Böyük Qayıdışın növbəti ünvanı

Bakı:

16°C

77%

10m/s

Əlaqə

AZ RU EN

Ana səhifə / YAP xəbərləri / Böyük Qayıdışın növbəti ünvanı

Böyük Qayıdışın növbəti ünvanı

26.08.2025 [18:16]

44 günlük İkinci Qarabağ müharibəsində döyüş meydanında əldə etdiyimiz parlaq Qələbə bu nəticəyə gətirib çıxardı ki, üç rayonumuz – Ağdam, Kəlbəcər və Laçın bizə qaytarıldı. Bu rayonlar bir güllə atılmadan qaytarıldı. Azərbaycan xalqı özü beynəlxalq qanunların aliliyini və tarixi ədaləti bərpa etdi. Vətən müharibəsində əldə etdiyimiz qələbə nəticəsində imzalanmış üçtərəfli Bəyanata əsasən, 2020-ci ilin 25 noyabr tarixində Kəlbəcər rayonu Azərbaycana təhvil verildi. Erməni vandalları işğaldan azad edilmiş digər torpaqlarımızda olduğu kimi, Kəlbəcər rayonunda da bütün binaları dağıdıblar. Hazırda bütün işğaldan azad edilmiş ərazilərimiz quruculuq meydanına çevrilib. Beş ildə görülən işlərin miqyası Azərbaycanın malik olduğu iqtisadi və maliyyə imkanlarının təqdimatıdır. Kəlbəcər rayonu da yenidən qurulur, soydaşlarımızın gələcəkdə daha rahat yaşayışları üçün hər cür şərait yaradılır.

Avqustun 21-də tariximizə Böyük Qayıdışın növbəti ünvanı yazıldı. Kəlbəcər şəhəri sakinlərinə qovuşdu. Dövlətimizin başçısı İlham Əliyev Qarabağa səfəri çərçivəsində Kəlbəcər və Ağdərə rayonlarında oldu, mühüm sosial obyektlərin açılışında və təməlqoyma mərasimlərində iştirak etdi, görülən işlərlə tanış oldu. Cənab İlham Əliyev Kəlbəcər şəhər sakinləri ilə görüşündə vurğuladı ki, bu gün həyatınızda tarixi bir gündür. Doğma Vətənə, doğma şəhərə 32 ildən sonra qayıdırsınız. Ədaləti, haqqımızı bərpa etdik və bugünkü tədbir bir daha onu göstərir ki, Azərbaycan xalqı iradəli xalqdır. Azərbaycan xalqı öz doğma torpağına bağlıdır və bütün çətinliklərə baxmayaraq, işğal dövründə nəinki inamımızı itirməmişik, hər birimiz - bütün xalq hər gün bu müqəddəs günü yaxınlaşdırırdı.

Kəlbəcər şəhəri indi dünyanın ən gözəl mənzərəli şəhərlərindən birinə çevrilir. Birinci mərhələdə Böyük Qayıdış Proqramı çərçivəsində Kəlbəcər şəhərində dörd yaşayış kompleksinin inşası nəzərdə tutulur və bu binalarda 10 mindən çox insan yaşayacaq. Təbii ki, lazım olan bütün digər infrastruktur layihələri də icra edilib. İşıq, su, təbii qaz çəkilib, yollar salınıb, minalardan təmizləmə işi aparılıb. İndi Kəlbəcər şəhərində gözəl məktəb tikilir və gələn il istifadəyə veriləcək. Ancaq builki dərs ilini kəlbəcərli uşaqlar modul tipli məktəbdə oxuyacaqlar.

Kəlbəcər rayonu yeni inkişaf dövrünü yaşayır. Hazırda işğaldan azad edilmiş bütün torpaqlarda bütün işlər müasir tələblər səviyyəsində həyata keçirilir. “Bizim işimiz quruculuqdur” söyləyən Prezident İlham Əliyev bildirdi ki, onlar bütün şəhər və kəndlərimizi viran qoyublar. Kəlbəcər şəhərində, kəndlərində bir dənə salamat bina qalmamışdır. O, vəhşilik idi. O, insanlığa sığmayan hərəkət idi və bunu bir nəfər yox, 10 nəfər yox, kütləvi surətdə edirdilər. Hansı cəmiyyətdə yaşayır Ermənistan? O cəmiyyət ki, işğal dövründə talançılığı özü üçün əsas gəlir mənbəyi etmişdir. Bu cəmiyyət xəstədir. Biz onlara nə etmişik ki, nə pislik etmişik ki, bu qədər vəhşiliklə üz-üzə qalaq?! Bütün şəhər və kəndlər dağıdılıb, məscidlər dağıdılıb, təhqir edilib, insanlar qətlə yetirilib, öldürülüb, yandırılıb: “Hətta İkinci Qarabağ müharibəsindən sonra bizdən vasitəçilər tərəfindən vaxt istəmişdilər, burada öz şələ-şülələrini yığmaq üçün. Biz hətta vaxt da verdik onlara. Nə etdilər? Yandırdılar, ağacları qırdılar. İnsan bunu edər? Axı, bunu təkcə separatçıların başçıları etməyiblər. Kütləvi surətdə ediblər. Yəni, biz bilməliyik ki, kiminlə üz-üzəyik, bizim qonşumuz kimdir. Keçmişimizi heç vaxt unutmamalıyıq və ayıq olmalıyıq. Əminəm ki, bütün bu amillər imkan verəcək ki, üstünlük hər zaman bizdə olsun”.

Azərbaycanın döyüş meyanında və informasiya cəbhəsində üstünlüyü qazanması ədalətə və beynəlxalq hüquqa söykənən siyasətin nəticəsidir. Ölkəmiz daim ədalətin yanındadır. Azərbaycan 30 ilə yaxın işğal dövründə dünya güclərindən ədalət gözlədi. Bəzi güclərin ikili standartlara əsaslanan siyasəti artıq tarixə qovuşan Qarabağ münaqişəsinin həlli prosesinin uzanmasına, sonda 44 günlük İkinci Qarabağ müharibəsinin baş verməsinə səbəb oldu. Dövlətimizin başçısı İlham Əliyev sözügedən görüşdə bu məqama xüsusi diqqət yönəltdi. Bildirdi ki, əgər Ermənistana qarşı o vaxt ciddi sanksiyalar tətbiq edilsəydi, işğalçı dövlət böyük dövlətlər tərəfindən cəzalandırılsaydı, əlbəttə ki, Ermənistan bizim torpaqlarımızı sülh yolu ilə qaytara bilərdi və əminəm ki, qaytaracaqdı. Sadəcə olaraq, onlara qarşı zərrə qədər təzyiq göstərilmədi, əksinə, onlar üçün bütün imkanlar açılmışdı. Bəzi ölkələr onlara milyardlarla dollar dəyərində pulsuz silahlar verirdi. İkinci Qarabağ müharibəsi və antiterror əməliyyatı nəticəsində məhv etdiyimiz və hərbi qənimət kimi götürdüyümüz Ermənistan ordusuna xaricdən verilən silahların qiyməti təqribən 5-6 milyard dollar dəyərindədir. Təbii ki, Ermənistanın bu qədər silah almaq üçün pulu yox idi. Bütün bu silahlar onlara bir məqsədlə pulsuz verilirdi- İşğal davam etsin, azərbaycanlılar heç vaxt öz dədə-baba torpaqlarına qayıtmasınlar, Ermənistanla Azərbaycan arasında bu münaqişə sülh yolu ilə həll olunmasın. Bu, tam həqiqətdir. Bu məsələni həll etmək mandatı olan ölkələr faktiki olaraq işğalı əbədi etmək istəyirdilər. Biri silahlar, biri siyasi dəstək, biri isə digər imtiyazlar verirdi. Məhz buna görə məsələ öz həllini tapmırdı. Kiməsə elə gələ bilərdi ki, Azərbaycan xalqı bununla barışacaq. Halbuki dövlət başçısı İlham Əliyev dəfələrlə bildirmişdir ki, biz bu məsələ ilə heç vaxt barışmayacağıq.

Tarixi Zəfərimiz Azərbaycan xalqının yenilməz, məğrur xalq olduğunu bir daha təsdiqlədi. Müzəffər Ali Baş Komandan İlham Əliyev Kəlbəcər şəhər sakinləri ilə görüşündə bir daha bu çağırışı etdi ki, bu gün bu gözəl binaların ətrafında görüşümüz də çox böyük rəmzi məna daşıyır. Onlar buranı dağıdıblar, biz isə qurub-yaratmışıq.

Etibar Hacıyev,

YAP Ağstafa rayon təşkilatının sədri

Paylaş:

Baxılıb: 226 dəfə