Ermənistanın Avrasiya İqtisadi İttifaqına qəbul edilməsi qurum üzvləri üçün səhv addım idi

Bakı:

15 °C

67 %

12 m/s

AZ RU EN

Ana səhifə / Xarici siyasət / Ermənistanın Avrasiya İqtisadi İttifaqına qəbul edilməsi qurum üzvləri üçün səhv addım idi

Ermənistanın Avrasiya İqtisadi İttifaqına qəbul edilməsi qurum üzvləri üçün səhv addım idi

15.10.2014 [09:54]

Ekspert: İndi Rusiya nəinki hələ Sovet dövründən dotasiya ilə yaşayan Belarus və Qazaxıstanı, üstəlik Ermənistanı da yedizdirməlidir
Ötən həftə baş verən geosiyasi hadisələr sırasında ekspertlər diqqəti daha çox Minskdə keçirilən MDB dövlət başçılarının sammiti çərçivəsində Rusiya, Qazaxıstan və Belarus prezidentlərinin imzaladıqları və 1 yanvar 2015-ci il tarixdən hüquqi qüvvəyə minəcək Avrasiya İqtisadi İttifaqının (Aİİ) yaradılmasına dair müqaviləyə yönəldirlər. Belə ki, gözlənilənlərin əksinə olaraq, Qazaxıstan və Belarusun liderləri iqtisadiyyatı tamam çökmüş, vətəndaşlarının əksəriyyəti ölkəni tərk etmiş, qalan hissəsinin isə bir qarın çörək ümidi ilə yaşayan Ermənistanın da bu quruma daxil edilməsinə razılıq veriblər.
Ekspertlər isə Ermənistanın Aİİ-yə üzv qəbul edilməsini qurum üzvləri tərəfindən atılmış səhv addım kimi qiymətləndirirlər. Və məhz bu səbəbdən də Aİİ-nin gələcək taleyinə şübhə ilə yanaşırlar. Belə ki, heç kəsə sirr deyil ki, hələ Sovet dövründə mərkəzdən ayrılan dotasiya hesabına öz büdcəsini formalaşdıran Belarus və Qazaxıstan respublikalarının hazırkı iqtisadi potensialı və göstəriciləri 30 il bundan əvvəlki dövrdən çox da yüksək deyil. Üstəlik, dövlət büdcəsi əsasən diaspor ianələri hesabına formalaşan Ermənistanın da bu quruma daxil olması Aİİ daxilində iqtisadi münasibətlərə mənfi təsirsiz ötüşməyəcək. Başqa sözlə, sözügedən ölkələr yenə də Rusiyanın dotasiyasına göz dikmiş olacaqlar. Rusiya isə hazırkı durumu ilə həmin ölkələri “yedirtmək” iqtidarında deyil. Ukrayna ətrafında baş verən hadisələrdən sonra Qərbin Rusiyaya qarşı tətbiq etdiyi embarqo artıq çox yaxın aylarda bu ölkənin iqtisadiyyatında öz acı nəticəsini göstərmiş olacaq. Digər tərəfdən isə, ekspertlər belə hesab edirlər ki, quruma daxil olan 4 ölkə arasında ticarət-iqtisadi əlaqələrin çox da yüksək olmaması Aİİ-nin səmərəliliyinə əsas maneə yaradacaq. Bundan əlavə, Rusiyanın gömrük rüsumlarını aşağı endirmək istiqamətindəki səyləri bu ölkənin iqtisadiyyatına da öz mənfi təsiri göstərəcək.
Ekspertlərin qənaətinə görə, Ermənistanın hazırkı sərhədləri daxilində Aİİ-yə daxil edilməsi Rusiya, Qazaxıstan və Belarus prezidentlərinin Dağlıq Qarabağın de-yure və de-fakto olaraq Azərbaycan torpaqları kimi tanımalarını bir daha təsdiqləmələri anlamına gəlir. Digər tərəfdən isə, Ermənistan prezidenti Minskdə imzaladığı məlum sazişlə, 1 yanvar 2015-ci il tarixindən işğal altındakı Dağlıq Qarabağla sərhədinə gömrük postu yerləşdirmək öhdəliyini öz üzərinə götürüb. Yəni, 2015-ci ilin yanvarından ittifaqın fəaliyyətə başlaması ilə Azərbaycanın işğal altında olan Qarabağ bölgəsinin İrəvandan kartof-soğan daşıyan ac-yalavac erməni sakinləri indən belə Ermənistanla sərhəddə buna görə üstəlik hələ gömrük rüsumları da ödəməli olacaqlar. Bunun isə işsizlik və kasıblıqdan batıb gedən ermənilərə necə “xoş gələcək” vəd etməsi gün kimi aydındır. Ekspertlər Serj Sarkisyanın rəsmi İrəvan üçün sadəcə, rüsvayçılıqdan başqa bir şey ifadə etməyən həmin sazişi tərəddüd içində imzalayar-imzalamaz Ermənistan paytaxtını etiraz aksiyaları bürüməsini heç də təsadüfi hesab etmirlər. Mitinqlərdə səslənən fikirlərdən belə aydın olur ki, ermənilər Sarkisyanı müstəqil erməni dövlətini məhv etməkdə günahlandırırlar. Və verilən proqnozlar onu göstərir ki, Ermənistanın hazırkı rəhbərliyinin yürütdüyü daxili və xarici siyasətdən narazı olan xalq yaxın günlərdə yenidən küçələrə axışacaq. Belə olduğu təqdirdə isə, Sarkisyanın ermənilərin milli maraqlarını satmaqda ittiham olunacağı günün çox da uzaq olmadığı aydın olur.
Səlim LOĞMANOĞLU

Paylaş:

Baxılıb: 1421 dəfə