Bakı və Belqrad qətiyyətli siyasi ittifaqın yeni səhifəsini yazdı

Bakı:

29 °C

44 %

9 m/s

Əlaqə

AZ RU EN

Ana səhifə / YAP xəbərləri / Bakı və Belqrad qətiyyətli siyasi ittifaqın yeni səhifəsini yazdı

Bakı və Belqrad qətiyyətli siyasi ittifaqın yeni səhifəsini yazdı

18.02.2026 [12:20]

Fevralın 15-də Belqradda Azərbaycan ilə Serbiya arasında Strateji Tərəfdaşlıq Şurasının ilk iclasının keçirilməsi iki ölkə münasibətlərində yeni mərhələnin rəsmi başlanğıcı kimi qiymətləndirilməlidir. Azərbaycan Respublikasının Prezidenti cənab İlham Əliyev və Serbiya Respublikasının Prezidenti Aleksandar Vuçiçin iştirakı ilə baş tutan bu toplantı tərəfdaşlığın artıq sabit siyasi platformaya çevrildiyini nümayiş etdirdi. Bu görüş sadəcə yüksək səviyyəli diplomatik təmas deyil, gələcək illərin siyasi və iqtisadi xəritəsini müəyyənləşdirən strateji qərarların müzakirə olunduğu mühüm mərhələ idi. Strateji Tərəfdaşlıq Şurasının yaradılması və ilk iclasının keçirilməsi münasibətlərin sistemli idarəetmə mexanizminə bağlandığını göstərir. Artıq Bakı–Belqrad əlaqələri yalnız liderlərin qarşılıqlı etimadına deyil, hökumətlərarası koordinasiya modelinə söykənir. Hazırkı beynəlxalq şəraitdə belə mexanizmlər xüsusi əhəmiyyət daşıyır. Regional və qlobal proseslərin sürətlə dəyişdiyi bir zamanda siyasi dialoqun davamlılığı və qərarların operativ icrası əsas üstünlük hesab olunur. Azərbaycan və Serbiya müxtəlif regionlarda yerləşsələr də, siyasi fəlsəfələrində mühüm oxşarlıqlar mövcuddur. Hər iki dövlət üçün müstəqillik ali dəyərdir, ərazi bütövlüyü dəyişməz prinsipdir və xarici siyasət milli maraqlara əsaslanır. Belqrad görüşü bu prinsiplərin yalnız sözlə deyil, konkret siyasi əməkdaşlıqla təsdiq olunduğunu göstərdi. Qarşılıqlı dəstək beynəlxalq platformalarda da davam etdiriləcək. Energetika istiqaməti bu tərəfdaşlığın aparıcı xəttidir. Azərbaycan qazının Serbiyaya ixracı artıq praktik nəticədir. Lakin daha mühüm mərhələ qazın elektrik enerjisinə çevrilməsi üzrə birgə layihədir. Bu təşəbbüs Serbiyanın enerji təhlükəsizliyini möhkəmləndirəcək, Azərbaycanın Avropa enerji bazarındakı mövqeyini gücləndirəcək, qarşılıqlı sərmayə etimadını dərinləşdirəcək. Azərbaycanın 2032-ci ilə qədər əlavə 8 giqavat enerji gücü yaratmaq planı isə ölkənin enerji strategiyasının uzunmüddətli və sistemli xarakter daşıdığını təsdiqləyir. Bu gücün əhəmiyyətli hissəsinin ixraca yönəlməsi Bakı üçün yeni iqtisadi və siyasi imkanlar açır. Serbiyada formalaşmış müsbət investisiya mühiti Azərbaycanın bu ölkəyə iri həcmli sərmayə yatırmaq niyyətini reallaşdırır. Bu fakt onu göstərir ki, münasibətlər yalnız siyasi bəyanatlarla məhdudlaşmır, real iqtisadi layihələrlə möhkəmləndirilir. Azərbaycan artıq təkcə enerji ixracatçısı deyil, həm də xaricə kapital yatıran dövlət kimi çıxış edir. Bu isə iqtisadi gücün artmasının və beynəlxalq mövqenin möhkəmlənməsinin göstəricisidir.

Mətbuata bəyanatında Prezident İlham Əliyev münasibətlərin mahiyyətini qısa və aydın ifadə etdi: “Serbiya və Azərbaycan - iki dost ölkə daim bir-birinin yanındadır.” Bu fikir münasibətlərin davamlı və prinsipial xarakter daşıdığını göstərir. Enerji əməkdaşlığı ilə bağlı cənab Prezident qeyd etdi ki, ixrac həcminin artırılması barədə qərar qəbul olunub. Bu isə strateji tərəfdaşlığın konkret nəticələr verdiyini təsdiq edir. Dövlətçilik mövzusuna toxunan dövlət başçısı Serbiyanın suverenlik yolundakı mübarizəsini yüksək qiymətləndirdi və bu dəyərin hər iki xalq üçün ortaq prinsip olduğunu vurğuladı. Bəyanatın sonunda səslənən çağırış isə siyasi və mənəvi həmrəyliyin ifadəsi idi: “Yaşasın Serbiya! Yaşasın Azərbaycan! Yaşasın Serbiya-Azərbaycan dostluğu!” Bu sözlər diplomatik ritorikadan daha artıq məna daşıyır — bu, strateji tərəfdaşlığın ictimai və siyasi təsdiqidir.

Belqrad görüşü ilə Azərbaycan və Serbiya münasibətlərini yeni mərhələyə çıxardı. Bu mərhələ institusional əməkdaşlıq, enerji və investisiya sinerjisi, suverenlik prinsipinə sadiqlik və qarşılıqlı siyasi dəstək üzərində qurulub. Bakı ilə Belqrad arasında formalaşan strateji xətt regional sabitliyin və qarşılıqlı etimadın mühüm dayağına çevrilir. Bu tərəfdaşlıq situativ maraqlara deyil, uzunmüddətli dövlət strategiyasına əsaslanır və gələcək illərdə daha da möhkəmlənəcək.

Rüstəm Nağıyev,

YAP Gədəbəy rayon təşkilatının sədri

Paylaş:

Baxılıb: 421 dəfə