Qax rayonunda icbari tibbi sığortanın tətbiqinə başlanılıb

Bakı:

18 °C

72 %

0 m/s

Əlaqə

AZ RU EN

Ana səhifə / Sosial / Qax rayonunda icbari tibbi sığortanın tətbiqinə başlanılıb

Qax rayonunda icbari tibbi sığortanın tətbiqinə başlanılıb

11.01.2020 [10:47]

Uğurla həyata keçirilən sosial-iqtisadi siyasət nəticəsində son illər ölkəmizdə səhiyyə sahəsində də böyük dəyişikliklər baş verib. Əhalinin sağlamlığının qorunması Prezident İlham Əliyevin daim diqqət mərkəzindədir. Təsadüfi deyildir ki, son illər respublikamızda yüksək standartlara uyğun, ən müasir tibbi avadanlıqla təchiz olunmuş yüzlərlə xəstəxana, tibb məntəqəsi tikilib əhalinin istifadəsinə verilib.
Ölkəmizdə səhiyyə sahəsində həyata keçirilən uğurlu islahatların mühüm istiqamətlərindən biri də icbari tibbi sığortanın tətbiq edilməsidir. İcbari tibbi sığortanın məqsədi əhalinin səhiyyə xərcləri ilə bağlı maliyyə yükünü azaltmaq, yüksək keyfiyyətli tibbi xidmətlərə əlçatanlığı təmin etmək və vətəndaş məmnunluğuna nail olmaqdır.
AZƏRTAC-ın bölgə müxbiri xəbər verir ki, respublikamızın şimal-qərb bölgəsinin digər rayonları kimi, Qaxda da yanvarın 1-dən etibarən icbari tibbi sığortanın tətbiqinə başlanılıb. İcbari tibbi sığorta sisteminə keçid rayon əhalisinin keyfiyyətli və hərtərəfli tibbi xidmətlə təmin olunmasına imkan verəcək və bu xidmətlərdən rayonun 55 mindən çox sakini faydalanacaq.
İcbari tibbi sığortanın tətbiqi ilə bağlı Qax rayonunda da ötən ilin noyabr-dekabr aylarında İcbari Tibbi Sığorta üzrə Dövlət Agentliyinin və rayon İcra Hakimiyyətinin birgə təşkilatçılığı ilə maarifləndirmə tədbirləri keçirilib, sistemin üstünlükləri barədə əhali ətraflı məlumatlandırılıb.
Hazırda Qax rayonunda əhaliyə rayon mərkəzi xəstəxanası, Tasmalı və Əlibəyli kənd sahə xəstəxanaları, həmçinin 10 həkim və 26 tibb məntəqəsi vasitəsilə tibbi xidmətlər göstərilir. Bu müəssisələrdə 110 həkim və 402 nəfər orta tibb işçisi çalışır.
Rayon mərkəzi xəstəxanasının baş həkimi Tərlan Əhmədzadə AZƏRTAC-ın bölgə müxbirinə müsahibəsində icbari tibbi sığorta sisteminin tətbiqinin səhiyyənin inkişafına çox böyük töhfə verəcəyini vurğulayıb. Baş həkim bildirib ki, icbari tibbi sığorta sisteminə keçidlə əlaqədar rayon mərkəzi xəstəxanasına müraciət edən vətəndaşların məmnunluğunu təmin etmək üçün xəstəxanada 3 yerdə qeydiyyat mərkəzi yaradılıb. Ailə Sağlamlıq Mərkəzinə müraciət edən sakin əvvəlcə ailə həkimi tərəfindən qəbul edilir. Sonra xəstə müayinələrdən keçmək üçün müvafiq şöbələrə göndərilir, ehtiyac yaranarsa ixtisaslı həkimlərə yönləndirilir.
Baş həkimin sözlərinə görə, yanvarın əvvəlindən bu günədək xəstəxanaya 1250 nəfərdən çox sakin müraciət edib. Onlardan 35 nəfəri stasionar, 1220 nəfər isə ambulator müalicəyə cəlb olunub. Gün ərzində xəstəxanaya orta hesabla 300-330 nəfərədək vətəndaş müraciət edir.
Müayinə olunmaq üçün xəstəxanaya gələn Qax şəhər sakini Şərqiyyə Fərhadova AZƏRTAC-ın bölgə müxbirinə deyib: “Kardioloji problemim olduğu üçün həkimə müraciət etmək istəyirdim. Qeydiyyat mərkəzində məni çox yaxşı qarşıladılar. Qeydiyyata alındıqdan sonra tibb bacısı məni aidiyyəti həkimin yanına apardı. Həkim məni hərtərəfli müayinə etdi, müalicə yazdı. Bütün bu proseslər yüksək səviyyədə təşkil olunub”.
Turaclı kənd sakini Röyal Abbasov isə xəstəxanaya sağlamlıq haqqında arayış almaq üçün müraciət edib. Digər sakinlər kimi, Röyal da icbari tibbi sığortanın tətbiqinin əhaliyə göstərilən tibbi xidmətlərin keyfiyyətinin yüksəlməsinə müsbət təsir göstərəcəyini bildirib.

Paylaş:

Baxılıb: 590 dəfə