci fazasının yekunlaşmasından sonra süd istehsalının artacağını və yerli kərə yağının istehsal ediləcəyini də bildirib. O, bunun üçün Kürdəmir Süd Emalı Kompleksində zəruri işlərin aparıldığını və istehsal xətlərinin qurulduğunu deyib. O da qeyd edilib ki, müxtəlif kənd təsərrüfatı məhsullarının yetişdirildiyi ərazilər əvvəllər əkin üçün tam yararsız olub. Hazırda isə "Azərsun Holdinq" tərəfindən burada nasosxanalar, süni göllər, pivotlar və digər müasir suvarma sistemləri yaradılıb.

Paylaş:

Baxılıb: 699 dəfə