YAP Azərbaycan siyasi palitrasında alternativsiz qüvvədir

Bakı:

26 °C

50 %

1 m/s

Əlaqə

AZ RU EN

Ana səhifə / YAP xəbərləri / YAP Azərbaycan siyasi palitrasında alternativsiz qüvvədir

YAP Azərbaycan siyasi palitrasında alternativsiz qüvvədir

26.11.2013 [09:25]

Gəncə şəhərində YAP-ın yaradılmasının 21-ci ildönümünə həsr olunmuş tədbir keçirilib
Gəncə şəhərində Yeni Azərbaycan Partiyasının (YAP) yaradılmasının 21-ci ildönümü münasibətilə geniş tədbir keçirilib. Tədbir iştirakçıları öncə Yeni Azərbaycan Partiyasının yaradıcısı, Ulu öndər Heydər Əliyevin şəhərin mərkəzi meydanındakı abidəsini ziyarət edərək, Onun əziz xatirəsini yad ediblər.
Tədbirdə çıxış edən Gəncə şəhər İcra Hakimiyyətinin başçısı Elmar Vəliyev deyib ki, əgər YAP-ın qurucusu, Ulu öndər Heydər Əliyev 1993-cü ilin iyununda - son dərəcə mürəkkəb, ağır bir dövrdə ölkəyə rəhbərlik məsuliyyətini üzərinə götürməsəydi, biz bugünkü müstəqil, qüdrətli, sürətlə inkişaf edən, regionun lider dövlətinə çevrilən Azərbaycandan danışa bilməyəcəkdik. İcra Hakimiyyətinin başçısı bildirib ki, olduqca çətin bir şəraitdə yaranan YAP-ın çox qısa bir müddətdə əsl siyasi qüvvə kimi formalaşması, minlərlə vicdanlı və əqidəli insanın onun sıralarında birləşməsi bu gün bir daha Heydər Əliyev fenomeninin, dühasının qüdrətindən xəbər verir.
Elmar Vəliyev onu da vurğulayıb ki, alternativi olmayan bu siyasəti 2003-cü ildən inamla davam etdirən YAP-ın Sədri, cənab Prezident İlham Əliyevin ötən 10 ildəki əzmkar fəaliyyəti Azərbaycanın onilliklərə bərabər bir inkişaf yolu keçməsini təmin etməklə yanaşı, partiyanın cəmiyyətdəki alternativsiz qüvvə statusunu möhkəmləndirib: “YAP-ın güclü siyasi partiya kimi özünü təsdiqləməsi həm də cənab İlham Əliyevin yüksək liderlik keyfiyyətləri ilə şərtlənir. 9 oktyabrda ölkəmizdə keçirilən prezident seçkiləri Azərbaycan vətəndaşlarının Prezident İlham Əliyevə böyük etimad bəslədiyini, Onun yürütdüyü siyasi kursu hərtərəfli dəstəklədiyini növbəti dəfə birmənalı olaraq təsdiqləyib. Prezident seçkilərinin nəticəsi göstərdi ki, Azərbaycan cəmiyyəti Ümummilli lider Heydər Əliyev siyasi kursunu ölkənin davamlı inkişafının, bundan sonrakı uğurlarının, təminatlı gələcəyinin mühüm şərti hesab edir. Prezident İlham Əliyev YAP İdarə Heyətinin üzvləri ilə 11 mart 2004-cü il tarixli görüşündə bildirib ki, hər bir partiya üzvü Ümummilli lider Heydər Əliyevin həyata keçməyən ali ideallarını, müqəddəs arzularını gerçəkləşdirmək üçün əlindən gələni etməli, dövlətçiliyimizin inkişafına və tərəqqisinə daim xidmət göstərməlidir. Biz bunu Azərbaycanın birinci xanımı, Heydər Əliyev Fondunun prezidenti, UNESCO-nun və İSESCO-nun xoşməramlı səfiri, Milli Məclisin deputatı, həmçinin, YAP-ın Sədr müavini Mehriban Əliyevanın çoxşaxəli fəaliyyətində qabarıq görürük”.
Daha sonra çıxış edən AMEA Gəncə bölməsinin direktoru, YAP Gəncə şəhər təşkilatının İdarə Heyətinin üzvü, akademik Fuad Əliyev, partiyanın veteran üzvü, professor Cəmil Hacıyev, YAP Gəncə şəhər təşkilatının sədri Naqif Həmzəyev, Elmi Tədqiqat Bitki Mühafizə İnstitutunun direktoru, akademik Siddiqə Məmmədova YAP-ın uğurlar partiyası olduğunu bildiriblər. Natiqlər 2013-cü ilin oktyabr ayında keçirilən prezident seçkilərində partiyamızın Sədrinin növbəti möhtəşəm qələbə qazandığını vurğulayaraq, YAP-ın gələcəkdə də dövlətimizə və xalqımıza böyük faydalar verəcəyini qeyd ediblər.
Tədbirin sonunda YAP Gəncə şəhər təşkilatı yarandığı gündən partiya sıralarına ilk daxil olmuş, Gəncə şəhərinin ictimai-siyasi həyatında göstərdiyi xidmətlərinə görə fərqlənmiş şəxslər partiyanın Gəncə şəhər təşkilatının fəxri fərmanları ilə təltif olunublar. Eyni zamanda, YAP Gəncə şəhər təşkilatının 30 mininci üzvü Əzizə Məmmədovaya partiya vəsiqəsi ilə birlikdə dizüstü komputer təqdim edilib. Daha sonra partiya sıralarına yeni qəbul olunmuş fəallara üzvlük vəsiqələri verilib.
Gülər NƏCƏFOVA

Paylaş:

Baxılıb: 1197 dəfə