Qlobal rəqabət mühitində yeni trendlər

Bakı:

17 °C

94 %

3 m/s

Əlaqə

AZ RU EN

Ana səhifə / YAP xəbərləri / Qlobal rəqabət mühitində yeni trendlər

Qlobal rəqabət mühitində yeni trendlər

16.02.2026 [23:58]

Fevralın 11-də Prezident İlham Əliyevin sədrliyi ilə “Azərbaycanın yeni rəqəmsal arxitekturası” adlı vahid fəaliyyət planına həsr olunmuş müşavirə keçirildi. Müşavirə günümüzün əsas çağırışlarından biri olan rəqəmsal inkişafa, bunu şərtləndirən amillərə həsr edildi. Belə ki, cənab İlham Əliyev bildirdi ki, rəqəmsal inkişafla bağlı olan məsələləri müzakirə edəcəyik, buna ehtiyac var. Bu məsələ bizim gələcək inkişafımızı böyük dərəcədə şərtləndirəcək. Dünyada gedən meyillər, trendlər bəllidir. Bu gün süni intellektin tətbiqi, data mərkəzlərinin yaradılması, rəqəmsallaşma ilə bağlı islahatlar faktiki olaraq ölkələrin gələcək inkişafını müəyyən edir. Azərbaycanda bu istiqamətdə müəyyən işlər görülüb. Ən önəmlisi gələcək fəaliyyətimizdə bu məsələni əsas prioritetlər siyahısına daxil etməyimizdir.

Prezident İlham Əliyev müşavirədə Azərbaycanın üstünlüklərindən geniş bəhs etdi. Bunlardan biri, təbii ki, coğrafi mövqeyimizdir. Asiya ilə Avropa arasında yerləşmək, Şimal-Cənub və Şərq-Qərb nəqliyyat dəhlizlərinin kəsişməsində olmaq ölkəyə mühüm tranzit və logistika imkanları qazandırıb. Cənab İlham Əliyev vurğuladı ki, coğrafi vəziyyətimiz bizdən asılı olmayan üstünlükdür. Ancaq hər bir ölkənin coğrafi vəziyyəti onun xeyrinə, yaxud da ki, ziyanına işləyə bilər. Biz coğrafi vəziyyətimizi ölkəmizin inkişafına bağlamışıq və buna nail olmuşuq. Ona görə Asiya ilə Avropa arasında, Şimal-Cənub dəhlizi üzərində yerləşməyimiz və yaradılmış mövcud infrastruktur bu üstünlüyü bizə təmin edir.

Ümummilli Lider Heydər Əliyevin müəllifi olduğu neft strategiyasının əsas tərkib hissəsi olan “Əsrin müqaviləsi”nin imzalanmasından ötən dövr ərzində Azərbaycanın iştirakçısı və təşəbbüsçüsü olduğu neft-qaz layihələrinin həyata keçirilməsi çərçivəsində geniş infrastruktur formalaşıb. Kəmərlərin çəkilişi zamanı fiber-optik xətlərin də paralel şəkildə qurulması rəqəmsal şəbəkənin təməlini yaradıb. Hazırda Xəzər dənizinin Şərq sahillərini birləşdirəcək fiber-optik kabel layihəsinin icrası Şərq istiqamətində bağlantıları gücləndirəcək. Qərb istiqamətində isə yeni marşrutların yaradılması gündəmdədir. Bu amil Azərbaycanın regional rəqəmsal qovşağa çevrilməsi üçün real zəmin yaradır. Dövlətimizin başçısı İlham Əliyev onu da qeyd etdi ki, digər üstünlüyümüz ondan ibarətdir ki, son illər ərzində aparılan işlər nəticəsində biz öz enerji generasiya gücümüzü böyük dərəcədə artıra bilmişik. Son 20 il ərzində generasiya gücümüz təxminən iki dəfəyə yaxın artıb və bu gün 10 min meqavata bərabərdir. Yeni elektrik stansiyaları - istər qaz, istər hidro, istər Günəş, külək bu gün Azərbaycan reallıqlarını müəyyən edib. Hazırda bizim ən azı 2 min meqavat istifadə edilməyən generasiya gücümüz var ki, rəqəmsallaşma, süni intellekt, data mərkəzlərinin yaradılması üçün bu, başlıca şərtdir. Yerləşdiyimiz bölgədə, geniş bölgədə bu imkanlara malik olan ölkələr ən azı çox deyil və bu gün Azərbaycan özünü bütün əsas enerji mənbələri ilə tam təmin edir, hətta onları dünya bazarlarına da çıxarır. Nəzərə alsaq ki, bizim bərpaolunan enerji növlərinin yaradılması istiqamətində planlarımız göz önündədir, gələcəkdə bizim generasiya gücümüz imzalanmış kontraktlar əsasında daha da artacaq. Ona görə biz bu üstünlükdən səmərəli şəkildə istifadə etməliyik. Təbii ki, ölkə daxilində elektrik enerjisinə artan tələbat nəzərə alınmalıdır.

Transmilli böyük şirkətlərlə iş təcrübəmiz də böyük üstünlüklərimizdəndür. Azərbaycan iqtisadiyyatına son 20 ildə 350 milyard dollardan çox sərmayə qoyulub. Xarici sərmayələr qorunub. Bunu həm qanunlar tərəfindən, eyni zamanda, gündəlik həyatda görürük. Həm yerli, həm xarici sərmayələrin qorunması hər bir ölkənin, o cümlədən Azərbaycanın inkişafını müəyyən edib. Burada da nadir təcrübəmiz var. 30 ildən çox davam edən bizim neft-qaz layihələrimiz necə imzalanıbsa, bu gün elə də icra edilir. Prezident İlham Əliyev bu çağırışı etdi ki, bu təcrübə əlbəttə ki, rəqəmsal dünyada aparıcı rol oynayan şirkətlərlə münasibətlərdə də özünü göstərməlidir.

Müşavirədə dövlətimizin başçısı İlham Əliyevin səsləndirdiyi hər bir çağırış gələcəyəmizə, dayanıqlı inkişafa hədəflənib. Azərbaycan hər zaman yeni təcrübələrin tətbiqi ilə diqqətdədir. Yeni texnologiyaların tətbiqi və inkişafı dövlətimizin inkişaf strategiyasında əsas hədəflərdən biridir.

Etibar Hacıyev

YAP Ağstafa rayon təşkilatının sədri

Paylaş:

Baxılıb: 288 dəfə