Qorunma qaydalarına ciddi riayət olunmalıdır

Bakı:

23 °C

94 %

3 m/s

Əlaqə

AZ RU EN

Ana səhifə / Sosial / Qorunma qaydalarına ciddi riayət olunmalıdır

Qorunma qaydalarına ciddi riayət olunmalıdır

30.03.2021 [08:46]

Azərbaycanda yeni növ koronavirus (COVID-19) infeksiyasına qarşı mübarizə çərçivəsində ardıcıl və məqsədyönlü tədbirlər həyata keçirilir. Eyni zamanda, COVID-19-a qarşı vaksinasiya prosesi davam etdirilir. Amma əfsuslar olsun ki, son günlər dünya ölkələrində olduğu kimi, Azərbaycanda da virusa yoluxanların sayında artım müşahidə olunur. Mütəxəssislərin fikrincə, artımın başlıca səbəblərindən biri yoluxanlarla təmas zamanı qorunma vasitələrindən düzgün istifadə edilməməsidir.
TƏBİB-in infeksion xəstəlikləri üzrə İşçi Qrupunun rəhbəri, həkim-infeksionist Vasif Əliyev deyib ki, bir ildən çoxdur, COVID-19-la mübarizə aparırıq. Yoluxma sayında artım hallarının bir neçə dəfə şahidi olmuşuq: “Səbəb yumşaldılmalardan sonra təmasların artmasıdır. Qorunma vasitələrindən düzgün istifadə edilməməsi virusun ötürülməsini asanlaşdırır. Nəticədə yoluxma sayı getdikcə artır. Ümumiyyətlə, qorunma qaydalarına ciddi riayət olunmalıdır. Burada yenə də vətəndaş məsuliyyəti ön plana çıxır. İstər ictimai nəqliyyatda, istərsə də qapalı məkanlarda qorunma tədbirlərinə nə qədər doğru şəkildə əməl olunsa, bir o qədər çox qorunmuş oluruq”.
Həkim-infeksionist bildirib ki, tibbi maskalardan doğru istifadə olunmaması da yoluxma sayında artıma səbəb ola bilir: “Bəzi hallarda ya qoruyucu maskadan doğru istifadə olunmur, yəni burunun və ya çənənin altında olur, ya da ondan dəfələrlə istifadə olunur. Tibbi və ya cərrahi maskaların istifadə müddəti 6-8 saatdır. Bəzi insanlar maskanı cibində gəzdirir və həftələrlə istifadə edirlər. Bu zaman maska yararsız hala düşür. Bundan əlavə, parça materialdan olan maskalardan istifadə olunur ki, onların da hər hansı bir qoruyuculuğu yoxdur. Müxtəlifrəngli, bəzəkli parça maskalar sadəcə görüntü xarakteri daşıyır və cəzadan yayınmaq məqsədilə taxılır. Əgər onlar qoruyucu olsa idi, o zaman hər kəs evində bu maskanı hazırlayıb istifadə edə bilərdi. Bu zaman sterilizə olunmuş şəkildə, xüsusi şəraitdə hazırlanan maskalara o qədər ehtiyac olmazdı”.
“Gündəlik yoluxma statistikasına dırnaqarası baxmamalıyıq. Qış aylarında bir çox vətəndaş virusa yoluxub sağaldı və onlarda qoruyuculuq yarandı. Yanaşı olaraq peyvəndləmə prosesi də gedir. Nəzərə almaq lazımdır ki, bu xəstəlikdən yaranmış anticisim bəzən daha qısa müddətdə yox ola bilir. Yəni daimi olaraq qalmır. Təcrübədə təkrar yoluxmalar da qeydə alınır. Ona görə də “xəstəliyi əvvəl keçirmişəm və məndə anticisim var” və ya “peyvənd olunmuşam arxayın ola bilərəm” kimi fikirlərdən yayınmaq lazımdır. Həmin şəxslər də hər kəs kimi qorunma tədbirlərinə əməl etməlidirlər”, - deyə mütəxəssis vurğulayıb.
Həkim-infeksionist Aytən Məmmədova isə vaksinasiya prosesinin COVID-19-a qarşı effektiv mübarizə üsulu olduğunu deyib. O bildirib ki, vaksinasiyaya könüllü qoşulanların sayı getdikcə artır: “Ölkəmizdə vaksinasiya tədbirləri davam edir. Peyvənd olunan şəxslərin sayının artması xəstəliyin ağır keçməsinin və geniş yayılmasının qarşısının alınmasında azalmasında mühüm rol oynayacaq”.
Mütəxəssis vurğulayıb ki, vaksinin birinci dozası vurularkən orqanizmin immun sistemi hüceyrələrini oyatmaq üçün COVID-19-un öldürülmüş forması bədənə yeridilir: “Nəticədə, immun sistemi hüceyrələrinə həmin virusu tanıtmış oluruq. Sanki həmin hüceyrələri vücuda belə virus daxil olarsa, ona aktiv şəkildə cavab verməyə hazırlayırıq. İkinci doza vurularkən isə immun sistemi hüceyrələri virusu tanıdıqları üçün hərəkətə keçirlər. Nəticədə, immun sistemi hüceyrələri tam aktiv hala keçərək vücuda daxil ola biləcək hər hansı bir infeksiyanın qarşısını almaq üçün yüksək səviyyədə fəaliyyət göstərmiş olur. Bunlar infeksiyanın ortadan qaldırılmasında önəmli rol oynayan B-limfositlər tərəfindən anticisimciklərin, makrofajlar tərəfindən isə interferonun sintezlənməsi prosesləridir”.
Müşfiqə BAYRAMLI

Paylaş:

Baxılıb: 756 dəfə