Qafqaz Müsəlmanları İdarəsi koronavirus xəstəliyi ilə bağlı tövsiyələrini açıqlayıb

Bakı:

21 °C

64 %

3 m/s

Əlaqə

AZ RU EN

Ana səhifə / Sosial / Qafqaz Müsəlmanları İdarəsi koronavirus xəstəliyi ilə bağlı tövsiyələrini açıqlayıb

Qafqaz Müsəlmanları İdarəsi koronavirus xəstəliyi ilə bağlı tövsiyələrini açıqlayıb

06.03.2020 [09:38]

Martın 5-də Qafqaz Müsəlmanları İdarəsi koronavirus xəstəliyi ilə bağlı tövsiyələrini açıqlayıb.
AZƏRTAC xəbər verir ki, tövsiyələrdə deyilir: “Son zamanlarda dünyanın bir çox ölkəsində koronavirus infeksiyasının yayılması və fəsadlarının qarşısının alınması məqsədilə qonşu dövlətlərdə olduğu kimi, Azərbaycanda da profilaktik tədbirlərə start verilib, sanitar-epidemioloji vəziyyət ciddi nəzarət altına alınıb. Dövlətimiz bu xəstəliyin ölkəmizdə yayılmasını önləmək üçün bütün mümkün tibbi-sanitar və ictimai təhlükəsizlik tədbirlərini həyata keçirir. Ölkə dindarlarının çoxsaylı müraciətlərini, bölgə qazıları və səlahiyyətli nümayəndələrimizin təkliflərini nəzərə alaraq Qafqaz Müsəlmanları İdarəsi (QMİ) koronavirusa yoluxma hallarının qarşısının alınması məqsədilə ölkə ərazisindəki bütün məscid və ziyarətgahlara tapşırıq və tövsiyələrlə müraciət edir: Allahın haqq dini olan İslama görə insan həyatı ən yüksək dəyərə malikdir. İnsan həyatı və sağlamlığı müqəddəs dinimizin hər zaman diqqət mərkəzində olmuş, Allah-Təala nəinki başqasının canına qəsd etməyi, hətta insanın öz canını təhlükəyə atmasını qəti şəkildə qadağan etmişdir. Əbəs yerə deyil ki, “Qurani-Kərim”in “Bəqərə” surəsinin 195-ci ayəsində belə buyurulub:
“...öz əllərinizlə özünüzü təhlükəyə atmayın...”.
İnsan sağlamlığının qorunması, bəzi yoluxucu xəstəliklərin təhlükəli olması barədə fikirlər Həzrət Peyğəmbərin (s) məşhur tibbi-nəbəviyə dair hədislərində nəql olunub. Rəsulullah (s) buyurub ki, “Allahdan bağışlanma və sağlamlıq diləyin. Həqiqətən də, insana imandan sonra sağlamlıqdan üstün bir nemət verilməyib”; “Əgər bir ərazidə taun xəstəliyinin olduğunu eşitsəniz, heç vaxt ora daxil olmayın. Əgər siz o yerdə olsanız, o zaman oradan kənara çıxmayın”; “Xora xəstəliyinə tutulmuş adama çox tamaşa etməyin. Onlarla söhbət edərkən bir və ya iki nizə (3-4 metr aralıqda) məsafəsində uzaqda dayanın”; “Cüzam xəstəliyinə tutulmuş bir nəfər Peyğəmbərin (s) yanına gəlib ona beyət etmək istədikdə, Peyğəmbər (s) buyurdu: “Əl vermədən beyət et. Beyətini qəbul etdim”.
Taun, vəba və xora xəstəlikləri dövrün yoluxucu xəstəliklərindən olduğu üçün hədislərdə məhz onların adı çəkilib. Başqa sözlə ifadə ilə desək, bunlar yoluxucu xəstəliklərin növlərindəndir və hədislərdəki tövsiyələr bütün yoluxucu xəstəliklərə şamil olur. Digər tərəfdən, mübarək hədislər təsdiq edir ki, insanlar həm özlərinin, həm də başqa şəxslərin sağlamlığı üçün Allah qarşısında məsuliyyət daşıyırlar.
QMİ bu müvəqqəti çətinlik dönəmində bərayi-ehtiyatən dindarlarımıza tövsiyə edir ki, həkimlərin məsləhətlərinə ciddi şəkildə riayət olunsun, məscidlər, ziyarətgahlar, dini tədris müəssisələri və Quran kurslarında dezinfeksiya işlərinin aparılması üçün müvafiq dövlət tibbi-sanitariya müəssisələrinə müraciət edilsin, ələlxüsus namaz zalları, dəstəmazxana, meyitxana və sanitar qovşaqlarının təmizlənməsinə xüsusi diqqət yetirilsin. Rica edirik ki, uzaq yoldan gələnlər, yaşlı insanlar, eləcə də özündə soyuqdəymə əlamətləri hiss edən xəstə şəxslər namazlarını evlərində qılsınlar, məscidə gələn dindarlar şəxsi təsbehlərindən, canamazlarından, möhürlərindən istifadə etsinlər, mümkün qədər dəstəmazlarını evdə alsınlar. Eyni zamanda, məscidə gələn şəxslər bir-biri ilə yaxın təmasdan, əl görüşmələrindən çəkinsinlər.
QMİ kütləvi yoluxma riskini nəzərə alaraq vətəndaşlarımızın sağlamlığı naminə müvəqqəti olaraq məscidlərimizdə moizələrin və birgə ibadətlərin təxirə salınmasını, camaat namazlarının uzadılmadan icra olunmasını, xütbələrin qısaldılmasını din xadimlərimizə və dindarlarımıza tövsiyə edir. İmkan daxilində dindarlarımızın evlərində fərdi qaydada namaz qılmasını, sanitar-epidemioloji vəziyyət imkan vermədiyi təqdirdə məsciddaxili bütün tədbirlərin, mövlud, şəhadət, ehsan məclislərinin təxirə salınmasını məsləhət görürük. Həqiqətən də, başqalarını yoluxucu xəstəliklərə düçar etməmək üçün Cümə namazı və digər mərasimləri müəyyən bir müddətə təxirə salmaq şəriətimizə uyğundur, lakin bu heç bir şəkildə məscid və ziyarətgahların bağlanması anlamına gəlmir. Qazılarımız və din xadimlərimiz öz yerlərində dindarlara və icma üzvlərinə mövcud vəziyyətlə əlaqədar mövqeyimizi və tövsiyələrimizi çatdırmağa məsuldurlar.
QMİ əmin olduğunu bildirir ki, dindarlarımız cəmiyyətimiz və ailələrimiz üçün təhlükəli olan məqamda təlaş və vəsvəsəyə qapılmadan tibbi-profilaktik tədbirlərə riayət edəcək, vacib saydığımız tövsiyələri anlayışla qarşılayacaqlar. Bu müvəqqəti çətinlik dövrümüzdə tövsiyələrimizi nəzərə almayanlar, təəssüf ki, mövcud vəziyyətin məsuliyyətini dərk edə bilməyənlərdir. Ümid edirik ki, Allah-Təala tezliklə xalqımızın üzərindən bu bəlanı dəf edəcək, səbat və rifahımız bərqərar olacaqdır, İnşallah”.

Paylaş:

Baxılıb: 533 dəfə