Gəncədə 2 Fevral – Azərbaycan Gəncləri Günü qeyd olunub

Bakı:

26 °C

64 %

8 m/s

Əlaqə

AZ RU EN

Ana səhifə / YAP xəbərləri / Gəncədə 2 Fevral – Azərbaycan Gəncləri Günü qeyd olunub

Gəncədə 2 Fevral – Azərbaycan Gəncləri Günü qeyd olunub

02.02.2026 [20:27]

Gəncə Şəhər İcra Hakimiyyətinin, YAP Gəncə şəhər təşkilatının birgə təşkilatçılığı və Gəncə Tibb Kollecinin dəstəyi ilə 2 Fevral – Azərbaycan Gəncləri Gününə həsr olunmuş tədbir keçirilib.

Tibb Kollecinin “Gənclər Evi”ndə baş tutan tədbirdə Gəncə Şəhər İcra Hakimiyyəti başçısının müavini Adil Tağıyev, Türkiyənin Gəncədəki Baş konsulu Recep Öztop, YAP Gəncə şəhər təşkilatının sədri Bayram Aslanov, Azərbaycan Dövlət Aqrar Universitetinin rektoru Zəfər Qurbanov, Azərbaycan Texnologiya Universitetinin rektoru Yaşar Ömərov, Gəncə Tibb Kollecinin direktoru, Əməkdar həkim Mehman Rzayev, Gəncə-Daşkəsən Regional Təhsil İdarəsinin rəisi Elçin Kərimov, idarə, müəssisə və təşkilat rəhbərləri, eləcə də fəal gənclər iştirak ediblər.

Tədbirdə əvvəlcə Azərbaycan Respublikasının Dövlət Himni səsləndirilib. Ümummilli Lider Heydər Əliyevin və ölkəmizin ərazi bütövlüyü və suverenliyi uğrunda canlarından keçmiş şəhidlərin xatirəsi bir dəqiqəlik sükutla yad edilib.

Gəncə Şəhər İcra Hakimiyyəti başçısının müavini Adil Tağıyev çıxış edərək gəncləri bayram münasibətilə təbrik edib, Ulu Öndər Heydər Əliyevin əsasını qoyduğu dövlət gənclər siyasətinin mərkəzində savadlı, vətənpərvər, milli-mənəvi dəyərlərə bağlı, müasir düşüncəli gəncliyin dayandığını bildirib: “Müstəqil Azərbaycan dövləti gənclərə hər zaman malik olduqları bacarıq, qabiliyyət və intellektual imkanlar müqabilində geniş meydan verməyin tərəfdarı kimi çıxış edib, bu təbəqəyə daim böyük diqqət və qayğı ilə yanaşıb.”

Gənclər siyasətinin bu gün Prezident İlham Əliyev tərəfindən uğurla davam etdirildiyini qeyd edən YAP İdarə Heyətinin üzvü,YAP Gəncə şəhər təşkilatının sədri Bayram Aslanov gənclərin ölkəmizin ictimai-siyasi həyatında fəal rolundan, mədəniyyət, təhsil, idman və digər sahələrdə qazandıqları uğurlardan bəhs edib.

Gəncə Tibb Kollecinin direktoru, Əməkdar həkim Mehman Rzayev vurğulayıb ki, bu gün Azərbaycan gəncləri bütün sahələrdə özlərini doğruldub, ölkəmizi dünya miqyasında layiqincə təmsil etməyi bacarıblar.

Gəncə-Daşkəsən Regional Təhsil İdarəsinin müdiri Elçin Kərimov qeyd edib ki, bu gün Azərbaycan gənci həm milli köklərinə bağlı, həm də qlobal dünyada öz yerini tutmağı bacaran bir nəsildir. Onlar açıq fikirli, təşəbbüskar, sosial məsuliyyətli və fəal vətəndaş mövqeyi ilə seçilirlər. Dövlətçilik ənənələrinin qorunması və müstəqilliyimizin möhkəmləndirilməsi məhz belə gənclərin çiyinlərində dayanır.

Gəncə şəhərinin ictimai-siyasi və mədəni həyatında fərqlənən gənclərə “Təqdirnamə”, YAP sıralarına yeni qatılan bir qrup gəncə üzvülük vəsiqələri təqdim olunub.

Tədbirdə istedadlı gənclərin hazırladığı konsert proqramı nümayiş olunub.

Paylaş:

Baxılıb: 383 dəfə