Şagirdlər məktəbə niyə at arabası ilə gedir?

Bakı:

25 °C

45 %

1 m/s

Əlaqə

AZ RU EN

Ana səhifə / Sosial / Şagirdlər məktəbə niyə at arabası ilə gedir?

Şagirdlər məktəbə niyə at arabası ilə gedir?

14.10.2021 [10:12]

Problem millət vəkilinin nəzarətindədir

Saatlı rayonunun Qara Nuru kəndində şagirdlərin at arabası ilə məktəbə getməsinə dair yerli mediada, sosial şəbəkələrdə videogörüntülərin yayılması geniş müzakirələrə səbəb olub. Cəmiyyətin müxtəlif təbəqələrinin nümayəndələri sosial şəbəkələr vasitəsilə bu vəziyyəti tənqid edir, məktəblilərin belə çətin durumunu qəbulolunmaz sayırlar.

Günah yağan yağışdadır, yoxsa...

Qeyd edək ki, həmin video-görüntüdə söhbət Qara Nuru kəndində yeni yaşayış massivinin bir küçəsindən gedir. Həmin küçənin sakini olan Cəmilə Nəcəfova bildirir ki, onların yaşadıqları küçənin təmiri ilə bağlı heç bir iş görülməyib: “Övladlarımız uzaq məsafədə məktəbə getməkdə çətinlik çəkir, bəziləri isə ümumiyyətlə getmirlər. Yağış yağanda at arabası ilə uşaqları məktəbə aparırıq”. Cəmilə xanımın sözlərinə görə, bu yeni massivdə yolların vəziyyəti çox acınacaqlıdır. Bu səbəbdən də ora ictimai nəqliyyat verilmir.

Kəndin icra nümayəndəsi yolsuzluq problemini vergilərin ödənilməməsində görür

Saatlı rayonu İcra Hakimiyyəti Başçısının Qara Nuru kəndi üzrənümayəndəsi Həmid Qasımov qəzetimizə açıqlamasında bildirib ki, sözügedən yaşayış massivində təxminən 15 ailə yaşayır: “Qara Nuru Saatlı rayonunun ən böyük kəndlərindən biridir. 8 minə yaxın əhalisi olan kənddə 141 küçə var. Kənddə iki məktəb fəaliyyət göstərir. Onlardan biri natamam, digəri isə tam orta məktəbdir. Amma video-görüntüləri yayılan sakinlərin övladları isə qonşu Sarıcalar kəndindəki tam orta məktəbdə təhsil alırlar. Yollarının problemli olduğu yeni yaşayış massivi bizim kəndin tərkibində olsa da, sakinlər üçün məsafə baxımından Sarıcalar kənd tam orta məktəbi daha yaxındır. Yaşayış massivinin küçəsinin uzunluğu təxminən 1 kilometrdir. Bu yolda təmirə ehtiyac var. Biz daxili imkanlarımız hesabına öz dəstəyimizi göstərməyə çalışırıq. Amma bu işdə sakinlər də kömək etməlidirlər. Onlar bələdiyyə vergilərini versələr, küçədə müəyyən işlər apararıq. Yəni hər hansı küçədən vergi toplanan kimi yığılan vəsait hesabına bu işlər görülür. Ona görə də, yeni yaşayış massivinin sakinləri vergiləri ödəməlidirlər”.

Əvvəllər şagirdləri məktəbə aparmaq üçün avtobus ayrılmışdı...

İcra nümayəndəsi xatırladıb ki, kənd ərazi baxımdan böyük olduğuna görə sovetlər dönəmində ibtidai sinif şagirdlərininavtobusla məktəbə aparılması təmin olunurdu: “Bunun üçün sovxoz tərəfindən avtobus ayrılmışdı. İndi isə nə icra nümayəndəliyinin, nə də bələdiyyənin bu işləri həyata keçirmək üçün nəqliyyat vasitəsi yoxdur”.

Deputat məsələyə qarışdı

Saatlı rayonunu Milli Məclisdə təmsil edən millət vəkili Əziz Ələkbərli isə qəzetimizə bildirib ki, yaranmış bu problemlə əlaqədar dərhal rayon İcra Hakimiyyətinin başçısı və Qara Nuru kənd bələdiyyəsinin sədri ilə əlaqə saxlayıb: “Çünki Qara Nuru kəndinin sakinlərindən mən indiyə qədər belə bir problemlə bağlı müraciət almamışdım. Qara Nuru Saatlının ən böyük kəndidir və təbii ki, vətəndaşların narazılğı heç bir halda diqqətdən kənarda qala bilməz. Məsələni dərhal nəzarətimizə götürmüşük”. Millət vəkili hesab edir ki, problem qısa vaxtda həllini tapacaq.

Nardar BAYRAMLI

Paylaş:

Baxılıb: 816 dəfə