Azərbaycan imza atdığı ilkləri ilə dünyanın diqqətindədir

Bakı:

25 °C

47 %

9 m/s

Əlaqə

AZ RU EN

Ana səhifə / YAP xəbərləri / Azərbaycan imza atdığı ilkləri ilə dünyanın diqqətindədir

Azərbaycan imza atdığı ilkləri ilə dünyanın diqqətindədir

17.02.2025 [17:21]

Anar Nəbiyev,

YAP Qazax rayon təşkilatının sədri

Afrika qitəsinin şərqində yerləşən Somali İslam Əməkdaşlıq Təşkilatının və Qoşulmama Hərəkatının üzvüdür. Bu müsəlman ölkəsi İƏT və Qoşulmama Hərəkatı çərçivəsində Azərbaycanla qarşılıqlı hörmətə, dəstəyə və həmrəyliyə əsaslanan mühüm əməkdaşlıq əlaqələrinə malikdir. Somali Prezidenti Hasan Şeyx Mahmudun 12-13 fevral tarixlərində ölkəmizə rəsmi səfəri Azərbaycanın Afrika ölkələri ilə sürətlə inkişaf edən siyasi münasibətlərinə, o cümlədən Somali üçün yaratdığı yeni imkanlara işıq saldı.

Prezidentlərin təkbətək və geniş tərkibdə görüşlərində, mətbuata bəyanatlarında iki ölkə arasında əlaqələrin inkişafında xüsusi diqqət göstərilən sahələrdən bəhs edildi. Hər bir səfərin əhəmiyyətini, mahiyyətini nümayiş etdirən mühüm məqamlardan biri sənədlərin imzalanmasıdır. Somali Prezidentinin səfəri çərçivəsində imzalanan sənədlər münasibətlərimizin gələcək inkişafı barədə aydın təsəvvür yaradır.

Qeyd edək ki, imzalanan sənədlərdən biri “Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi ilə Somali Federativ Respublikasının Prezidentinin Ofisi arasında dövlət xidmətlərinin göstərilməsi sahəsində əməkdaşlığa dair Anlaşma Memorandumu”dur. Azərbaycan brendi kimi dünyaya səs salan “ASAN xidmət” layihəsinə dəstək özünü aydın şəkildə nümayiş etdirdi. Reallıq budur ki, ölkəmiz hər zaman yeni təcrübələrin öyrənilməsinə və tətbiqinə xüsusi maraq göstərir. Məhz İKT sektorunda əldə olunan uğurlara söykənərək, bu fikri böyük əminliklə qeyd edirik ki, Azərbaycan bu gün dünyada təkcə neft-qaz ehtiyatlarına malik ölkə deyil, həmçinin yüksək səviyyəli elmi potensiala malik və informasiya-kommunikasiya texnologiyalarının tətbiq olunduğu innovasiyalar ölkəsi kimi tanınır.

Dövlət başçısı İlham Əliyev mətbuata bəyanatında bildirdi ki, dövlət xidmətləri sahəsində işbirliyinin əhəmiyyətini vurğulamaq istərdim. Əslində, imzalanmış razılaşmalardan biri həmin sahəni əhatə edir. Azərbaycanda artıq uğurla işləyən sistem – ASAN dövlət xidmətləri sistemi bir çox beynəlxalq mükafatlara layiq görülüb. Ən mühüm mükafat isə Azərbaycan xalqının verdiyi qiymətdir. Çünki Azərbaycanda ASAN xidmətlərin bəyənilmə reytinqi 100 faizə yaxındır. Bu, həqiqətən göstərir ki, həmin xidmət insanların həyatını daha da asanlaşdırır.

Qeyd edək ki, səfər çərçivəsində Somali Federativ Respublikasının Prezidenti Hasan Şeyx Mahmud "ASAN xidmət” mərkəzinin fəaliyyəti ilə tanış oldu. Qonağa Prezident İlham Əliyevin təşəbbüsü əsasında yaradılmış “ASAN xidmət” mərkəzləri və sosial innovasiyalar istiqamətində həyata keçirilən layihələr barədə ətraflı məlumat verildi. Ali qonağa “ASAN xidmət” modeli ilə bağlı təqdimat edildi. Hazırda Azərbaycanın intellektual brendinin 20-dən çox ölkəyə ixrac edildiyi diqqətə çatdırıldı.

Hasan Şeyx Mahmud Prezident İlham Əliyevin şəxsi təşəbbüsü ilə yaradılan “ASAN xidmət”in onda yüksək təəssürat yaratdığını və əhalinin dövlət xidmətlərinə əlçatanlığının təmin edilməsində mühüm rol oynadığını vurğuladı. Həmçinin o, “ASAN xidmət”in dövlət xidmətlərinin göstərilməsi sahəsində ən yüksək peşəkarlıq və səmərəlilik səviyyəsi olduğunu, burada vətəndaşların işlərini sürətləndirmək üçün yaxşı imkanların yaradıldığını bildirdi. Somali Prezidenti Azərbaycan təcrübəsi əsasında ölkəsində dövlət xidmətləri mexanizminin yenilənməsinə və bununla bağlı verilən dəstəyə görə Azərbaycan Prezidentinə minnətdarlığını ifadə etdi. Ali qonağa, həmçinin “INNOLAND” İnkubasiya və Akselerasiya Mərkəzi, Səyyar ASAN xidmət, “ABAD” publik hüquqi şəxsin fəaliyyəti ilə əlaqədar ətraflı məlumat verildi.

Göründüyü kimi, Azərbaycan imza atdığı ilkləri ilə dünyanın diqqətindədir. Yeni idarəçilik sisteminin tətbiqi dayanıqlı inkişafın əsasıdır. Bu gün Azərbaycan işğaldan azad edilmiş ərazilərimizdə tətbiq etdiyi müasir idarəçilik sistemi ilə də diqqətdən kənarda qalmır. Ölkəmizin qazandığı təcrübənin tərəfdaş ölkələrlə bölüşmək istəyi əməkdaşlığın daha da möhkəmləndirilməsi üçün yeni sahələrin müəyyənləşdirilməsində maraqlı olduğunu təsdiqləyir. İki ölkə arasında müdafiə sahəsində də əməkdaşlığın prioritetliyi imzalanan sənəddə özünün aydın ifadəsini tapdı. Həmçinin Somali Prezidenti fevralın 13-də Azərbaycan Ordusunun komando hərbi hissələrinin birində oldu. Somali nümayəndə heyətinə Azərbaycan Ordusunun istifadəsində olan silah-sursat, təchizat və döyüş texnikası təqdim edildi.

Dövlət başçısı İlham Əliyev mətbuata bəyanatında bildirdi ki, müdafiə sahəsində əməkdaşlıq, təlimlər və potensial qaydada müdafiə avadanlığının birgə istehsalı, Azərbaycandan Somaliyə onun təchizatı əməkdaşlığımızın mühüm sahələrindən biri olmalıdır.

Paylaş:

Baxılıb: 479 dəfə