ATİB Ermənistanın təxribatını və Azərbaycanın ərazi bütövlüyünə yönəlmiş təcavüzünü qəti şəkildə pisləyir

Bakı:

20 °C

77 %

6 m/s

AZ RU EN

Ana səhifə / Sosial / ATİB Ermənistanın təxribatını və Azərbaycanın ərazi bütövlüyünə yönəlmiş təcavüzünü qəti şəkildə pisləyir

ATİB Ermənistanın təxribatını və Azərbaycanın ərazi bütövlüyünə yönəlmiş təcavüzünü qəti şəkildə pisləyir

17.07.2020 [07:56]

Məlum olduğu kimi, Ermənistan silahlı qüvvələri iyulun 12-dən başlayaraq Azərbaycan-Ermənistan dövlət sərhədinin Tovuz istiqamətində növbəti təxribat törədərək qəflətən hərbi postumuza artilleriya atəşi açıb və mövqelərimizi ələ keçirməyə cəhd göstərib. Düşmən tərəfin Tovuz istiqamətində törətdiyi təxribat nəticəsində bir neçə hərbiçimiz həlak olub və yaralanıb. Eyni zamanda, şəhidlər versək də, ordumuz bu dəfə də düşmənin hərbi bölmələrinə sarsıdıcı zərbələr endirib, dövlət sərhədlərimizi rəşadətlə qoruyub. Azərbaycan Ordusunun həyata keçirdiyi əks-tədbirlər nəticəsində düşmən geri otuzdurulub, onun canlı qüvvəsinə və hərbi texnikasına ciddi zərər yetirilib.
Qeyd edək ki, Ermənstanın növbəti təcavüz aktı bir sıra ölkələr, həmçinin müxtəlif qurumlar tərəfindən qətiyyətlə pislənilib, bununla bağlı verilən bəyanatlarda birmənalı olaraq bildirilib ki, münaqişə sülh yolu ilə, beynəlxalq hüququn qəbul olunmuş prinsip və normaları, yəni Azərbaycanın beynəlxalq səviyyədə tanınmış sərhədləri çərçivəsində Azərbaycan Respublikasının suverenliyi və ərazi bütövlüyünə hörmət əsasında həllini tapmalıdır.
Öz növbəsində Azərbaycan Türkiyə İş Adamları Birliyi (ATİB) son hadisələrlə bağlı bəyanat qəbul edib. “Azərbaycan Türkiyə İş Adamları Birliyi özünün çoxsaylı üzvləri timsalında son günlərdə baş verən döyüşlərdə Vətənin bütövlüyü uğrunda qəhrəmancasına şəhid olmuş zabitlərimizə, hərbi qulluqçularımıza və vətəndaşımıza Allahdan rəhmət diləyir, ailələrinə və yaxınlarına dərin hüznlə başsağlığı verir. Yaralanmış əsgərlərimizə Allahdan şəfa və tezliklə sağalaraqVətənin müdafiəsinə dönmələrini diləyirik” sözləri ilə başlayan bəyanatda deyilir ki, ATİB Ermənistanın təxribatını və Azərbaycanın ərazi bütövlüyünə yönəlmiş təcavüzünü qəti şəkildə pisləyir, Azərbaycan Respublikasının Prezidenti, Silahlı Qüvvələrimizin Ali Baş Komandanı cənab İlham Əliyevin rəhbərliyi ilə Azərbaycanın şərəfli Milli Ordusunun bu təcavüzün qarşısının alınmasındakı fəaliyyətini yüksək qiymətləndirir və dəstəkləyir.
“Təəssüf ki, beynəlxalq ictimaiyyətin bəzi üzvləri yenə də Ermənistanın açıq-aşkar təcavüzünü qəti şəkildə pisləməməklə və özünün torpaqlarını qoruyan, bütün beynəlxalq hüquq normalarına görə haqlı olan Azərbaycanı da Ermənistanla bir sıraya qoymaqla özlərinin əsl xislətlərini göstərirlər. Beynəlxalq hüquq prinsiplərinə zidd olan bu cür mövqeləri qəti şəkildə pisləyir, beynəlxalq ictimaiyyəti Ermənistan-Azərbaycan münaqişəsi üzrə ədalətli mövqe sərgiləməyə çağırırıq.
Bu baxımdan qardaş Türkiyənin nümayiş etdirdiyi ədalətli mövqeni və Azərbaycana verdiyi birmənalı dəstəyi təqdir edir, Türkiyə Respublikasının Prezidenti cənab Rəcəb Tayyib Ərdoğanın 14 iyul 2020-ci il tarixində verdiyi bəyanatı vətənlərini sevən bütün Azərbaycan və Türkiyə vətəndaşları kimi yüksək qiymətləndiririk. Bu bir daha göstərdi ki, Türkiyə qədim dostluq bağları və qardaşlıq münasibətlərinin olduğu Azərbaycanın haqqına, hüququna və torpaqlarına yönəlik hər cür hücumun qarşısında yer almaqda əsla tərəddüd göstərməyəcək və Türkiyə bütün imkanları ilə Azərbaycanın yanında olmağa davam edəcək.
ATİB-in işğal edilmiş torpaqlarımızın Silahlı Qüvvələrimizin Ali Baş Komandanı cənab İlham Əliyevin rəhbərliyi ilə şanlı və müzəffər ordumuz tərəfindən azad ediləcəyinə inamı tamdır və Azərbaycanı, Vətənini sevən hər kəsi Milli Ordumuzun ətrafında sıx birləşməyə dəvət edirik.
Zəfər bizimlə olacaq!”, - deyə bəyanatda daha sonra bildirilir.

Paylaş:

Baxılıb: 459 dəfə