Xarici işlər nazirlərinin növbəti görüşü...

Bakı:

24 °C

66 %

3 m/s

Əlaqə

AZ RU EN

Ana səhifə / Xarici siyasət / Xarici işlər nazirlərinin növbəti görüşü...

Xarici işlər nazirlərinin növbəti görüşü...

21.09.2022 [10:15]

ABŞ Ermənistanın törətdiyi hərbi təxribatları pisləməlidir

BMT Baş Assambleyasının 77-ci sessiyasının yüksək səviyyəli həftəsi çərçivəsində ABŞ dövlət katibi Entoni Blinkenin təşəbbüsü və iştirakı ilə Azərbaycanın xarici işlər naziri Ceyhun Bayramovla Ermənistanın xarici işlər naziri Ararat Mirzoyan arasında görüş keçirilib.

Görüşdə nazir Ceyhun Bayramov postmünaqişə dövründə bölgədə sülhün təmin olunması və bu istiqamətdə zəruri addımlar barədə Azərbaycanın mövqeyini diqqətə çatdırıb. Ceyhun Bayramov sentyabrın 12-14-də Ermənistanın Azərbaycana qarşı təxribatlar və hücumlar həyata keçirməklə toqquşmalara səbəb olduğunu, bir neçə saat ərzində əldə edilmiş ilkin atəşkəsin də Ermənistan tərəfindən pozulması faktını və bununla əlavə itkilərə səbəb olduğunu vurğulayıb. Azərbaycanın bölgədə genişmiqyaslı yenidənqurma işləri həyata keçirən və keçmiş məcburi köçkünləri bölgədə yerləşdirən tərəf kimi sabitliyin pozulmasında maraqlı olmadığını bildirib.

Nazir Ermənistanın 30 il ərzində ölkəmizin beynəlxalq tanınmış ərazilərinin işğalının törətdiyi dərin fəsadlara baxmayaraq, 44 günlük Vətən müharibəsindən dərhal sonra sülh müqaviləsi imzalanması təklifini irəli sürdüyünü və bu istiqamətdə ardıcıl təşəbbüslərlə çıxış etdiyini xatırladıb. Azərbaycanın Ermənistanla normallaşma prosesi, kommunikasiyaların açılması, sərhədlərin delimitasiyası və demarkasiyası, habelə humanitar istiqamətlərdə səy göstərməsinə baxmayaraq, Ermənistanın proseslərə maneçilik törətdiyini, üçtərəfli bəyanatlar çərçivəsində öhdəliklərini kobud şəkildə pozduğunu bildirib. O, liderlər arasında üçtərəfli bəyanatlara və Brüssel görüşünün nəticələrinə uyğun olaraq davamlı sülhün təmin edilməsi istiqamətində təxirəsalınmaz danışıqlarına hazırlığını bir daha diqqətə çatdırıb.

ABŞ dövlət katibi Entoni Blinken isə deyib ki, iki ölkənin sərhədində döyüşlərin dayandırılması və son bir neçə gündə heç bir əlavə hərbi əməliyyatın olmaması müsbət haldır. “Həm Azərbaycan Prezidenti İlham Əliyevlə, həm də Ermənistanın baş naziri Nikol Paşinyanla son telefon söhbətlərimdə hər iki lider mənə sülhə hazır olduqlarını bildirdilər. Güclü, davamlı diplomatik əlaqə hamı üçün ən yaxşı yoldur. Ermənistanla Azərbaycan arasında fikir ayrılıqlarını diplomatiya yolu ilə həll edən davamlı sülhə aparan yol var. Birləşmiş Ştatlar bu səyləri dəstəkləmək üçün əlindən gələni etməyə hazırdır”, - deyə Blinken vurğulayıb.

ABŞ Dövlət Departamentinin bəyanatında isə bildirilir ki, dövlət katibi Entoni Blinken Nyu-Yorkda danışıqlar aparan Ermənistan və Azərbaycanın xarici işlər nazirlərini sentyabrın sonunadək yenidən görüşməyə dəvət edib. “Blinken insan itkisinə görə başsağlığı verib və gələcək döyüşlərin qarşısının alınmasının vacibliyini vurğulayıb. Onlar növbəti addımları müzakirə ediblər və dövlət katibi tərəfləri ayın sonuna qədər yenidən görüşməyə çağırıb”, - deyə, bəyanatda qeyd olunur.

Nazirlərin görüşü ilə bağlı gözləntiləri şərh edən Milli Məclisin deputatı Ramil Həsən qəzetimizə açıqlamasında bildirib ki, BMT Baş Assambleyasının 77-ci sessiyası çərçivəsində baş tutan görüş müsbət qiymətləndirilməlidir. Çünki Azərbaycan sülhə sadiqdir və bu yolda danışıqlara həmişə hazırdır. Onun sözlərinə görə, beynəlxalq birlik Azərbaycanın Cənubi Qafqazda sülh və əməkdaşlıq təşəbbüslərini dəstəkləyir. Ona görə də, Ermənistan mövcud reallıqların, irəli sürülən təşəbbüslərin önəmini anlamalı, qeyri-konstruktiv mövqeyindən əl çəkməlidir.

Millət vəkilinin fikrincə, Ermənistan hazırda bölgədə təxribatlar törətməklə məşğuldur: “Azərbaycan isə bölgədə reallıqların tamamilə fərqindədir. Bu gün rəsmi Bakının təklif etdiyi model bölgəyə rifah və gələcək vəd edir. Azərbaycanın addımları beynəlxalq birlik tərəfindən də təqdir olunur. Bütün siyasi güclər fərqindədir ki, Azərbaycanın təşəbbüsləri sülh və əməkdaşlığa xidmət edir. Amma təəssüflər olsun ki, Ermənistanın bugünkü qeyri-konstruktivliyinin səbəbkarı olan beynəlxalq güclər də var”. Həmsöhbətimiz deyib ki, bəzi dairələr hələ də Ermənistandan təzyiq vasitəsi kimi istifadə etməyə çalışırlar: “Rəsmi İrəvanın hələ də Qarabağın “statusu” və Minsk qrupu ilə bağlı sayıqlamaları təsadüf sayıla bilməz. Bu səbəbdən də ABŞ Ermənistanı sülhə gətirmək üçün öz təsir imkanlarından istifadə etməlidir. ABŞ Nümayəndələr Palatasının spikeri Nensi Pelosinin İrəvana gəlib Azərbaycanın əleyhinə əsassız bəyanatlar verməsi qəbulolunmazdır. Nazirlərin görüşünə vasitəçilik edən dövlət katibi Blinken də Ermənistanın təxribatlara son qoymağa, sülh razılaşmalarına əməl etməyə çağırmalıdır. Rəsmi Vaşinqtonun İrəvana təsir imkanları böyükdür”.

Nardar BAYRAMLI

Paylaş:

Baxılıb: 1084 dəfə