“Bu qlobal bəladan yeganə qurtuluş yolunu vaksinasiyada görürük”

Bakı:

26 °C

78 %

4 m/s

Əlaqə

AZ RU EN

Ana səhifə / Sosial / “Bu qlobal bəladan yeganə qurtuluş yolunu vaksinasiyada görürük”

“Bu qlobal bəladan yeganə qurtuluş yolunu vaksinasiyada görürük”

09.04.2021 [08:55]

Azərbaycanda yeni növ koronavirus (COVID-19) infeksiyasına qarşı ardıcıl və məqsədyönlü mübarizə davam etdirilir. Paralel olaraq bu gün ölkəmizdə əhalinin vaksinasiya işləri uğurla reallaşır. Yeri gəlmişkən, TƏBİB bu məsələdə əsas hədəfin ölkəmizdə əhalinin 80 faizinin vaksinasiya edilməsindən ibarət olduğunu bəyan edib.
Qeyd edək ki, Azərbaycan, həmçinin COVAX təşəbbüsünə qoşulan və onu dəstəkləyən ilk ölkələrdəndir. COVAX platforması çərçivəsində Azərbaycana 84 min doza vaksin göndərilib.
“Bir ildən çoxdur ki, yeni növ koronavirus (COVID-19) infeksiyası nəticəsində ağırlaşmalar, ölüm halları ən çox eşitdiyimiz, rast gəldiyimiz məlumatlardandır. Dünyada 130 milyondan çox insan bu virusa yoluxub ki, onlardan 3 milyona yaxını həyatını itirib. Bunlar ciddi rəqəmlərdir. Bu bəladan qurtulmağımız və normal həyata qayıtmağımız üçün kütləvi immunitetin yaranması labüddür. Onun qısa müddətdə formalaşması yalnız vaksinasiya vasitəsilə mümkündür”. Bu fikirləri qəzetimizə açıqlamasında Mərkəzi Klinikanın terapevti Sevinc Ələskərova deyib.
Terapevt bildirib ki, COVID-19-la mübarizədə qısa müddətdə nəticə əldə edilməsi üçün kütləvi immunitetin yaradılması vacibdir: “Azərbaycan vaksinasiyaya ilk başlayan ölkələr sırasındadır. Ölkəmizdə hazırda Çinin “Sinovac” şirkətinin “CoronaVac” vaksinindən istifadə olunur. Aprelin 4-də isə COVAX platforması vasitəsilə Böyük Britaniya və İsveçin birgə hazırladığı “AstraZeneca” vaksini ölkəmizə gətirilib. Bundan başqa, “Sputnic V”, “Biontech/ Pfizer”, “Moderna” vaksinlərinin də ölkəmizə gətirilərək istifadəsi planlaşdırılır. Hazırda mövcud vaksinlərlə yanaşı, bir sıra ölkələr vaksin hazırlamağa davam edirlər. Hər birimiz tezliklə normal həyatımıza dönmək istəyirik. Bu da əhalinin böyük hissəsinin, yəni 80 faiz və daha çox hissənin vaksinasiyası ilə əldə oluna bilər. Yoluxma saylarının, ağırlaşmış xəstələrin, xəstəxanalarda çarpayıların dolmasını, xəstənin ev şəraitində müalicəsinin həm maddi, həm də fiziki cəhətdən çətinliklər yaratdığını nəzərə alaraq bu qlobal bəladan yeganə qurtuluş yolunu vaksinasiyada görürük”.
Mütəxəssisin sözlərinə görə, ətrafımıza nəzər salmaq, xəstəliyi ağır keçirənləri, koronavirus səbəbindən dünyasını dəyişənləri düşünmək kifayət edir ki, vaksinasiyanın nə qədər vacib olduğunu anlayaq: “Vaksinasiyanın önəminin izah olunması üçün maarifləndirmə tədbirlərinin aparılması mühüm əhəmiyyətə malikdir”.
MÜŞFİQƏ

Paylaş:

Baxılıb: 777 dəfə