Milli maraqlar hər zaman ön plandadır

Bakı:

26 °C

61 %

10 m/s

Əlaqə

AZ RU EN

Ana səhifə / YAP xəbərləri / Milli maraqlar hər zaman ön plandadır

Milli maraqlar hər zaman ön plandadır

06.01.2025 [17:53]

Meydanəli Yolçiyev,

YAP Daşkəsən rayon təşkilatının sədri

Dekabrın 25-də Bakı-Qroznı istiqaməti üzrə uçan AZAL təyyarəsinin Qazaxıstanın Aktau şəhəri yaxınlığında qəzaya uğraması həm Azərbaycan, həm də beynəlxalq ictimaiyyət üçün sarsıdıcı hadisə oldu. Qəzadan sonra Azərbaycan Prezidenti dərhal hadisəyə reaksiya göstərərək ciddi tədbirlər gördü və dövlətin mövqeyini açıq şəkildə ifadə etdi.

Prezident İlham Əliyev hadisə barədə məlumat alan kimi uçuş istiqamətini dəyişərək Bakıya geri qayıtdı və operativ müşavirə keçirdi. Qəzadan sonra hökumət tərəfindən Dövlət Komissiyası yaradıldı və Azərbaycan nümayəndələri dərhal Aktauya ezam olundu. İlk növbədə qəzanın texniki aspektlərini araşdırmaq, sübutlar toplamaq və vəziyyətin tam mənzərəsini yaratmaq üçün foto və video materiallar əldə edildi.

Qəzaya ilkin olaraq təyyarənin xarici təsirə məruz qalması səbəb kimi göstərildi. Bu təsirlər, xüsusən də radioelektron müdaxilə və yerdən açılan atəşin nəticələri açıq-aşkar aviasiya qaydalarının pozulduğunu göstərir. Hadisənin Rusiya ərazisində baş verməsi və bəzi dairələrin təyyarənin vurulmasını ört-basdır etmə cəhdləri Azərbaycan tərəfinin qətiyyətli mövqeyini daha da gücləndirdi.

Azərbaycan tərəfi Dövlətlərarası Aviasiya Komitəsinin araşdırmada aparıcı rol oynamağına qarşı çıxaraq beynəlxalq ekspertlərdən ibarət qrupun yaradılmasını təmin etdi. Bu, obyektivliyin qorunması və nəticələrin şəffaf olması baxımından önəmli addım idi.

Dövlətimizin başçısı qəza zamanı həyatını itirən və xəsarət alan ekipaj üzvlərinin qəhrəmanlığını yüksək qiymətləndirdi. Onların peşəkarlığı və fədakarlığı nəticəsində qəzanın daha ağır fəsadları qarşısı alındı. Xüsusilə, ekipaj üzvlərinin sərnişinləri xilas etmək üçün göstərdiyi səylər Azərbaycanın aviasiya tarixində əsl qəhrəmanlıq nümunəsi kimi qiymətləndirildi.

Qazaxıstan xilasedicilərinin və tibbi personalının dərhal reaksiyası və yardımları Azərbaycan tərəfindən yüksək qiymətləndirildi. Prezident İlham Əliyev Qazaxıstan Prezidenti Kasım-Jomart Tokayevlə telefon danışığı zamanı bu yardımlara görə minnətdarlığını bildirdi və qəzanın araşdırılması prosesində hər iki ölkənin birgə əməkdaşlığının əhəmiyyətini vurğuladı. Bu hadisə Azərbaycan-Qazaxıstan dostluq münasibətlərinin sınaqdan çıxdığını və daha da möhkəmləndiyini bir daha təsdiq etdi.

Azərbaycan Rusiyadan hadisə ilə bağlı açıq və ədalətli mövqe gözlədiyini bəyan etdi. Cənab İlham Əliyev Azərbaycanın konkret tələblərini irəli sürdü: Rusiya tərəfi Azərbaycandan üzr istəməlidir. Günahını etiraf etməlidir. Günahkarları cəzalandırmalı və təzminat ödəməlidir.

Bu tələblərin bəziləri artıq qəbul olunsa da, Azərbaycan tərəfi digər şərtlərin də yerinə yetirilməsində israrlıdır. Azərbaycan Prezidenti bu məsələdə qətiyyətli və prinsipial yanaşmasını açıq şəkildə ifadə edib.

Hadisədən sonra cənab İlham Əliyevin göstərişi ilə AZAL-ın Rusiyanın bəzi şəhərlərinə uçuşları dayandırıldı. Təhlükəsizlik məsələlərinin prioritet olduğunu vurğulayan dövlət rəhbərliyi, sərnişinlərin təhlükəsizliyini təmin etmək üçün bu qərarı qaçılmaz adlandırdı.

AZAL təyyarəsinin qəzaya uğraması beynəlxalq aviasiya və diplomatiya sahəsində ciddi müzakirələrə səbəb oldu. Hadisəyə Azərbaycanın qətiyyətli və ədalətli yanaşması bir daha göstərdi ki, milli maraqlar hər zaman ön plandadır. Prezident İlham Əliyevin bu məsələdə göstərdiyi prinsipial mövqe ölkənin təhlükəsizlik, obyektivlik və beynəlxalq hüquqa əsaslanan mövqeyini açıq şəkildə ortaya qoyur. Hadisənin tam araşdırılması və nəticələrin dəqiqləşdirilməsi istiqamətində işlər davam edir və Azərbaycan xalqı prosesin şəffaf şəkildə aparılmasını yaxından izləyir.

Paylaş:

Baxılıb: 548 dəfə