Antiterror əməliyyatı Azərbaycanın ərazi bütövlüyünü tam təmin etdi

Bakı:

26 °C

65 %

9 m/s

Əlaqə

AZ RU EN

Ana səhifə / YAP xəbərləri / Antiterror əməliyyatı Azərbaycanın ərazi bütövlüyünü tam təmin etdi

Antiterror əməliyyatı Azərbaycanın ərazi bütövlüyünü tam təmin etdi

12.09.2024 [16:44]

Azərbaycanın Zəfər tarixi Xankəndi, Xocalı, Ağdərə, Xocavənd, Əsgəranda üçrəngli bayrağımızın yüksəldilməsi, ərazi bütövlüyümüzün tam bərpası ilə yekunlaşdı. 2023-cü il noyabrın 8-də Xankəndi şəhərində Vətən müharibəsində əldə edilən Zəfərin üçüncü ildönümünə həsr olunan təntənəli hərbi paradın keçirilməsi Qələbəmizin möhtəşəm simvoluna çevrildi. Bütün bunlar göstərdi ki, müharibədəki təcrübənin tətbiqindən sonra artıq antiterror əməliyyatı zamanı qısa müddətdə düşmən darmadağın edildi. Bu antiterror əməliyyatına dünyada unikal əməliyyat kimi baxırlar, onunla maraqlanırlar. Çox sevindirici haldır ki, Müzəffər Ali Baş Komandanın rəhbərliyi ilə Azərbaycan Ordusunun əməliyyatları bu gün bütün dünyada dərindən öyrənilir.

Azərbaycan Ordusunun 2023-cü il sentyabrın 19-20-də həyata keçirdiyi lokal xarakterli antiterror tədbirləri dünya hərb tarixində nadir əməliyyatlarından biri hesab olunur. Əməliyyatın əsas hədəflərini Qarabağ ərazisində erməni silahlı birləşmələrinin və separatçı rejimin mövcudluğuna son qoyulması təşkil edirdi. Bundan əlavə Ermənistanın baş naziri Nikol Paşinyanın qondarma “Artsax”ı təbrik etməsinin Azərbaycanın səbrini tükətmişdi. Həm BMT-nin qətnamələrinə, həm də üçtərəfli Bəyanatın müvafiq bəndinə uyğun olaraq Azərbaycan Ordusu təhlükəsizliyini təmin etmək üçün lokal antiterror tədbiri həyata keçirməyə məcbur oldu. Qondarma rejimin Ermənistan tərəfindən silahlandırması, Qarabağ ərazisində terror aktlarının törədilməsi, azərbaycanlı mülki şəxslərə və polis əməkdaşlarına qarşı hücumlar bu əməliyyatı qaçılmaz etdi. Azərbaycanın dörd min kvadratkilometr ərazisinin 23 saatdan da az vaxtda azad olunması, qanunsuz erməni silahlı dəstələrinin darmadağın edilməsi ilə nəticələnmiş bu antiterror tədbirlərinin dünya hərb tarixində nadir əməliyyatlarından biri hesab olunduğunu dəfələrlə yazılıb. Eyni zamanda, bu, mülki əhaliyə heç bir zərər yetirilmədən aparılmış uğurlu əməliyyat kimi diqqəti cəlb edib. Heç bir erməni mülki vətəndaşı zərər görmədən və ya infrastruktura ziyan vurulmadan terrorçular tərksilah olundu. Nəticədə azərbaycanlılar öz tarixi torpaqlarına qayıtmaq imkanı əldə etdi. Lokal antiterror tədbirlərinin həyata keçirilməsi ilə Azərbaycanın ərazi bütövlüyü və suverenliyi tam bərpa edildi. Fəaliyyəti sıfıra bərabər olan ATƏT-in Minsk qrupuna heç bir ehtiyac qalmadı. BMT-nin dörd qətnaməsinin tələblərini Azərbaycan özü yerinə yetirdi.

Onu da deyim ki, işğaldan azad olunan ərazilərdə parlament seçkiləri üzrə səsvermənin təşkili, bütün dünyadan gələn iş adamlarının, siyasi xadimlərin, dost dövlətlərin rəhbərlərinin Qarabağda qəbul edilməsi olduqca qürurvericidir. Lokal antiterror tədbirləri həm də Azərbaycan ərazisində qondarma parlament yaradaraq onu Şuşaya köçürmək istəyən Ermənistan baş nazirinə ədalətli cavab oldu.
44 günlük Vətən müharibəsindən sonra Xocalının, Xankəndinin, Ağdərənin Azərbaycanın nəzarətinə qaytarılması çox çətin görünürdü. Dövlətimizin başçısı Brüsseldə keçirilən görüşlərdə və danışıqlarda Azərbaycan ərazilərinin müzakirə mövzusu olmadığını vurğulayırdı. Bu mənada Prezident və parlament seçkilərinin tarixi mahiyyəti Xankəndidə, Şuşada, Xocalıda keçirilməsi oldu. Son zamanlar bəzi istiqamətlərdə Ermənistan tərəfi təxribatlara əl atır. Onlar şərti sərhəddə mövqelərini bərkidir, pilotsuz uçuş aparatları ilə kəşfiyyat aparmağa cəhd göstərirlər. Kəlbəcər istiqamətində ermənilərin və havadarlarının birgə hərbi təlimləri də həmin təxribatlardan biridir. Azərbaycan isə bütün bu təxribatları təmkinlə, qətiyyətlə dəf edərək, öz sülhsevər siyasətini dünyaya nümayiş etdirir, Qarabağda böyük quruculuq işləri həyata keçirir.

David İbramxəlilov,
YAP Qusar rayon təşkilatının sədri

Paylaş:

Baxılıb: 937 dəfə