Dövlət Komitəsinin təşkilatçılığı ilə sosial işçilər və psixoloqlar üçün peşəkar inkişaf təlimlərinə start verilib

Bakı:

24 °C

77 %

11 m/s

AZ RU EN

Ana səhifə / Sosial / Dövlət Komitəsinin təşkilatçılığı ilə sosial işçilər və psixoloqlar üçün peşəkar inkişaf təlimlərinə start verilib

Dövlət Komitəsinin təşkilatçılığı ilə sosial işçilər və psixoloqlar üçün peşəkar inkişaf təlimlərinə start verilib

20.04.2021 [08:57]

Pandemiya və fövqəladə vəziyyətlərdə uşaq hüquqlarının müdafiəsi, onların sosial-psixoloji dəstək xidmətlərinə çıxışının təmin edilməsi, cəmiyyətə reinteqrasiyası istiqamətində fəaliyyətlərin gücləndirilməsi mühüm əhəmiyyətə malikdir. Bununla yanaşı, çətin həyat şəraitində, baxımsız və sosial təhlükəli vəziyyətdə olan uşaqlarla işləyən mütəxəssislərin beynəlxalq təcrübə nəzərə alınmaqla bilik və bacarıqlarının artırılması zəruridir.
AZƏRTAC xəbər verir ki, Ailə, Qadın və Uşaq Problemləri üzrə Dövlət Komitəsi (AQUPDK) və Beynəlxalq Təhsil üzrə Amerika Şurasının birgə təşkilatçılığı ilə aprelin 19-da fövqəladə hal, xüsusi vəziyyət və pandemiya şəraitində ölkəmizdə mövcud olan qadın və uşaq sığınacaqlarında çalışan sosial işçilər və psixoloqlar üçün üçgünlük peşəkar inkişaf təlimlərinə start verilib.
Tədbirdə çıxış edən Ailə, Qadın və Uşaq Problemləri üzrə Dövlət Komitəsinin sədri Bahar Muradova Azərbaycanda həssas qrupdan olan insanlara xüsusi diqqət və qayğı göstərildiyini bildirib. Komitə sədri dövlətimiz tərəfindən bu istiqamətdə davamlı siyasət yürüdüldüyünü və Azərbaycanın bu sahədə özünəməxsus təcrübəsi olduğunu diqqətə çatdırıb.
Bahar Muradova deyib ki, həssas qrupdan olan insanların sayı münaqişə və müharibə nəticəsində daha da artıb. Hökumət bir sıra tədbirlər həyata keçirir. Münaqişə, müharibə və pandemiya şəraitində sosial işçilər və psixoloqlar üçün təlimlərin təşkili xüsusi aktuallıq kəsb edir.
Dövlətimiz tərəfindən uşaq strategiyası və məişət zorakılığı ilə bağlı mühüm qərarların qəbul edildiyini diqqətə çatdıran komitə sədri həssas qrupdan olan ailələrin problemlərinin vacibliyini qeyd edib. O deyib: “Psixo-sosioloji işlərin aparılması çox vacibdir. Bu istiqamətdə AQUPDK da öz üzərinə düşən vəzifələrin öhdəsindən gəlməyə çalışır. Komitə əməkdaşları 44 günlük Vətən müharibəsi dövründə erməni silahlı qüvvələrinin mülki əhalini hədəfə alması nəticəsində ziyan çəkmiş Goranboy, Ağdam və Tərtər rayonlarında 1400 ailəni ziyarət ediblər. Bundan başqa, 165 şəhid ailəsinə tərəfimizdən psixoloji dəstək göstərilib”.
Bahar Muradova həssas qrupdan olan insanlara təlimlər vasitəsilə psixoloji dəstəyin daha da artacağına ümid etdiyini bildirib.
Digər çıxış edənlər sosial işçilər və psixoloqlar üçün keçirilən təlimlərin əhəmiyyətindən danışıb, azərbaycanlı mütəxəssislərin beynəlxalq təcrübə əsasında bilik və bacarıqlarının artırılmasının vacibliyini qeyd ediblər.
Təlimlər bu sahədə təcrübəli olan peşəkar psixoloq və sosial işçi tərəfindən aparılacaq.
Təlimi uğurla bitirən iştirakçılara AQUPDK və Beynəlxalq Təhsil üzrə Amerika Şurası tərəfindən sertifikatlar təqdim ediləcək.

Paylaş:

Baxılıb: 678 dəfə