Azərbaycan–Özbəkistan strateji tərəfdaşlığı yeni mərhələdə

Bakı:

22 °C

75 %

4 m/s

Əlaqə

AZ RU EN

Ana səhifə / YAP xəbərləri / Azərbaycan–Özbəkistan strateji tərəfdaşlığı yeni mərhələdə

Azərbaycan–Özbəkistan strateji tərəfdaşlığı yeni mərhələdə

17.11.2025 [23:17]

Səyyad Mirzəyev

YAP Ağdam rayon təşkilatının əməkdaşı

Azərbaycan Respublikasının Prezidenti İlham Əliyevin Özbəkistanın Milli İnformasiya Agentliyinə (UzA) verdiyi müsahibə iki qardaş ölkə arasında münasibətlərin hazırkı səviyyəsini, strateji əməkdaşlıq perspektivlərini və regional proseslər fonunda qarşılıqlı dəstəyin əhəmiyyətini bir daha nümayiş etdirib. Müsahibədə Prezident Əliyev siyasi, iqtisadi, nəqliyyat, enerji, humanitar və təhlükəsizlik sahələrində əməkdaşlığın dinamik inkişafını xüsusi vurğulayıb. Dövlət başçısı müsahibədə Mərkəzi Asiya Dövlət Başçılarının Məşvərət Görüşündə iştirakının əhəmiyyətini qeyd edərək, region ölkələri ilə əlaqələrin son illər sürətlə dərinləşdiyini bildirib. Prezident vurğulayıb ki, qarşılıqlı səfərlərin intensivliyi, imzalanan çoxsaylı sənədlər və strateji təşəbbüslər Mərkəzi Asiya ilə Azərbaycan arasında əməkdaşlığın ən yüksək səviyyədə olduğunu göstərir.

Ötən illər ərzində Mərkəzi Asiya ölkələrinin liderlərinin Azərbaycana 30-a yaxın səfəri, Azərbaycan Prezidentinin isə region ölkələrinə 13 rəsmi səfəri bu dinamikanın bariz nümunəsi kimi göstərilir.

Prezident Əliyev müsahibədə Azərbaycan–Özbəkistan əlaqələrini qardaşlıq, etibarlı müttəfiqlik və strateji tərəfdaşlıq kimi xarakterizə edib. O, iki ölkəni birləşdirən ortaq tarix, dil oxşarlığı, mənəvi-kültürel dəyərlər və siyasi iradənin münasibətləri misilsiz səviyyəyə qaldırdığını bildirib. Özbəkistanın Azərbaycanın ərazi bütövlüyünə və suverenliyinə davamlı dəstəyi dövlət başçısı tərəfindən xüsusi təşəkkürlə qeyd olunub. Bununla yanaşı, Özbəkistanın Qarabağın bərpasına etdiyi töhfə – Füzuli şəhərində Mirzə Uluğbəy adına məktəbin inşası – iki ölkə arasındakı dostluğun simvolu kimi dəyərləndirilib.

Müsahibənin mühüm hissəsini təşkil edən iqtisadi əlaqələr üzrə Prezident İlham Əliyev bildirir ki, Azərbaycan və Özbəkistan arasında ticarət dövriyyəsi son illər sürətlə artmaqdadır. 2025-ci ilin ilk 9 ayında ticarət həcmi əvvəlki ilin eyni dövrü ilə müqayisədə 87,5% artaraq 319 milyon dollara yüksəlib.Hazırda Azərbaycanda təxminən 120-dən çox Özbəkistan sərmayəli şirkət fəaliyyət göstərir. Xankəndidə açılan birgə sənaye müəssisələri isə Qarabağın dirçəlişinə mühüm töhfə kimi qiymətləndirilir.

Prezident İlham Əliyev müsahibədə Orta Dəhlizin – Azərbaycan vasitəsilə keçən beynəlxalq nəqliyyat marşrutunun – əhəmiyyətini xüsusi vurğulayıb. O bildirib ki, ölkələr arasında tranzit daşımaların həcmi hər il artır və bu sahədə böyük potensial mövcuddur. Bakı-Tbilisi-Qars dəmir yolu, Ələt limanı, modern hava limanları və genişlənmiş avtomobil yolları Azərbaycanın regional nəqliyyatda rolunu gücləndirir.

Enerji sahəsində də əməkdaşlıq güclənir. SOCAR Özbəkistana neft və neft-kimya məhsulları ixrac edir, bərpa olunan enerji və enerji sistemlərinin inteqrasiyası üzrə yeni planlar müzakirə olunur.

Özbəkistan və Azərbaycan arasındakı mədəni əlaqələr tarixi bağlılıq və ortaq dəyərlərlə möhkəmlənir. Daşkənddə Heydər Əliyev meydanının, Bakıda “Özbəkistan Parkı”nın yaradılması iki qardaş xalqın dostluğunun rəmzidir. İki ölkə arasında imzalanmış hüquqi sənədlər əməkdaşlığın sağlam və dayanıqlı əsaslar üzərində qurulduğunu təsdiqləyir. Prezident Əliyev Özbəkistanın son illərdə həyata keçirdiyi islahatları yüksək dəyərləndirərək, ölkənin sürətli inkişafını böyük məmnuniyyətlə izlədiyini bildirib. Prezident cənab İlham Əliyev yaxın gələcəkdə Özbəkistana planlaşdırılan səfərinin münasibətlərə əlavə təkan verəcəyinə əminliyini ifadə edib. Prezident İlham Əliyevin UzA-ya müsahibəsi Azərbaycan–Özbəkistan münasibətlərinin sadəcə dostluq səviyyəsində olmadığını, artıq müttəfiqlik, strateji tərəfdaşlıq və ortaq gələcək üzərində qurulduğunu bir daha göstərdi. Bu əlaqələr təkcə iki ölkənin maraqlarına deyil, həm də regional sabitliyə, iqtisadi inteqrasiyaya və türk dünyasının birliyinə xidmət edir.

Paylaş:

Baxılıb: 583 dəfə