Nizami rayonunda 26 iyun - Azərbaycan Respublikası Silahlı Qüvvələri günü qeyd edilib

Bakı:

31 °C

48 %

6 m/s

Əlaqə

AZ RU EN

Ana səhifə / YAP xəbərləri / Nizami rayonunda 26 iyun - Azərbaycan Respublikası Silahlı Qüvvələri günü qeyd edilib

Nizami rayonunda 26 iyun - Azərbaycan Respublikası Silahlı Qüvvələri günü qeyd edilib

24.06.2025 [17:15]

Nizami Rayon İcra Hakimiyyətinin və Yeni Azərbaycan Partiyası Nizami rayon təşkilatının birgə “Konstitusiya və Suverenlik İli” çərçivəsində 26 iyun - Azərbaycan Respublikası Silahlı Qüvvələri günü münasibətilə “Qalib Azərbaycan Ordusu: qürur mənbəyi və yüksək peşəkarlıq nümunəsi” mövzusunda tədbir keçirib.

Azərbaycan Respublikasının Dövlət Himninin səsləndirilməsi ilə başlanan tədbirdə ölkəmizin ərazi bütövlüyü və suverenliyi uğrunda canlarını fəda etmiş şəhidlərimizin əziz xatirəsi birdəqiqəlik sükutla yad edilib.

Sonra Azərbaycan Respublikası Silahlı Qüvvələri tarixinə həsr edilmiş videoçarx nümayiş etdirilib.

Tədbirdə çıxış edən Nizami Rayon İcra Hakimiyyətinin başçısı Coşqun Cəbrayılov, Azərbaycan Silahlı Qüvvələrinin mayoru, Vətən Müharibəsi Qəhrəmanı Zaur Hüseynov, Vətən Müharibəsi Qəhrəmanı şəhid Əliyev Anar Vaqif oğlunun həyat yoldaşı Vüsalə Əliyeva, Yeni Azərbaycan Partiyası Nizami rayon təşkilatının sədri Ramil Vəlibəyov və başqaları 1918-ci ildə Azərbaycan Silahlı Qüvvələrinin - Milli Ordunun yaradılması tarixi və zərurəti barədə ətraflı məlumat veriblər.

Bildiriblər ki, Azərbaycan xalqının Ümummilli Lideri Heydər Əliyevin 1998-ci il tarixli Fərmanı ilə iyunun 26-sı Azərbaycan Silahlı Qüvvələri Günü elan edilərək hər il təntənə ilə qeyd olunur. Ulu Öndərin dövlətçilik məktəbinin davamçısı, Prezident, Müzəffər Ali Baş Komandanı İlham Əliyevin misilsiz səyləri nəticəsində Azərbaycan ordusu daha da güclənib və dünyanın ən güclü orduları sırasında öz yerini tutub.

Qeyd ediblər ki, Azərbaycan Silahlı Qüvvələri tariximizə Vətən müharibəsi kimi daxil olan İkinci Qarabağ savaşı zamanı dünya hərb tarixinin ən şanlı səhifələrindən birini yazıb. 44 günlük müharibənin gedişində dünya dövlətimizin qüdrətinin, dinindən və milli mənsubiyyətindən asılı olmayaraq Azərbaycan vətəndaşlarının sarsılmaz birliyinin və əzminin şahidi olub. Beynəlxalq ictimaiyyət bir daha Prezident, Ali Baş Komandan İlham Əliyevi praqmatik lider, güclü sərkərdə, tədbirli siyasətçi və nüfuzlu dövlət xadimi kimi daha yaxından tanımaq imkanı tapıb.

Diqqətə çatdırıblar ki, Milli Ordunun yaranması gününü artıq qalib xalq kimi qeyd edirik. Bu mənada təsadüfi deyil ki, bu gün qalib Azərbaycan Ordusu hər bir azərbaycanlının qürur və fəxarət mənbəyidir.

Natiqlər şanlı Silahlı Qüvvələrimizin yaranmasının 107-ci ildönümü ərəfəsində Qarabağın və Şərqi Zəngəzurun hər qarışında üçrəngli bayrağımızın qürurla dalğalanmasına görə Müzəffər Ali Baş Komandan İlham Əliyevə və rəşadətli Azərbaycan Ordusuna minnətdarlıq ifadə ediblər.

Çıxışlardan sonra respublikamızın və Nizami rayonunun ictimai həyatında fəal iştirak edən bir qrup şəhid ailəsi nümayəndələrinin və qazilərin təltifetmə mərasimi keçirilib.

Paylaş:

Baxılıb: 397 dəfə